ხვიჩა კვარაცხელია ჩემპიონთა ლიგის მერვედფინალში ლონდონის ჩელსის ნამდვილ კატასტროფად მოევლინა. პარის სენ-ჟერმენმა ორი შეხვედრის ჯამში მოიგო 8:2, ქართველმა ვინგერმა კი შეაგდო 3 ბურთი და ასისტიც მიითვალა. მის გარდა, კიდევ რომელი მოთამაშეები ესიზმრებათ "არისტოკრატთა" ფანებს ღამის კოშმარებში? პასუხი ქვემოთ არის.
ქარიმ ბენზემა - 6 მატჩი, 6 გოლი
დავიწყოთ ჩელსის მთავარი გამანადგურებლით ჩემპიონთა ლიგაზე - ბენზემათი, ვინც ექვს მატჩში ექვსი გოლი გაიტანა. მადრიდის რეალი ლონდონელებს პლეიოფში შეხვდა ზედიზედ 3-ჯერ, 2021-2023 წლებში და თითქმის ყველა შემთხვევაში მთავარ როლში სწორედ ფრანგი ფორვარდი იყო.
ქარიმმა "არისტოკრატებს" პირველად გაუტანა ჩემპიონთა ლიგის 2020/2021 წლების სეზონის ნახევარფინალში, თუმცა მისი გოლი საკმარისი არ გამოდგა: "სამეფო კლუბმა" 2 შეხვედრის ჯამში წააგო 1:3, მაგრამ შემდეგ, შედგა რევანში, თანაც 2-ჯერ. 1/2 ფინალში გამოვარდნიდან 1 წლის მერე, კარლო ანჩელოტის გუნდის კაპიტანმა სტემფორდ ბრიჯზე 3 ბურთი შეაგდო.
ტომას ტუხელის შეგირდები საპასუხო მატჩში ახლოს იყვნენ თამაშის შემობრუნებასთან, თუმცა ჩემპიონთა ლიგის იმ დროისთვის მოქმედ ტრიუმფატორთა იმედები ისევ და ისევ სანტიაგო ბერნაბეუს ბინადრების მე-9 ნომერმა დაასამარა. ვეტერანმა ფორვარდმა ჩელსის შეუგდო 1 წლის მერეც, როცა რეალმა 1/4 ფინალში 2 შეხვედრის ჯამში 4:0 მოიგო.
ედინსონ კავანი - 8 მატჩი, 3 გოლი, 2 ასისტი
ჩემპიონთა ლიგის 2011/2012 წლების სეზონის გამარჯვებული გახდა სწორედ ჩელსი, თუმცა ნაპოლის წინააღმდეგ გამართული პირველი მერვედფინალური შეხვედრის შემდეგ, ეს რთულად წარმოსადგენი იყო. "პარტენოპეიმ" პირწმინდად დაჩაგრა ლონდონელები (3:1), კავანიმ კი პეტრ ჩეხის კარის აღების გარდა, 2 ასისტიც მიითვალა.
ამ მატჩს შეეწირა ანდრე ვილაშ-ბოაშის სამწვრთნელო კარიერა "არისტოკრატებში" და განმეორებით დაპირისპირებაზე ჩემპიონთა ლიგის მომავალი ტრიუმფატორები უკვე რობერტო დი მატეოს ხელმძღვანელობით გამოვიდნენ. ბრიჯის ბინადრებმა შეძლეს ქამბექის მოხდენა (4:1), ურუგვაელი ფორვარდის პერფომანსი კი ჩრდილში მოექცა.
წლების შემდეგ, ედინსონმა მოახერხა ჩელსის წინააღმდეგ რევანშის აღება, თანაც ორჯერ, თუმცა უკვე არა "აძურის", არამედ პარის სენ-ჟერმენის ფორვარდის რანგში. პსჟ-ს შემტევმა ლონდონელებს შეუგდო 2014/15-ის 1/8 ფინალში და 1 წლის შემდეგაც, თანაც შეცვლაზე შემოსვლიდან 4 წუთში.
სამუელ ეტო'ო - 8 მატჩი, 3 გოლი, 2 ასისტი
ჩემპიონთა ლიგაზე ჩელსის გამანადგურებლებს შორის ერთადერთი, ვინც კარიერის მიწურულს ლურჯი მაისური თავადაც მოირგო. რა ხდებოდა იქამდე? ეტო'ო პერიოდულად იღებდა ლონდონელთა კარს და ევროპის მთავარი საკლუბო ტურნირის პლეიოფში მათ წარუმატებლობებში მნიშვნელოვან როლს თამაშობდა.
