ფრანგი ფეხბურთელი მილანის ღირსებას 2019 წლიდან მოყოლებული იცავს. ტეო, პაოლო მალდინის ერთ-ერთი მთავარი შენაძენი იყო და დღეს, რომ ფეხბურთელი თავის პოზიციაზე ერთ-ერთი საუკეთესოა, თუ საუკეთესო არა, სწორედ მილანის ლეგენდის დიდი დამსახურებაა. ტეო ახლა უკვე 27 წლისაა და იმის მიუხედავად, რომ აგენტის განცხადებით ფეხბურთელი მილანში თავს კომფორტულად გრძნობს, მასთან დაახლოებული წყაროები ახალ გამოწვევაზე ალაპარაკდნენ... კლუბში გატარებული თითქმის 6 წლის შემდეგ, დიდი შანსია ფრანგმა სხვა ქვეყანაში თამაშის სურვილი გამოთქვას. თუმცა მილანი დანებებას არ აპირებს, ამის თქმა დადასტურებულად შეგვიძლია. როგორც გუნდის სპორტულმა დირექტორმა ჯოფრი მონკადამ განაცხადა, ფეხბურთელის აგენტთან მოლაპარაკებები საკმაოდ კარგად მიმდინარეობს და კლუბში სჯერათ, რომ მხარეები ახალ კონტრაქტზე შეთანხმებას მოახერხებენ. ფრანგი ფეხბურთელი მილანში, რაფა ლეაოსთან ერთად ყველაზე ძვირადღირებული ფეხბურთელია. "როსონერი" ერნანდესს წელიწადში €5 მილიონს უხდის.
ტეოს კლუბთან არსებული კონტრაქტი 2026 წლამდე აკავშირებს, შესაბამისად, მილანმა ფეხბურთელს ახალი ხელშეკრულება მალე თუ არ გაუფორმა, ზაფხულში დიდი აუქციონი მოეწყობა... ფრანგის სიტუაციას კი ორი კლუბი ყურადღებით აკვირდება. ბაიერნი, რომ ფეხბურთელით ინტერესდება, ეს ძველი ამბავია, რადგან გერმანელები ალფონსო დევისის პოტენციურ შემცვლელს ეძებენ და როგორც წინა ზაფხულს, 2025 წელსაც შეეცდებიან ფრანგი ფეხბურთელის დამატებას.
რაც შეეხება მანჩესტერ იუნაიტედს, რუბენ ამორიმი ზაფხულში ახალ მარცხენა მცველის დამატებას გეგმავს, ტეო ერნანდესი კი ერთ-ერთი მთავარი სამიზნე იქნება. განიხილება მილოშ კერკეზის კანდიდატურაც, ასევე ყოფილი მილანელის, თუმცა ტეოს დამატება გუნდისთვის უფრო სერიოზული განაცხადი იქნება.
რა ღირს ტეო? ფეხბურთელის სატრანსფერო ფასი მინიმუმ €80 მილიონია, თუმცა მხარეებმა სეზონის ბოლომდე ახალი კონტრაქტი თუ არ გააფორმეს, ზაფხულში მისი ფასი დაიკლებს, რასაც სხვა კლუბების გააქტიურებაც მოჰყვება.
უახლოეს პერიოდში ტეო ერნანდესის ახალ კონტრაქტთან დაკავშირებით, უფრო მეტ სიახლეს შევიტყობთ.
უახლოეს პერიოდში ტეო ერნანდესის ახალ კონტრაქტთან დაკავშირებით, უფრო მეტ სიახლეს შევიტყობთ.
