10. ალესანდრო ალტობელი - 58 მატჩი, 25 გოლი
ჯუზეპე მეაცას შემდეგ, მილანის ინტერის ისტორიაში ყველა დროის საუკეთესო ბომბარდირი, რომელმაც შავ-ლურჯი მაისურით საერთო ჯამში 209 გოლი გაიტანა. ზოგადად კი ალტობელის ანგარიშზე საერთო ჯამში 300 ბურთია. 25 გოლის გატანა მან შეძლო უეფას თასზე, როგორც "ნერაძურის", ისე ტურინის იუვენტუსში თამაშის დროსაც.
9. ედინ ჯეკო - 48 მატჩი, 25 გოლი
თანამედროვეობის ერთ-ერთი გამორჩეული ბომბარდირი, რომელმაც 38 წლის ასაკისთვის უკვე 400-ზე მეტი გოლის გატანა მოახერხა. ჯეკო ახლაც თამაშობს და ცნობისთვის, მისი ფენერბაჰჩე წელს ევროპა ლიგაზე გამოდის. იმის გათვალისწინებით, რომ ედინი არის მოქმედი მოთამაშე, არაა გამორიცხული, რომ მან ამ რეიტინგში კიდევ უფრო წინ წაიწიოს.
8. შოთა არველაძე - 41 მატჩი, 25 გოლი
როგორც ვხედავთ, არველაძემ ალტობელისა და ჯეკოს მსგავსად გაიტანა 25 გოლი, თუმცა მან ეს ბევრად უფრო ნაკლებ შეხვედრაში გააკეთა. აქედან გამომდინარე, შოთა ალესანდროსა და ედინზე მაღალ პოზიციაზე ყოფნას იმსახურებს. ის უეფას თასზე იტანდა ამსტერდამის აიაქსის, გლაზგო რეინჯერსის, ალკმაარისა და ტრაბზონის მაისურით.
7. არიც ადურისი - 39 მატჩი, 26 გოლი
ბილბაოს ატლეტიკის ისტორიაში ერთ-ერთი საუკეთესო თავდამსხმელი, რომელიც თავის გასულ დეკადაში ევროპა ლიგაზეც ბრწყინავდა. პირველ რიგში გამოსარჩევია 2016 წლის 3 ნოემბერს გამართული მატჩი გენკთან, რომელიც ბასკებმა 5:3 მოიგეს. 5-ვე ბურთი სწორედ ესპანელმა ფორვარდმა გაიტანა.
6. რომელუ ლუკაკუ - 46 მატჩი, 27 გოლი
ხვიჩა კვარაცხელიას ახალი მეწყვილე ნაპოლის შეტევაში, რომელიც მიმდინარე სეზონში ევროთასების მიღმა არის. ლუკაკუ ევროპა ლიგაზე ბრწყინავდა ინტერის, რომას, ევერტონისა და ანდერლეხტის შემადგენლობაში. რომი ფინალამდეც არის მისული, მაგრამ მისმა გუნდმა სევილიასთან წააგო.
5. დიტერ მიულერი - 36 მატჩი, 29 გოლი
კიოლნის ისტორიაში ერთ-ერთი საუკეთესო თავდამსხმელი, რომელსაც გერმანიის ნაკრებში სათანადო ყურადღება არ ეთმობოდა. მიულერი უეფას თასზე იტანდა "თხების", ბორდოსა და შტუტგარტის შემადგენლობაში. დიტერს აღნიშნულ ტურნირზე 1-ხელ აქვს შესრულებული პოკერი, 2-ჯერ კი ჰეთ-თრიკიც.
4. კლას-იან ჰუნტელაარი - 50 მატჩი, 30 გოლი
ჰუნტელაარი ვერ დამკვიდრდა მადრიდის რეალსა და მილანში, საკუთარი თავი მან გელზენკირხენის შალკეში იპოვა. აღსანიშნავია ისიც, რომ ევროპა ლიგაზე კლასმა თავის გამოჩენა ამსტერდამის აიაქსისა და ჰერენვენის შემადგენლობაშიც შეძლო. საუკეთესო მომენტი: 2012 წელს მან 2 კვირის შუალედში ჰეთ-თრიკი შეასრულა ტვენტესა და პლზენის კარში.
3. რადამელ ფალკაო - 31 მატჩი, 30 გოლი
თავდამსხმელი, რომლის გარეშე მადრიდის ატლეტიკოსა და პორტოს წარმატებები გასული დეკადის დასაწყისში იქნებოდა წარმოუდგენელი. ფალკაომ ევროპა ლიგაზე 30 ბურთის გატანა შეძლო სულ რაღაც 31 მატჩში, რაც ნამდვილად შთამბეჭდავი შედეგია. ასევე გამოსარჩევია ის ფაქტი, რომ რადამელმა გოლების გატანა ზედიზედ 2 ფინალში შეძლო.
2. ჰენრიკ ლარსონი - 45 მატჩი, 31 გოლი
ბარსელონაში გადასვლამდე და ჩემპიონთა ლიგაზე ტრიუმფამდე, ლარსონი ისტორიას წერდა გლაზგოს სელტიკის შემადგენლობაში, სადაც მან 285 შეხვედრაში 218 ბურთი გაიტანა. 2001 წელს ჰენრიკმა ოქროს ბუციც კი მოიგო. არველაძესთან ერთად, ერთ-ერთი საუკეთესო ფორვარდი, რომელმაც დიდ წარმატებას ევროპის ტოპ 5 ლიგის მიღმა მიაღწია.
1. პიერ-ემერიკ ობამეიანგი - 62 მატჩი, 34 გოლი
ბოლოს კი გამარჯვებული და ევროპა ლიგის ისტორიაში ყველა დროის საუკეთესო ბომბარდირი. ობამეიანგმა აღნიშნული სტატუსი მიიღო გასულ სეზონში, როდესაც მარსელის ოლიმპიკის შემადგენლობაში გაიბრწყინა. სარეკორდო 32-ე ბურთის გატანის შემდეგ, პიერმა გაიტანა კიდევ 2 გოლი და თავისი ლიდერობა განამტკიცა.
