რამდენიმეკვირიანი მოლაპარაკებები საბოლოო შეთანხმებით დასრულდა, მოჰამედ კუდუსი ვესტ ჰემიდან კარიერას ტოტენჰემში გააგრძელებს. მხარეებმა გარიგების ყველა დეტალი შეათანხმეს, 24 წლის განელ ფეხბურთელს ლონდონში უკვე ელოდებიან, სადაც ახალ კლუბში სამედიცინო შემოწმებას გაივლის და კონტრაქტს ხელს მოაწერს. "დეზები" ახალგაზრდა ფეხბურთელის სანაცვლოდ £55 მილიონს გადაიხდიან, ხოლო რაც შეეხება კონტრაქტის ხანგრძლივობას, კუდუსი 6-წლიან ხელშეკრულებას გააფორმებს.
იმის მიუხედავად, რომ მოჰამედ კუდუსის დამატებას სხვა ინგლისური კლუბებიც ცდილობდნენ, ტომას ფრანკის გუნდმა ყველას აჯობა და გარიგებაც დაიხურა. თავდაპირველად ვესტ ჰემი ფეხბურთელის სანაცვლოდ £70 მილიონამდე ითხოვდა, თუმცა ტოტენჰემმა მოახერხა და კუდუსი ბევრად დაბალ თანხად შეიძინა.
მოჰამედ კუდუსი ვესტ ჰემის ღირსებას 2023 წლიდან მოყოლებული იცავდა. განელმა ამ დროში 80 მატჩის ჩატარება მოასწრო, გაიტანა 19 გოლი და 13 საგოლე გადაცემითაც გამოიჩინა თავი.
