ოქროს ბურთის დაჯილდოებისთვის ბოიკოტის გამოცხადების შემდეგ, მადრიდის რეალს თავისი სისწორე და დომინირება საფეხბურთო მოედანზე უნდა დაემტკიცებინა. ჩანაფიქრი არ გამოვიდა, "სამეფო კლუბმა" თავის ქომაგებს მიმდინარე სეზონში კიდევ ერთი იმედგაცრუება აჩუქა. განვიხილოთ, თუ რამ განაპირობა "ბლანკოსის" წაგება მილანთან.
მატჩის მიმდინარეობა
იმის გათვალისწინებით, რომ კარლო ანჩელოტის გუნდს გასულ შაბათ-კვირას არ უთამაშია, ჩემპიონთა ლიგის მოქმედი ტრიუმფატორები მოწინააღმდეგეზე ბევრად დასვენებულები იყვნენ. ამ ყველაფრის მიუხედავად, ბერნაბეუს ბინადრებმა გოლი მატჩის დებიუტშივე გაუშვეს. კითხვა: კუთხურიდან ჩამოწოდების შემდეგ, თავით იტანს გერმანელი უკანახაზელი...ვინ არის ის?
ანტონიო რუდიგერი? არა, გუშინდელ შეხვედრაში ასეთი მალიკ ჩაო იყო. რეალმა გამოიღვიძა 10 წუთის შემდეგ, როდესაც "როსონერის" საჯარიმოში პენალტი ვინი ჟუნიორმა გამოიმუშავა. 11-მეტრიანი ზუსტად შეასრულა თავად დაზარალებულმა, რომელმაც მაიკ მენიოს კარში პანენკა გაუშვა. ბევრს ეგონა, რომ ანგარიშის გათანაბრებით, მადრიდელები გამოიღვიძებდნენ, მაგრამ სრულიად საპირისპირო რამ მოხდა.
ალვარო მორატა - რაფაელ ლეაუს დუეტმა "შავ-წითლები" კვლავ წინ გაიყვანა. ვერ ვიტყვით იმასაც, რომ "სამეფო კლუბი" რაღაც განსაკუთრებულს აკეთებდა მე-2 ტაიმში, ისევ პირიქით: 73-ე წუთზე "ეშმაკებმა" გაიტანეს მე-3 ბურთი, რითაც საბოლოო წერტილი დასვეს. პორტუგალიელი ვინგერის გარღვევა ტიჯი რეინდერსმა დააგვირგვინა.
შეხვედრის მიწურულს "ბლანკოსმა" მაინც გაიტანა, რითაც შექმნა ქამბექის ილუზია, თუმცა გოლი თამაშგარეს გამო გაუქმდა. ყველაფერი საბოლოოდ დასრულდა ანგარიშით 3:1, სტუმრების სასარგებლოდ. ბრავო სან სიროს ბინადრებს, ანჩელოტის გუნდმა კი კრიზისში ყოფნის კიდევ ერთი სიგნალი გამოსცა.
გალაქტიკოს პრობლემები
სეზონის დაწყებიდან დღემდე, იტალიელი მწვრთნელი მუდმივად ცვლის ტაქტიკას და კონკრეტული ფეხბურთელებისთვის ცდილობს ახალი როლის პოვნას, მაგრამ უშედეგოდ. კარლოს ექსპერიმენტებისგან ყველაზე მეტად ზარალდება ჯუდ ბელინგემი, რომელიც შარშანდელ სეზონთან შედარებით, წელს, სულ სხვა მოთამაშეა.
სანტიაგო ბერნაბეუზე მომუშავე მწვრთნელი ტონი კროოსის გარეშე თავისი გუნდის ნახევარდაცვას არ ენდობა. ლეგენდარული ნახევარმცველის არყოფნაში, 65 წლის სპეციალისტი ცდილობს მაღალი პრესინგის დანერგვას, მაგრამ ამით, რეალის პრობლემები არ გვარდება. გუნდს აკლია ორგანიზება, შუახაზელები არიან ბურთს მოწყვეტილები და უწევთ ორმაგი დატვირთვით მუშაობა.
