რამდენიმეთვიანი მოლაპარაკებები საბოლოო შეთანხმებით დასრულდა, ვიქტორ ოსიმენი გალათასარაიში რჩება! თურქული გრანდი და ნაპოლი ფეხბურთელი სრულფასოვან ტრანსფერზე შეთანხმდნენ. გალათასარაი 26 წლის ფორვარდის სანაცვლოდ ჯამში €75 მილიონს გადაიხდის, ხოლო თავად ფეხბურთელი 3-წლიან კონტრაქტს გააფორმებს. ნიგერიელი ფორვარდის წლიური ანაზღაურება დაახლოებით €18-20 მილიონი იქნება.
იმის მიუხედავად, რომ რამდენიმე თვის წინ ვიქტორ ოსიმენი გალათასარაიში დარჩენას არ განიხილავდა, ფეხბურთელმა საბოლოო ჯამში გადაწყვეტილება შეცვალა და თურქეთში დარჩა. შეგახსენებთ, ნიგერიელის დამატების სურვილი ალ ჰილალსა და იუვენტუსსაც ჰქონდათ, თუმცა ფეხბურთელმა ორივე კლუბს უარი განუცხადა.
ვიქტორ ოსიმენმა გასული სეზონი გალათასარაიში იჯარის წესით გაატარა. ფეხბურთელმა ამ დროში 41 მატჩის ჩატარება მოასწრო, გაიტანა 37 გოლი და 8 საგოლე გადაცემითაც გამოიჩინა თავი. ბოლო მომენტში რაიმე გაუთვალისწინებელი თუ არ მოხდა, თურქული გრანდი ვიქტორ ოსიმენს მომდევნო კვირაში ოფიციალურად წარადგენს.
