ახლა უკვე ოფიციალურად შეგვიძლია იმის თქმა, რომ ტრენტ ალექსანდერ-არნოლდი სეზონის ბოლოს ლივერპულს დატოვებს. ამის შესახებ როგორც მერსისაიდულმა კლუბმა, ისე თავად ფეხბურთელმაც განაცხადა. 26 წლის ფეხბურთელი ზაფხულში თავისუფალი აგენტის სტატუსით რეალ მადრიდს შეუერთდება.
ამ სტატიაში ვისაუბრებთ რეალ მადრიდში გარიგების დეტალებსა და იმ მთავარ მიზეზებზე, რის გამოც ინგლისელმა ლივერპულის დატოვება გადაწყვიტა.
ტრენტ ალექსანდერ-არნოლდი რეალ მადრიდთან 6-წლიან კონტრაქტს გააფორმებს. როგორც ინგლისური პრესა იუწყება, ინგლისელის ანაზღაურება მადრიდულ გრანდში ტოპ კატეგორიაში არ იქნება, მეტიც, ბევრი წყაროს ინფორმაციით, ლივერპული ფეხბურთელს ბევრად მეტ ხელფასს სთავაზობდა, რაზეც მარჯვენა მცველმა უარი განაცხადა.
ერთ-ერთი მთავარი მიზეზი, რის გამოც ანროლდმა ლივერპულის დატოვება გადაწყვიტა ახალი გამოწვევა იყო. ინგლისელი თვლის, რომ მერსისაიდულ კლუბთან ერთად ყველა შესაძლო ტიტული მოიგო, შესაბამისად, 26 წლის ასაკში ახალ გამოწვევას დათანხმდა.
და ბოლოს, ჯუდ ბელინგემის ფაქტორი — ფეხბურთელები ძალიან ახლო მეგობრები არიან და როგორც მათთან დაახლოებული წყაროები ამბობენ, ჯუდმა ყველაფერი გააკეთა ტრენტის დასაყოლიელებლად, რაც წარმატებით გამოუვიდა.
ახლა გასარკვევია, ალექსანდერ-არნოლდი რეალ მადრიდს მსოფლიო საკლუბო ჩემპიონატის დაწყებამდე შეუერთდება თუ არა. მხარეები ამაზე მუშაობენ და უახლოეს კვირებში ყველაფერი გაირკვევა.
