თემურ ქეცბაიამ დინამო თბილისში სამწვრთნელო კარიერა მოგებით დაიწყო. დაძაბული მატჩი, კარგი ატმოსფერო და გამარჯვება წყალტუბოში.
7 მატჩიანი მოუგებელი სერიის შეწყვეტის შემდეგ რომ ვთქვათ, დინამოს მწვრთნელის ხელი დაეტყოვო, სიმართლე არ იქნება, რადგან ქეცბაიას თავკაცობით გუნდმა ჯერ მხოლოდ ერთი მატჩი ჩაატარა და ყველაფერი წინაა, თუმცა გუნდის თამაშში სხვა, ახალი კონტურები გამოჩნდა.
ქეცბაიამ დინამოში მხოლოდ 2 ვარჯიში ჩაატარა და სამგურალის მატჩის ტაქტიკური ანალიზი და დასკვნების გამოტანა ნაადრევია, მაგრამ გამოჩნდა, რომ დინამოს ფებურთელები უფრო მონდომებულები და ბრძოლისუნაირანები იყვნენ, ვიდრე აქამდე.
მთელი მატჩის განმავლობაში, ქეცბაია თავის ფეხბურთელებს მეტი აგრესიისკენ და სირბილისკენ მოუწოდებდა. მაგალითისთვის, დიმამოს კაპიტანი ნიკა ნინუა მთელი სეზონი ლიდერობას თავის თავზე იღებს. მისი მთავარი ფუნქცია ბურთის ამოტანა და პასების განაწილებაა, რასაც თავს ძალიან კარგად ართმევს და მისი პლიუსი სისწრაფეებზე თამაში არასდროს ყოფილა, მაგრამ სამგურალთან მატჩში, ნინუამ ამ სეზონში ყველაზე მეტი დისტანცია დაფარა და აქტიური იყო დაცვით ფუნქციებშიც.
ავტორიტეტი მწვრთნელი ფეხბურთში ძალიან ბევრს ნიშნავს და ამის მაგალითად სწორედ დინამო და ქეცბაია შეგვიძლია მოვიყვანოთ. როცა შეცვლაზე შესული ფეხბურთელები ქეცბასგან ბოლო მითითებებს იღებდნენ, ისეთი თვალებით უსმენდნენ, რომ ეტყობოდათ, რა გავლენა აქვს მათზე მწვრთნელს. 90 წუთის განმავლობაში, ქეცბაია არ გაჩერებულა და აქტიურად იყო ჩართული თავის ფეხბურთელებთან კომუნიკაციაში.
დისციპლინა უმაღლეს დონეზე იქნება აყვანილი და ფეხბურთელები 10-ჯერ მეტი კონცეტრაციით და მონდომებით გავლენ მინდორზე როგორც ვარჯიშზე, ისე თამაშებზე, რადგან მათი მწვრთნელი ქეცბაიაა. კარგი ბაზა, საუკეთესო აკადემია და სრული მხარდაჭერა ხელმძღვანელობისგან - ქართველ სპეციალისტს ყველაფერი აქვს, რომ გუნდი სრულყოფილად აქციოს.
"ჩემი მიზანია, რომ დინამო თბილისს ახალგაზრდა ფეხბურთელების გარდა გამოცდილი მოთამაშეებიც ჰყავდეს, რომლებიც გუნდს წარმატების მიღწევაში დაეხმარებიან", - ეს კომენტარი ქეცბაიამ პრესკონფერენციაზე გააკეთა.
ამ სიტყვების დასტურად, პირველივე შეხვედრაში ძირითად შემადგენლობაში ვეტერანი ფორვარდი მათე ვაწაძე დააყენა, რომელსაც აქამდე სათამაშო დრო არ ეძლეოდა. ვაწაძემ დუბლი შეასრულა და დინამომ სამგურალი სწორედ მისი გოლებით დაამარცხა.
სტადიონზე ხალხის მიყვანა და ყურებადობის გაზრდა მხოლოდ ფეხბურთელს კი არა, მწვრთნელსაც შეძლებია - სადებიუტო მატჩში ყველას ყურადღება ამ თამაშისკენ იყო მიმართული და მომავალში ინტერესი კიდევ უფრო გაიზრდება. თან, წელს დედაქალაქური კლუბი ევროტურნირებზეც თამაშობს.
წლების განმავლობაში, დინამო თბილისს ბევრი კარგი სპეციალისტი ჰყავდა, თუნდაც, ბოლოს ვლადიმერ კაკაშვილი, რომელსაც დინამოს განვითარებაში დიდი წვლილი მიუძღვის. ბოლობოლო, მისი აღზრდილია მსოფლიოს ერთ-ერთი გამორჩეული ფეხბურთელი ხვიჩა კვარაცხელია, თუმცა ქეცბას მსგავსი ავტორიტეტი მწვრთნელი დინამოს აქამდე არ ყოლია.
იქნებ სწორედ ავტორიტეტი მწვრთნელის არყოფნა იყო ის მთავარი პრობლემა, რის გამოც ამდენი ხანი ქართული გუნდები და განსაკუთრებით დინამო თბილისი, წარუმატებლად გამოდიან ევროასპარეზზე? - ამას დრო გვაჩვენებს. ფაქტია, პირველმა თამაშმა ამის ნიშნები ჰორიზონტზე უკვე გამოაჩინა.
