რიკარდო კაკა - მანჩესტერ იუნაიტედი 3:2 მილანი (24/04/2007)
უკანასკნელი ფეხბურთელი, რომელმაც ლიონელ მესისა და კრიშტიანუ რონალდუს ეპოქის დაწყებამდე მოიპოვა ოქროს ბურთი და აღნიშნული შეხვედრა მისი სავიზიტო ბარათია. მანჩესტერი შინაურ კედლებში ითვლებოდა ფავორიტად და ხსენებული მატჩი მოიგო კიდეც, მაგრამ კაკას დუბლი გამარჯვების ტოლფასი გამოდგა. საპასუხო თამაშში მილანმა იუნაიტედი 3:0 გაანადგურა.
ლუკას მოურა - აიაქსი 2:3 ტოტენჰემი (08/05/2019)
ჩემპიონთა ლიგის ნახევარფინალი, რომელშიც ტოტენჰემი განმეორებითი შეხვედრის 55-ე წუთამდე განწირული ჩანდა. ინგლისურ გუნდს დარჩენილ დროში აიაქსის კარში სჭირდებოდა 3 ბურთის გატანა და ეს მისია საკუთარ თავზე მოურამ აიღო. 55-59 წუთების შუალედში მან შეასრულა დუბლი, 96-ე წუთზე კი ლუკასმა ჰოტსპური ფინალში გაიყვანა.
ნეიმარ ჟუნიორი - ბარსელონა 6:1 პარის სენ-ჟერმენი (08/03/2017)
ფეხბურთის ისტორიაში ერთ-ერთი ყველაზე შთამბეჭდავი ქამბექი. ბარსელონას ჩემპიონთა ლიგის პირველ მერვედფინალურ შეხვედრაში პარის სენ-ჟერმენთან 0:4 განადგურდა. კატალონია იყო სასწაულის მოლოდინში და ეს სასწაულიც შედგა, რომელიც ნეიმარის გარეშე პრაქტიკულად წარმოუდგენელი იქნებოდა. ჟუნიორმა იმ მატჩში გოლებისა და ასისტების დუბლი გაიფორმა.
ალეშანდრე პატო - რეალი 2:3 მილანი (21/10/2009)
გალაქტიკოსების ახალი ეპოქის დასაწყისი და 2000-იანების ლეგენდარული მილანის ჩასვენების პერიოდი. ფავორიტად მოიაზრებოდა რეალი, თუმცა "როსონერის" მოთამაშეებმა აჩვენეს, რომ საფეხბურთო სამყაროს გაოგნება ჯერ კიდევ შეეძლოთ. მატჩის მთავარი გმირი გამოდგა პატო, რომელმაც მადრიდელებს შეუსრულა დუბლი და 88-ე წუთზე გამარჯვების მომტანი ბურთიც გაიტანა.
რაფინია დიასი - ბარსელონა 4:1 ბაიერნი (23/10/2024)
იშვიათი ფეხბურთელი, რომელმაც ბაიერნს შეუსრულა ჰეთ-თრიკი ჩემპიონთა ლიგაზე და კიდევ უფრო იშვიათი ფეხბურთელი, რომელმაც მანუელ ნოიერს 3 ბურთი გაუტანა. რაფინიამ თავისი დაუვიწყარი პერფომანსით დაადუმა ყველა ის კრიტიკოსი, რომელიც მთელი ამ წლების მანძილზე ბარსასთან მიმართებაში მხოლოდ მიუნხენელებისგან განადგურებას იხსენებდა.
რივალდო ფერეირა - მილანი 3:3 ბარსელონა (18/10/2000)
რონალდინიოსა და მესის გამოჩენამდე, ბარსელონას მთავარი ვარსკვლავი ჩემპიონთა ლიგაზე რივალდო იყო. მის ანგარიშზე არის არაერთი დაუვიწყარი მატჩი, მაგრამ ყველაზე განსაკუთრებული მაინც ჰეთ-თრიკი მილანთან არის. ბორბამ მეტოქეს გაუტანა გაუტანა ზედიზედ 2 ჯარიმა, მე-3 ბურთი კი თავით შეაგდო.
როდრიგო გოესი - რეალი 3:1 მანჩესტერ სიტი (04/05/2022)
ჩემპიონთა ლიგის ნახევარფინალი, რომელშიც ფავორიტად სიტი იყო შერაცხული. პირველი შეხვედრა დასრულდა სწორედ ინგლისელთა გამარჯვებით და საპასუხო მატჩის 90-ე წუთამდე მინიმალური ანგარიშით ასევე მანჩესტერელები იგებდნენ. 68-ე წუთზე მოედანზე შემოდის როდრიგო, რომელიც 90-91 წუთების შუალედში "ქალაქელებს" დუბლს უსრულებს. საბოლოო წერტილი კი უკვე კარიმ ბენზემამ დასვა.
რონალდინიო გაუჩო - ჩელსი 4:2 ბარსელონა (08/03/2005)
მიუხედავად იმისა, რომ ბარსელონა დამარცხდა და მერვედფინალიდან გამოვარდა, რონალდინიოს ჩელსისთან პერფომანსი ჩემპიონთა ლიგის ისტორიაში ერთ-ერთი ყველაზე დასამახსოვრებელია. გაუჩომ ლონდონში შეასრულა დუბლი: ზუსტად დარტყმული 11-მეტრიანის შემდეგ, მან პეტრ ჩეხის კარში გაიტანა გოლი, რომელსაც თავისი ეფექტურობით ორი ათწლეულის შემდეგაც აღტაცებით იხსენებენ.
რონალდო ნაზარიო - მანჩესტერი 4:3 რეალი (23/04/2003)
რონალდოს საუკეთესო შეხვედრა ჩემპიონთა ლიგაზე. უმძიმესი ტრავმების შემდეგ, ის გახდა ჯერ მსოფლიო ჩემპიონატის ტრიუმფატორი, რეალში გადასვლის შემდეგ კი ნაზარიომ ევროპის ყველაზე პრესტიჟულ საკლუბო ტურნირზეც გაიბრწყინა. მსოფლიოს საუკეთესო მოთამაშესთან ვერაფერი გააწყო იუნაიტედის იმდროინდელმა გოლკიპერმა, ფაბიენ ბარტეზმა, რომელთანაც ბრაზილიელმა ფორვარდმა 5 წლით ადრე მუნდიალის ფინალი წააგო.
ვინისიუს ჟუნიორი - რეალი 5:2 დორტმუნდი (22/10/2024)
ოქროს ბურთის მოპოვების მთავარი კანდიდატი 2024 წელს, რომელმაც დორტმუნდთთან შეხვედრაში თავისი კლასი კიდევ ერთხელ დაამტკიცა. პირველი ტაიმის შემდეგ, რეალი სენსაციურად აგებდა 0:2-ს, მაგრამ მეორე ნახევარში დაიწყო ვინის შოუ, ბორუსიას უკანახაზელები მის წინააღმდეგ უბრალოდ უძლურები აღმოჩნდნენ.
ასევე გამოსარჩევია: ადრიანო ლეიტე რიბეირო, რობერტო ფირმინო, მარიო ჟარდელი, ჟუნინიო პერნამბუკანო, ლუის ადრიანო, ოსკარ დოს სანტოსი.
