მილანის წლევანდელი სეზონი ვერანაირ კრიტიკას ვერ უძლებს, თუმცა "როსონერიში" მაინც არიან ისეთი ფეხბურთელები, რომლებზეც როგორც ფეხბურთის გულშემატკივრები, ისე უცხოური მედიაც ყოველდღიურად საუბრობს. ამ სიაშია ნიდერლანდელი ფეხბურთელი ტიჯანი რეინდერსი, რომელიც კარიერის საუკეთესო სეზონს ატარებს. 26 წლის ფეხბურთელის ანგარიშზე 14 გოლი და 4 საგოლე გადაცემაა.
რეინდერსის ასეთი კარგი სათამაშო ფორმა, ევროპის მასშტაბით, ტოპ კლუბებს რა თქმა უნდა არ გამორჩენიათ. მანჩესტერ სიტისა და ბარსელონას ინტერესი კიდევ ერთხელ დადასტურდა, მეტიც, საუბრებია სხვა გუნდებზეც, თუმცა მილანური კლუბის პოზიცია ცნობილია — ფეხბურთელი არ იყიდება! როგორც ცნობილია, არც ტიჯანი განიხილავს გუნდის შეცვლას და ეს ერთი თვის წინ, ახალი კონტრაქტის გაფორმებით კიდევ ერთხელ დაადასტურა. შეგახსენებთ, ნიდერლანდელმა მილანთან კონტრაქტი 2030 წლამდე გაახანგრძლივა.
ტიჯანი რეინდერსი მილანის ღირსებას 2023 წლიდან მოყოლებული იცავს. ფეხბურთელმა ამ დროში 96 მატჩის ჩატარება მოასწრო, გაიტანა 18 გოლი და 8 საგოლე გადაცემაც შეასრულა.
