ინტერში ახალი სეზონისთვის მზადება უკვე დაიწყეს. რამდენიმე კვირის წინ როგორც გაცნობეთ, ზაფხულში "ნერაძურიში" დიდი ცვლილებები იგეგმება და არსებული შემადგენლობაც გადახალისდება. კლუბთან დაახლოებულ წყაროებს თუ დავუჯერებთ, პირველ რიგში მეკარე შეიცვლება და ინტერს ახალ სეზონში, ახალი კარის დარაჯი ეყოლება.
გულიელმო ვიკარიოზე პირველად თვეების წინ დავწერეთ და როგორც ჩანს, ინტერში იტალიელის დამატება გადაწყვეტილი აქვთ. მილანური კლუბის სპორტული დირექტორი პიერო აუზილიო ქალაქ ლონდონში რამდენიმე საათის წინ გაფრინდა, სადაც შეხვედრა შედგება როგორც 29 წლის მეკარის აგენტთან, ისე ტოტენჰემის წარმომადგენლებთანაც.
ინტერის სურვილს ემატება გულიელმო ვიკარიოს პოზიციაც — დადასტურებულად შეგვიძლია იმის თქმა, რომ იტალიელი ზაფხულში ტოტენჰემს 100% დატოვებს, რაც "ნერაძურის" საქმეს ბევრად უმარტივებს.
ზაფხულის სატრანსფერო ფანჯრის მოახლოებასთან ერთად, გულიელმო ვიკარიოს ინტერში პოტენციურ ტრანსფერთან დაკავშირებით უფრო მეტი ინფორმაცია გახდება ცნობილი, თუმცა ერთი რამ ფაქტია, იტალიელი მეკარე "ნერაძურის" რჩეულია და საკმაოდ დიდი შანსია სწორედ ის გახდეს გუნდის ახალი პირველი ნომერი.