ჩემპიონთა ლიგის 2004/2005 წლების სეზონის მერვედფინალში კამერუნელმა თავდამსხმელმა "არისტოკრატების" წინააღმდეგ თავის ანგარიშზე ჩაიწერა გატანილ ბურთს+ასისტი, 1 წლის შემდეგ კი მან ბარსელონასთვის მოგების მომტანი ბურთი შეაგდო. სემმა ბრიჯის ბინადრების დამწუხრება გააგრძელა მომავალშიც, უკვე მილანის ინტერის მაისურით.
ტრებლისკენ მიმავალ გზაზე "ნერაძურის" თავდამსხმელმა ანჩელოტის გუნდის წინააღმდეგ გამართულ პირველ მატჩში გაიფორმა საგოლე პასი, საპასუხო შეხვედრაში კი ყველაფერი სწორედ მისმა შეგდებულმა ბურთმა გადაწყვიტა. ცნობისთვის, კამერუნის ეროვნული გუნდის ლეგენდარულმა მე-9 ნომერმა ჩელსის კარი აიღო ევერტონში თამაშის დროსაც, მაგრამ ეს უკვე სულ სხვა ისტორიაა.
ხვიჩა კვარაცხელია - 2 მატჩი, 3 გოლი, 1 ასისტი
ჩელსის გამანადგურებლებს შორის ყველაზე ახალი, ვისაც სამი გოლისა და საგოლე გადაცემის გაფორმებისთვის სულ რაღაც ორი მატჩი დასჭირდა. გავიხსენოთ კვარას ტოპ პერფომანსი დეტალურად: ლონდონელთათვის არაფერი ჩანდა უბედურების მომასწავებელი, 74-ე წუთამდე იყო 2:2, რაც საკლუბო მუნდიალის ჩემპიონებს გარკვეულ უპირატესობასაც აძლევდა.
ქართველი შემტევი მინდორზე გამოჩნდა 62-ე წუთზე და დარჩენილ დროში მან სამი შედეგიანი მოქმედებით ანგარიში დამანგრეველი გახადა. "არისტოკრატებს" 1/4 ფინალში გასვლისთვის სჭირდებოდათ მინიმუმ 3 ბურთის შეგდება, მაგრამ მოხდა სრულიად საპირისპირო რამ: 3 გოლი პსჟ-მ გაიტანა.
სტემფორდ ბრიჯის ბინადრების დარბევა დაიწყო ისევ და ისევ ხვიჩამ, მოგვიანებით კი მისი საქმე "ლურჯ-წითლების" სხვა ფეხბურთელებმაც გააგრძელეს. ლუის ენრიკეს გუნდმა ლიამ როსენიორის შეგირდები ჯამში გაანადგურა 8:2, ყველაზე შედეგიანი მოთამაშე კი საქართველოს ეროვნული გუნდის ლიდერი აღმოჩნდა.
ეზეკილ ლავეცი - 6 მატჩი, 3 გოლი, 1 ასისტი
ლავეციმ ჩელსის წინააღმდეგ გაიარა დაახლოებით იგივე გზა, რაც კავანიმ, ნაპოლიდან - პარის სენ-ჟერმენამდე. დავუბრუნდეთ უკვე ხსენებულ 3:1-ს "პარტენოპეის" სასარგებლოდ, რომელშიც არგენტინელმა ვინგერმა ლონდონელთა კარი აიღო 2-ჯერ, მაგრამ 1/4 ფინალში გასვლისთვის ეს საკმარისი არ გამოდგა (3:1, 1:4).
ორი წლის შემდეგ, უკვე პსჟ-ში თამაშის დროს, ეზეკილმა გაიფორმა გოლს პლიუს საგოლე გადაცემა, თუმცა გასვლით მატჩში გატანილი ბურთის ხარჯზე წინ კვლავ "არისტოკრატები" გავლენ (3:1, 0:2). "ლურჯ-წითლების" ვინგერი მაინც მოესწრო თავისი ყველაზე პრინციპული მოწინააღმდეგის წაგებას, 1 წლის შემდეგ, 2014/15-ის 1/8 ფინალში.
საშინაო მატჩში დაფიქსირებული ფრის, ანგარიშით 1:1-ის შემდეგ, ლორან ბლანის გუნდი განმეორებით დაპირისპირებაში 86-ე წუთამდე იყო წაგებულის ამპლუაში, მაგრამ "პოჩოს" ასისტითა და დავიდ ლუიზის ზუსტი თავურის შემდეგ, შეხვედრა გადავიდა ოვერტაიმში, რომელშიც სტუმრად გატანილი ბურთების პრინციპს ამჯერად ჟოზე მოურინიოს შეგირდები შეეწირნენ (2:2).
