ბენჟამინ შეშკო ლაიფციგის დასატოვებლად ემზადება. 22 წლის სლოვენიელი ფორვარდი მიმდინარე სატრანსფერო ფანჯრის დროს ლაიფციგს 100% დატოვებს და ბოლო მომენტში რაიმე გაუთვალისწინებელი თუ არ მოხდა, კარიერას პრემიერ ლიგაში გააგრძელებს.
როგორც ირკვევა, ბენჟამინ შეშკოს ტრანსფერზე ამ წუთისთვის ორი კლუბი მუშაობს — მანჩესტერ იუნაიტედი და ნიუკასლი 22 წლის ფეხბურთელის აგენტთან მუდმივ კონტაქტზე არიან. რუბენ ამორიმის გუნდი ახალ ფორვარდს ეძებს, ხოლო ნიუკასლი ალექსანდერ ისაკის შემცვლელის ძიებაშია. დადასტურებულად შეგვიძლია იმის თქმა, რომ ორივე კლუბი პირველ ოფიციალურ შეთავაზებას უახლოეს პერიოდში გააკეთებს.
ლაიფციგი ახალგაზრდა გოლეადორს დაახლოებით €70-75 მილიონად აფასებს, რაც ზემოხსენებული კლუბებისთვის სრულიად მისაღები თანხაა. უახლოეს დღეებში ბენჟამინ შეშკოს პოტენციურ ტრანსფერთან დაკავშირებით უფრო მეტი ინფორმაცია გახდება ცნობილი.
