ლივერპულის ახალწვეულმა გიორგი მამარდაშვილმა კლუბის ოფიციალურ არხთან საინტერესო თემებზე ისაუბრა.
- გიორგი, პირველად გელაპარაკებით, როგორც ლივერპულის ფეხბურთელს. კეთილი იყოს თქვენი მობრძანება კლუბში. როგორია ამ კლუბის ლოგოს ტარება და საბოლოოდ ლივერპულის ფეხბურთელობა?
- აქ ყოფნით ძალიან ბედნიერი ვარ. ეს ჩემთვის უდიდესი მომენტია, რადგან ისეთ კლუბში გადასვლა, როგორიც ლივერპულია, არა მხოლოდ ტრანსფერია, არამედ ჩემი ოცნების ახდენაცაა. თავს მზად, მოტივირებულად და ამაყად ვგრძნობ.
- გასულ ზაფხულს ლივერპულში ტრანსფერს დათანხმდი - ამ მომენტზე რომ ვისაუბროთ და ასევე როგორი იყო აქ ჩამოსვლისა და კონტრაქტის გაფორმების შეგრძნება?
- როდესაც გასულ ზაფხულს ლივერპულის შეთავაზებას დავთანხმდი, ვიგრძენი, რომ ჩემს ცხოვრებაში რაღაც დიდი იწყებოდა. მაგრამ ახლა ნამდვილად მესმის, რას ნიშნავს ლივერპულის მოთამაშედ ყოფნა.
- დიოგუ ჟოტასა და ანდრე სილვას ტრაგიკული გარდაცვალების შემდეგ კლუბისთვის ძალიან რთული პერიოდი დადგა. როგორი განწყობაა გუნდში? ახალწვეულებს როგორ დაგხვდნენ ფეხბურთელები?
- დიახ, როდესაც აქ პირველად ჩამოვედი, კლუბისთვის ძალიან რთული მომენტი იყო. თუმცა, ყველა ერთმანეთს უჭერდა მხარს და ვხედავ, რომ აქ დიდი ოჯახია. ჩვენ უბრალოდ გუნდი არ ვართ, ჩვენ ვართ ადამიანები, რომლებიც ერთმანეთზე ზრუნავენ.
- გილოცავ, პირველი ქართველი ხარ, ვინც ლივერპულში თამაშობს. რამდენად ამაყი ხარ ამით და რას ნიშნავს ეს შენთვის და ქართველი ხალხისთვის?
- ძალიან ამაყი ვარ, რომ პირველი ქართველი ვარ, ვინც ლივერპულის ფორმა მოირგო. ვიცი, ჩემთვისაც და ყველა ქართველისთვისაც ეს უდიდესი მოვლენაა.
- როგორი იყო რეაქცია საქართველოში, როდესაც ეს გარიგება გასულ ზაფხულს გამოცხადდა?
- ეს დღე არასდროს დამავიწყდება. როდესაც ლივერპულთან კონტრაქტი გავაფორმე. საქართველოდან უამრავი შეტყობინება მივიღე და ყველა ძალიან ბედნიერი და აღფრთოვანებული იყო.
- ალისონ ბეკერის შესახებ რისი თქმა შეგიძლიათ?
- რაც შემიძლია ვთქვა ალის შესახებ, ის არის, რომ ის ამჟამად მსოფლიოში ერთ-ერთი საუკეთესო მეკარეა და მასთან მუშაობა ძალიან მიხარია.
- მაგრამ ცხადია, აქ იმისთვის ხარ, რომ ითამაშო და კონკურენცია გაუწიო მას...
- ეს ძალიან საინტერესო გამოწვევა იქნება. ზოგადად მიყვარს გამოწვევები და აქ იმისთვის ვარ, რომ ჩემი მაქსიმუმი გავაკეთო და გუნდს დავეხმარო.
- და ბოლოს, გაქვთ რაიმე გზავნილი ლივერპულის გულშემატკივრებისთვის?
- კი, რა თქმა უნდა. ვიცი, რა პასუხისმგებლობაც ამ მაისურის ტარებას მოჰყვება. ლივერპულის ლოგო ძალიან ბევრს ნიშნავს ხალხისთვის. აქ ვარ იმისთვის, რომ ყველა ვარჯიშზე, ყველა მატჩში მაქსიმუმი გავაკეთო, გუნდს დავეხმარო და ჩვენი გულშემატკივრების ნდობა დავიმსახურო. მინდა რამდენიმე სიტყვა ვთქვა ქართულად. მინდა გულწრფელად მადლობა გადავუხადო ყველა ქართველ გულშემატკივარს. ვამაყობ, რომ ამ დიდებულ კლუბში საქართველოს წარმოვადგენ და ყველაფერს გავაკეთებ, რომ თქვენ კიდევ უფრო იამაყოთ ჩემით.