რობერტ ლევანდოვსკი - 3 მატჩი, 3 გოლი, 4 ასისტი
ვისაც აღარ ახსოვს, თუ როგორია ლევანდოვსკის 2020 წლის "საოქროსბურთე" ვერსია, ერთ-ერთი შეხსენება იმალება ჩელსის წინააღმდეგ გამართულ 1/8 ფინალურ დუელში, რომელშიც მიუნხენის ბაიერნმა მოწინააღმდეგე 2 შეხვედრის ჯამში 7:1 გაანადგურა. პირველ თამაშში პოლონელმა ფორვარდმა 2 ასისტი გააკეთა სერჟ გნაბრიზე, ბოლოს კი თავადაც შეაგდო.
რაც შეეხება განმეორებით მატჩს, რობერტმა გოლებისა და საგოლე გადაცემების დუბლი გაიფორმა. თავდაპირველად მან ზუსტად შეასრულა თავისივე გამომუშავებული 11-მეტრიანი, შემდეგ იყო ასისტები ივან პერიშიჩსა და კორენტინ ტოლისოზე, ბოლოს კი საფირმო თავური. "რეკორდმაისტერის" მე-9 ნომერმა ლონდონელებს პერსონალურად მოუგო.
ჰანსი ფლიკის გუნდმა "არისტოკრატების" კარი აიღო შვიდჯერ, ლევანდოვსკიმ კი მონაწილეობა მიიღო აბსოლუტურად ყველა გოლში, რაც სრული სიგიჟეა. პოლონელი ფორვარდის სტატისტიკა ცოტათი შეილახა მიმდინარე სეზონში, როცა ბრიჯის ბინადრებმა 3:0 გაანადგურეს ბარსა, ვეტერანმა შემტევმა კი მოედანი უგოლოდ დატოვა.
ლიონელ მესი - 10 მატჩი, 3 გოლი, 3 ასისტი
მესის სხვებზე დიდი დრო დასჭირდა ჩელსის გამანადგურებლის სტატუსის მოსაპოვებლად. პირველ ხუთ მატჩში ის მოედანს შედეგიანი ქმედებების გარეშე ტოვებდა. 2008/09-ის 1/2 ფინალში არგენტინელმა ფლეიმეიქერმა გააკეთა პირველი ასისტი, სწორედ ის, ანდრეს ინიესტაზე, ლონდონში ჩატარებულ სკანდალურ შეხვედრაში.
გადის სამი წელი - ჩემპიონთა ლიგის მორიგი ნახევარფინალი და კიდევ ერთი საგოლე გადაცემა ესპანელ ნახევარმცველზე, თუმცა ფინალში გასვლისთვის ბარსას ეს ყველაფერი ამჯერად არ ეყო. "არისტოკრატებმა" დააქამბექეს 0:2-დან, ლეომ კი 11-მეტრიანი ვერ გამოიყენა. ის პენალტი რომ გასულიყო, კატალონიელთა სასარგებლოდ გახდებოდა 3:0, წინ კი 45 წუთზე ნაკლები დრო რჩებოდა.
"ბლაუგრანას" შემტევისთვის სტემფორდ ბრიჯის ბინადრებთან დაპირისპირებები იყო ქცეული ნამდვილ კოშმარად, თუმცა ჩემპიონთა ლიგის 2017/18-ის 1/8 ფინალში საფეხბურთო სამყარომ მისი ბენეფისი მაინც იხილა. "ლა პულგამ" 2-რაუნდიან დუელში ანტონიო კონტეს გუნდის კარი აიღო 3-ჯერ და 1 ასისტიც ჩაიწერა.
ეს იყო პირველი დაპირისპირებები, სადაც კამპ ნოუს ბინადრების ათიანმა ჩელსის კარში გოლის გატანა მოახერხა. ლეგენდარული ფლეიმეიქერი აღნიშნულ მომენტს 12 წლისა (2006-2018) და 8 შეხვედრის მანძილზე ელოდებოდა. როგორც ვხედავთ, ლონდონელები მესის რისხვას მე-9 ცდაზე ვეღარ გადაურჩნენ.
ფერნანდო მორიენტესი - 6 მატჩი, 3 გოლი, 1 ასისტი
თავდამსხმელი, რომელმაც რვა წლით გადაავადა ჩელსისთვის განკუთვნილი ისტორიული მომენტი - ჩემპიონთა ლიგის ფინალში გასვლა. სეზონის მთავარ მოვლენამდე ერთ ნაბიჯში ლონდონელები იყვნენ 2003/04-ში, მოწინააღმდეგე კი მონაკო იყო. პირველ 1/2 ფინალურ შეხვედრაში, რომელშიც "არისტოკრატებმა" წააგეს 1:3, მორომ 1 ბურთი შეაგდო.
