ზამთრის სატრანსფერო ფანჯარა 5 დღეა, რაც ოფიციალურად გაიხსნა, შესაბამისად, ტოპ კლუბების გარშემო საუბრები უკვე არ წყდება. ამ სიაში მოხვდა იუვენტუსიც, რომელიც იანვრის თვეში ახალი ფეხბურთელების დამატებას გეგმავს.
რამდენიმე იტალიური გამოცემის ინფორმაციით, ლუჩანო სპალეტიმ ახალი მარცხენა მცველი და ცენტრალური ნახევარმცველის დამატება მოითხოვა და ამის თაობაზე "ბიანკონერის" ორი ფეხბურთელი უკვე დაუკავშირეს. საუბარია ყოფილ მილანელებზე, ტეო ერნანდესსა და სანდრო ტონალიზე — მეტიც, რამდენიმე წყაროს ინფორმაციით, იუვენტუსმა ორივე მათგანის თაობაზე მოლაპარაკებები უკვე დაიწყო, თუმცა ეს ყოველივე ფეხბურთელებთან დაახლოებულმა პირებმა მალევე უარყვეს.
ნიუკასლისთვის სანდრო ტონალი ხელშეუხებელია და როგორც მინიმუმ იტალიელი ფეხბურთელი სეზონის ბოლომდე გუნდს არ დატოვებს. რაც შეეხება ტეო ერნანდესს, არც ფრანგი ფეხბურთელი გეგმავს იანვრის თვეში ალ ჰილალის დატოვებას. შესაბამისად, ყოფილ მილანელებზე გავრცელებული ინფორმაცია ჭორი აღმოჩნდა და იუვენტუსი ამ ფეხბურთელების დამატებაზე არ მუშაობს.
"ბიანკონერის" პოტენციურ სამიზნეებზე უფრო მეტი ინფორმაცია უახლოეს დღეებში გახდება ცნობილი.
