ტრანსფერი დაიხურა, ჟან-ფილიპ მატეტა კრისტალ პალასიდან კარიერას მილანში გააგრძელებს! მხარეებმა გარიგების ყველა დეტალი შეათანხმეს, 28 წლის ფრანგ ფეხბურთელს იტალიაში უკვე ელოდებიან, სადაც სამედიცინო შემოწმებას გაივლის და კონტრაქტს ხელს მოაწერს. მილანი ჟან-ფილიპ მატეტას სანაცვლოდ დაახლოებით €35 მილიონს გადაიხდის.
მილანი, რომ ჟან-ფილიპ მატეტათი ინტერესდებოდა, ამის შესახებ იტალიური პრესა რამდენიმე თვის განმავლობაში წერდა. ფრანგის ტრანსფერი 2025 წლის ზაფხულშიც განიხილებოდა, თუმცა მაშინ კრისტალ პალასმა ყველა შეთავაზება დაბლოკა და ფეხბურთელი არ გაყიდა. მიმდინარე სატრანსფერო ფანჯრის დროს ფრანგი ფორვარდის დამატებას ნოტინგემ ფორესტი და იუვენტუსიც ცდილობდნენ, თუმცა ფეხბურთელს კარიერის გაგრძელება მხოლოდ მილანში სურდა.
ჟან-ფილიპ მატეტა კრისტალ პალასის ღირსებას 2022 წლიდან მოყოლებული იცავდა. ფრანგმა ფორვარდმა ამ დროში 186 მატჩის ჩატარება მოასწრო, გაიტანა 56 გოლი და 13 საგოლე გადაცემითაც გამოიჩინა თავი. ბოლო მომენტში რაიმე გაუთვალისწინებელი თუ არ მოხდა, მილანი ფრანგი ფორვარდის ტრანსფერს უახლოეს საათებში ოფიციალურად დაადასტურებს.
