იმის ფონზე, რომ ლივერპულის კრიზისს დასასრული არ უჩანს, კლუბში ზამთრის სატრანსფერო ფანჯრისთვის მზადება უკვე დაიწყეს. როგორც ირკვევა, მერსისაიდელებს საკმაოდ დატვირთული იანვრის თვე ექნებათ და მოსალოდნელია, რომ ენფილდის ბინადრები მინიმუმ ორ ახალ ფეხბურთელს დაიმატებენ.
კლუბთან დაახლოებული წყაროების ინფორმაციით, ლივერპული ზამთრის სატრანსფერო ფანჯრის დროს ორი პოზიციის გაძლიერებას გეგმავს — არნე სლოტის მოთხოვნით კლუბი დიდი ალბათობით ცენტრალური მცველსა და ვინგერს დაიმატებს, მთავარი სამიზნეები კი უკვე ცნობილია.
მარკ გეჰი და ანტუან სემენიო — ამ ფეხბურთელების მიმართ ინტერესი რეალური და დადასტურებულია. ლივერპულში ორივე მათგანი ძალიან მოსწონთ და დიდი ალბათობით იანვარში მათ შეძენასაც შეეცდებიან.
ანტუან სემენიოს კონტრაქტში გამოსასყიდი თანხა £65 მილიონი წერია და ბორნმუთს მის გაყიდვასთან დაკავშირებით პრობლემა არ აქვს, ხოლო რაც შეეხება მარკ გეჰის, 25 წლის ცენტრალურ მცველს კრისტალ პალასთან არსებული კონტრაქტი სეზონის ბოლოს ეწურება, რაც იმას ნიშნავს, რომ ინგლისელის სატრანსფერო ფასი საკმაოდ დაბალი იქნება. ინფორმაციისთვის იმასაც გეტყვით, რომ მარკ გეჰით სხვა ევროპული გრანდებიც ინტერესდებიან, კერძოდ ბაიერნი, რეალ მადრიდი და ბარსელონა. ლივერპულში ზემოხსენებული ფეხხბურთელების გარდა სხვა მოთამაშეებსაც აქტიურად აკვირდებიან.
რაც შეეხება არნე სლოტის მომავალს, კლუბში ნიდერლანდელის კვლავ ეიმედებათ და დღევანდელი მოცემულობით, მისი გუნდიდან გაშვება არ იგეგმება. მეტიც, მერსისაიდელებმა 47 წლის სპეციალისტთან ერთად ზამთრის სატრანსფერო ფანჯრისთვის მზადება უკვე დაიწყეს.