პაულუ ფონსეკას გუნდმა მადრიდელების პრობლემები სააშკარავოზე გამოაჩინა. რას ვხედავთ სეზონის დაწყებიდან სამი თვის შემდეგ? მბაპე - ვინისიუსი - ბელინგემი ერთად, არ მუშაობს. აღნიშნული ტრიო არის ზედმეტად ვარსკვლავური და ინდივიდუალური, ისე რომ მისი ერთ სქემის ქვეშ მოქცევა ანჩელოტისთვისაც კი რთულ მისიას წარმოადგენს.
იტალიელი მწვრთნელისთვის პრიორიტეტი არის გერმანელი ნახევარმცველის წასვლით გამოწვეული სიცარიელის ამოვსება, თუმცა ფაქტია, რომ ჯუდი ამ საქმისთვის შესაფერისი კანდიდატი არ არის. რაც შეეხებათ ფრანგ და ბრაზილიელ წინახაზელებს, ორივესთვის იდეალური პოზიცია არის შეტევის მარცხენა ფლანგი, მაგრამ არა ცენტრი.
შეადარეთ დღევანდელი "სამეფო კლუბი" შარშანდელს, როდესაც ყველა თავის ადგილზე იდგა - განსხვავება თვალშისაცემია. ჩემპიონთა ლიგის მოქმედი ტრიუმფატორის შემდეგი მეტოქე იქნება ლივერპული, მეტოქე, რომელსაც მილანზე უფრო ეფექტურად შეუძლია "ბლანკოსის" სუსტი მხარეების ღიად გამოტანა.
წარსულის ამოძახილი
ეს არ არის პირველი შემთხვევა, როდესაც სანტიაგო ბერნაბეუს ბინადრები ზედმეტი ვარსკვლავურობისგან ზარალდებიან. "გალაქტიკოს" პირველი თაობის დასასრულის დასაწყისად ითვლება დევიდ ბექჰემის ტრანსფერი, როდესაც ფლანგელი ნახევარმცველის ჩამშლელად ტრანსფორმირება სცადეს. ამ ექსპერიმენტმა არ გაამართლა.
ინგლისელი ნახევარმცველის ადგილას კარლოს კეირუშს ჰყავდა ლუიშ ფიგუ, რის გამოც ვარსკვლავური ახალწვეული ლონდონის ჩელსიში წასულ კლოდ მაკელელეს ნაცვლად გაამწესეს. "გალაქტიკოს" შემდეგ თაობაში ჩაიკარგა უკვე რიკი კაკა, რომელიც მისთვის უჩვეულო 4-3-3-ს ვერ შეეწყო. მსოფლიოს საუკეთესო მოთამაშე "როსონერიში" სულ სხვა ფუნქციებით იყო დატვირთული.
ბრაზილიელი შემტევი ნახევარმცველი იდეალურად გრძნობდა თავს 4-4-2-ში, ორი თავდამსხმელის უკან, რეალში კი ის სიღრმეში ჩამოწიეს. ის, რაც არ გამოუვიდა "შავ-წითლების" ყოფილ გამთამაშებელს, მადრიდში მესუთ იოზილმა და ლუკა მოდრიჩმა შეძლეს. საინტერესოა ის, რომ "გალაქტიკოს" 3-ვე თაობამ სხვადასხვა დროს სწორედ "ეშმაკებთან" წააგო.
სან სიროს ბინადრებს დაუმარცხებიათ როგორც ზინედინ ზიდანისა და რონალდო ნაზარიოს "სამეფო კლუბი", ისე კრიშტიანუ რონალდუსა და კარიმ ბენზემას გუნდიც, წუხელ კი მათ კილიან მბაპე და ვინი ჟუნიორიც ემსხვერპლნენ. ერთი სიტყვით, "ბლანკოსში" ყველაფერი არც ისე ზღაპრულად არის, როგორც სეზონის დაწყების წინ ჩანდა.
