კიეზა იუვენტუსის ღირსებას 2020 წლიდან იცავს და მოსვლის დღიდან, გუნდის ერთ-ერთ მთავარ ლიდერად ჩამოყალიბდა. არ ჰქონდა მნიშვნელობა ვინ იყო გუნდის მთავარი მწვრთნელი, იტალიელის ადგილი სასტარტო შემადგენლობაში სულ მოიძებნებოდა. იმის მიუხედავად, რომ ფედემ ამ დროის განმავლობაში საკმაოდ ბევრი ტრავმის მიღება მოასწრო, გუნდიდან მის გაშვებას არავინ განიხილავდა.... თუმცა სიტუაცია ახლა თავიდან ბოლომდე შეიცვალა.
რატომ უშვებენ კიეზას იუვენტუსიდან?
პირველ რიგში, ეს ფეხბურთელის კონტრაქტის გამო ხდება — ფედეს კლუბთან ხელშეკრულება 2025 წელს ეწურება, მხარეები კი ახალ კონტრაქტზე ვერ თანხმდებიან. ტურინულ გრანდში არ სურთ ფეხბურთელის მომავალ წელს უფასოდ დაკარგვა, შესაბამისად, უფროსობა მის გაყიდვას, ამ სატრანსფერო ფანჯრის დროს შეეცდება.
მეორე მიზეზი ტიაგო მოტაა, რომელიც სხვა სტილის შემტევებს ენდობა და კიეზა მის სათამაშო გეგმებში არ შედის. იტალიელ სპეციალისტსა და ფეხბურთელს შორის საუბარი რამდენჯერმე შედგა და მოტამ კიეზას აუხსნა, რომ თუ გუნდში დარჩება, როტაციის ფეხბურთელი იქნება და არა სასტარტო შემადგენლობის.
იმის მიუხედავად, რომ კიეზას "ბიანკონერის" დატოვება არ სურს, იუვენტუსი მის გაყიდვას მაინც გეგმავს. კიეზას სატრანსფერო ფასი €25-30 მილიონის ფარგლებშია. ფედეს დამატების სურვილი რამდენიმე კლუბს აქვს, თუმცა ამ დრომდე რაიმე კონკრეტული ან დადასტურებული ინფორმაცია, ჩვენამდე არ მოსულა.