განმეორებითი მატჩი წარიმართა საოცრად დრამატული სცენარით - კლაუდიო რანიერის შეგირდები იმარჯვებდნენ ანგარიშით 2:0-ს და ფინალამდე მათ 45 წუთი აშორებდათ. როგორც აღვნიშნეთ, ბრიჯის ბინადრების ოცნებები დაამსხვრია ესპანელმა ფორვარდმა, რომელმაც ჯერ ასისტი გაუკეთა უგო იბარას, შემდეგ კი მან თავადაც შეაგდო.
ჩელსიმ ფინალში გამსვლელი უპირატესობა დაკარგა სულ რაღაც 15 წუთში და ამ ყველაფერში "დამნაშავე" სწორედ ფერნანდო იყო. სამი წლის შემდეგ, ესპანეთის ეროვნული გუნდის ფორვარდმა ლონდონელთა კარი აიღო კიდევ ერთხელ, ამჯერად უკვე ვალენსიას მაისურით, მაგრამ 1/2 ფინალში გასვლისთვის ეს საკმარისი არ გამოდგა.
როდრიგო გოესი - 5 მატჩი, 3 გოლი
ჩელსის მთავარი ღამის კოშმარი რეალიდან, რა თქმა უნდა, ბენზემას შემდეგ. ჩემპიონთა ლიგის უკვე ხსენებულ 2021/2022 წლების სეზონის მეოთხედფინალში, რომელშიც ფრანგი ფორვარდის 3 ბურთს ლონდონელებმა ასევე უპასუხეს 3 გოლით, მადრიდელთა ქამბექი სწორედ როდრიგოს მოედანზე შემოსვლით დაიწყო.
ბრაზილიელი თავდამსხმელი მინდორზე გამოჩნდა 78-ე წუთზე და ზუსტად ორ წუთში მან "არისტოკრატებს" გოლი გაუტანა. იმ დაპირისპირებაში საბოლოო წერტილი დასვა ქარიმმა, მაგრამ 1 წლის შემდეგ, ფრენკ ლამპარდის გუნდს მთავარ დამსჯელად უკვე გოესი მოევლინა.
ჩემპიონთა ლიგის 2022/2023 წლების სეზონის მეოთხედფინალის პირველ მატჩში "სამეფო კლუბმა" ანგარიშით 2:0 იმარჯვა. იგივე შედეგი დაფიქსირდა ბრიჯზეც და ორივე ბურთი სწორედ ბრაზილიის ეროვნული გუნდის ფორვარდმა შეაგდო. ახალგაზრდა შემტევმა ამჯერად ძირითადიდან დაიწყო თამაში და დუბლის შესასრულებლად მას 80 წუთი დასჭირდა.
რონალდინიო გაუჩო - 6 მატჩი, 3 გოლი, 2 ასისტი
ჩელსის ღამის კოშმარის ყველაზე ლამაზი დასასრული. რონალდინიოს გატანილი აქვს არაერთი ეპოქალური გოლი და აქედან ორი მან ლონდონელთა კარში შეაგდო. 2004/05-ის 1/8 ფინალი: ბარსა ნადგურდება 0:3, მაგრამ მოგვიანებით, ბრაზილიელი ფლეიმეიქერი ჯერ ზუსტად ასრულებს 11-მეტრიანს, შემდეგ კი ჩვეულ სტილში, რამდენიმე მატყუარა მოძრაობით ბურთს ბადეში ახვევს.
გაუჩომ დადგა ნამდვილი შოუ, თუმცა მატჩის მიწურულს "არისტოკრატებმა" ძალიან საეჭვო ვითარებაში გაიტანეს მეოთხე გოლი და კატალონიელთა ევროსეზონი ნაადრევად დაასრულეს. 1 წლის შემდეგ, მოურინიოს გუნდზე შური პერსონალურად ბრაზილიის ეროვნული გუნდის ფლეიმეიქერმა იძია.
კამპ ნოუს ბინადრების ათიანმა პირველ მატჩში ჯერ ჯონ ტერის გაატანინა ავტოგოლი, განმეორებითში კი ჩელსის ერთბაშად ხუთ ფეხბურთელს შორის მოქცეულმა ჩეხის კარი მაინც აიღო. "ჯადოქარმა" ლონდონელებთან შედეგიანი ქმედება განახორციელა მომდევნო სეზონშიც, ეიდურ გუდიონსენზე ასისტით.
