შეთანხმება შედგა, ჟერემი ჟაკე რენიდან კარიერას ლივერპულში გააგრძელებს! 20 წლის ფრანგ ცენტრალურ მცველს ინგლისში დღეს ელოდებიან, სადაც სამედიცინო შემოწმებას გაივლის და კონტრაქტს ხელს მოაწერს.
ლივერპული ჟერემი ჟაკეს სანაცვლოდ დაახლოებით €70 მილიონს გადაიხდის და ახალგაზრდა ფეხბურთელს 6-თვიანი იჯარით რენში დატოვებს. ფრანგი ცენტრალური მცველი მერსისაიდულ კლუბთან ხელშეკრულებას 2032 წლამდე გააფორმებს.
იმის მიუხედავად, რომ ჟერემი ჟაკეს ტრანსფერზე ჩელსი და ბაიერნიც აქტიურად მუშაობდნენ, ფრანგ ფეხბურთელს კარიერის გაგრძელება მხოლოდ ლივერპულში სურდა. მერსისაიდელები ასევე თანახმა იყვნენ ფეხბურთელის რენში იჯარით დატოვებაზეც, რამაც მხარეებს შორის გარიგება კიდევ უფრო დააჩქარა.
ჟერემი ჟაკე რენის აკადემიის აღზრდილია, პირველი გუნდის ღირსებას კი 2024 წლიდან მოყოლებული იცავს. ფრანგმა ფეხბურთელმა ამ დროში 31 მატჩის ჩატარება მოასწრო და პატარა ასაკის მიუხედავად გუნდის ერთ-ერთ ლიდერადაც ჩამოყალიბდა.
