დორტმუნდი-ბენფიკა 5:0 (ჩემპიონთა თასის პირველი რაუნდი, 1963/1964)
ბენფიკა იმ დროს ევროპის ერთ-ერთი ყველაზე ძლიერი გუნდი იყო, თუმცა დორტმუნდმა პორტუგალიელები უშანსოდ დატოვა. პირველი შეხვედრა დასრულდა ლისაბონელთა მოგებით (2:1), მაგრამ საპასუხო მატჩში სრული დაუნდობლობა ვიხილეთ - 5:0 ბორუსიას სასარგებლოდ. გერმანულმა კლუბმა მოგვიანებით 1/2 ფინალში მილანის ინტერთან წააგო.
მანჩესტერი-დორტმუნდი 0:1 (ჩემპიონთა ლიგის 1/2 ფინალი, 1996/1997)
ჩემპიონთა ლიგის ფინალამდე მიმავალ გზაზე დორტმუნდმა ნახევარფინალში გადალახა მანჩესტერის ბარიერი, რომელიც ორივე შეხვედრაში დაამარცხა. სახლში ბორუსიელებმა რენე ტრეტშოკის ბურთით მოიგეს, სტუმრად კი, მე-8 წუთზე, ლარს რიკენმა მომავალი ჩემპიონების სხვაობა 2 გოლამდე გაზარდა.
დორტმუნდი-იუვენტუსი 3:1 (ჩემპიონთა ლიგის ფინალი, 1996/1997)
დორტმუნდის პირველი და ჯერჯერობით ერთადერთი ტრიუმფი ჩემპიონთა ლიგაზე. ფინალში მათ დაამარცხეს მოქმედი გამარჯვებული, იუვენტუსი, რომელსაც ბორუსიამ 3:1 მოუგო. რიდლეს დუბლი, რიკენის შედევრი და ევროპის ყველაზე პრესტიჟული საკლუბო ტურნირის თასი გერმანელებმა წაიღეს სახლში.
დორტმუნდი-ბაიერნი 1:0 (ჩემპიონთა ლიგის 1/4 ფინალი, 1997/1998)
დორტმუნდის წარმატებული სერია მომდევნო სეზონშიც გაგრძელდა, მათ მეოთხედფინალში ბაიერნი დაამარცხეს. უგოლო 180 წუთის შემდეგ, დაინიშნა დამატებითი დრო, რომლის 109-ე წუთზე შტეფან შაფუიზამ ბორუსიას მოაგებინა. მოქმედი ჩემპიონების ზღაპარი დასრულდა მომავალ ტრიუმფატორთან, მადრიდის რეალთან, რომელთანაც 1/2 ფინალში წააგეს.
დორტმუნდი-მალაგა 3:2 (ჩემპიონთა ლიგის 1/4 ფინალი, 2012/2013)
კლასიკად ქცეული დაპირისპირება, რომელშიც ყველაფერი განმეორებითი შეხვედრის ბოლო წუთებზე გადაწყდა. დორტმუნდი 91-ე წუთამდე მარცხდებოდა ანგარიშით 1:2, მაგრამ მარკო როისისა და ფელიპე სანტანას ბურთებით წინ მაინც გერმანელები გავიდნენ. აღნიშნულ მატჩს ხშირად იხილავთ სხვადასხვა რეიტენგებსა და ტოპ შეხვედრების ჩამონათვალში.
დორტმუნდი-რეალი 4:1 (ჩემპიონთა ლიგის 1/2 ფინალი, 2012/2013)
რობერტ ლევანდოვსკის ბენეფისი და ჟოზე მოურინიოს მადრიდული კარიერის დასასრული. იმ დროს ესპანური გრანდი გამოკვეთილ ფავორიტად მიიჩნეოდა, მაგრამ პოლონელი ფორვარდის პოკერმა მთელი საფეხბურთო სამყარო პირდაღებული დატოვა. ბორუსიამ წარმატებით გადალახა რეალის ბარიერი და ფინალში გავიდა.
დორტმუნდი-ბაიერნი 1:2 (ჩემპიონთა ლიგის ფინალი, 2012/2013)
მართალია, დორტმუნდი დამარცხდა, თუმცა ჩემპიონთა ლიგის ფინალში გასვლა ამ გუნდის ისტორიის უმნიშვნელოვანესი ნაწილია. რაც შეეხება შეხვედრის მიმდინარეობას, 89-ე წუთამდე 1:1 ფიქსირდებოდა, მაგრამ საბოლოო წერტილი არიენ რობენმა დასვა. არსებობს მოსაზრება, რომ იმ სეზონის ფორმაციის ბორუსია იურგენ კლოპის საუკეთესო ქმნილებაა.
მილანი-დორტმუნდი 1:3 (ჩემპიონთა ლიგის ჯგუფური ეტაპი, 2023/2024)
დორტმუნდის სეზონი ჩემპიონთა ლიგაზე დაიწყო ე.წ. "სიკვდილის" ჯგუფით, რომელშიც გერმანელების გარდა განთესილები იყვნენ პარის-სენ ჟერმენი, მილანი და ნიუკასლი. ბორუსიამ წარმატებით გადალახა ჯგუფური ეტაპი, იტალიაში მოგება იყო ერთგვარი ილუსტრაცია იმისა, რომ ამ გუნდს ნებისმიერი მეტოქის დამარცხება შეეძლო.
დორტმუნდი-ატლეტიკო 4:2 (ჩემპიონთა ლიგის 1/4 ფინალი, 2023/2024)
პირველი შეხვედრა დასრულდა ატლეტიკოს გამარჯვებით (2:1), მეორე თამაშში კი დორტმუნდი წარმატებით დაბრუნდა. 72-ე წუთისთვის ანგარიში იყო 2:2, რაც 1/2 ფინალში გასვლის გზას უხსნიდა მადრიდელებს, მაგრამ ნიკლას ფულკრუგის და მარსელ საბიცერის ბურთებით, წინ ბორუსიელები გავიდნენ.
პსჟ-დორტმუნდი 0:1 (ჩემპიონთა ლიგის 1/2 ფინალი, 2023/2024)
ჩემპიონთა ლიგის ნახევარფინალში დორტმუნდის მოწინააღმდეგე იყო გუნდი განვლილი "სიკვდილის ჯგუფიდან" - პარის სენ-ჟერმენი. ფავორიტად მოიაზრებოდა პსჟ, მაგრამ ბორუსიამ მასზე ვარსკვლავური შემადგენლობით დაკომპლექტებული მეტოქე უბრალოდ უშანსოდ დატოვა. ცალკე გამოსარჩევია მატს ჰუმელსის ინდივიდუალური პერფომანსი. უდავოდ, ამ დაპირისპირების მთავარი გმირი სწორედ ის იყო.
