ტრანსფერი დაიხურა — ვიქტორ ბონიფეისი ლევერკუზენიდან კარიერას მილანში გააგრძელებს! მხარეებმა გარიგების ყველა დეტალი შეათანხმეს, 24 წლის ნიგერიელ ფორვარდს იტალიაში უკვე ელოდებიან, სადაც ახალ კლუბში სამედიცინო შემოწმებას გაივლის და კონტრაქტს ხელს მოაწერს. მხარეებს შორის 1-წლიანი საიჯარო ხელშეკრულება გაფორმდება, თუმცა მილანს ვიქტორ ბონიფეისის გამოსყიდვა სეზონის ბოლოს €24 მილიონად შეეძლება. ჯამში საუბარია €29/30 მილიონიან გარიგებაზე.
მილანი, რომ ვიქტორ ბონიფეისით ინტერესდებოდა, ამის შესახებ რამდენიმე თვის წინ გაცნობეთ. ნიგერიელი ფორვარდის გარდა განიხილებოდა რასმუს ჰოილუნისა და დუშან ვლაჰოვიჩის დამატებაც, თუმცა "როსონერიმ" არჩევანი ბუნდესლიგის ერთ-ერთ გამორჩეულ შემტევზე შეაჩერა.
ვიქტორ ბონიფეისი ლევერკუზენის ღირსებას 2023 წლიდან მოყოლებული იცავდა, რა დროშიც ფეხბურთელმა 61 მატჩის ჩატარება მოასწრო, გაიტანა 32 გოლი და 12 საგოლე გადაცემითაც გამოიჩინა თავი. თუ ყველაფერი გეგმის მიხედვით წავა, მილანი ნიგერიელ ფორვარდს კვირის ბოლომდე ოფიციალურად წარადგენს.
