ამის გარდა, ლა ლიგის სატურნირო ცხრილში ისინი მეზობლად არიან - 27 ქულით პირველ ადგილზე არის "ბლაუგრანა", 24 ქულით მეორე ადგილზე კი "ბლანკოსი". ორივე კლუბის წარმატების საიდუმლო სპეციალისტებშია: კარლო ანჩელოტისა და ჰანსი ფლიკში. განვიხილოთ, თუ რას გვიმზადებენ იტალიელი და გერმანელი დამრიგებლები.
ანჩელოტის ახალი თაობის გალაქტიკოსები
რა შეიძლება ითქვას კარლოს გუნდის შესახებ? ახალგაზრდა ვარსკვლავებით სავსე ჩემპიონთა ლიგის მოქმედი გამარჯვებული, რომლის რიგებში თამაშობს ოქროს ბურთის ნომერ პირველი პრეტენდენტი: ვინი ჟუნიორი. მას დავუტამოთ კილიან მბაპე, ფედე ვალვერდე, ჯუდ ბელინგემი, როდრიგო გოესი და სხვები.
ერთი სიტყვით, სრულფასოვანი "ელ გალაქტიკო", ვერსია 3.0. აღსანიშნავია, რომ სეზონის დაწყების წინ, სანტიაგო ბერნაბეუზე რამდენიმე ტაქტიკური გადანაცვლების გაკეთება გახდა საჭირო. ახალი სეზონის მთავარი მოვლენა უპირველეს ყოვლისა არის მბაპეს ტრანსფერი და რეალის დამრიგებლის ამოცანას გუნდში მის წარმატებით ინტეგრირება წარმოადგენს.
ფრანგი თავდამსხმელის თამაშში შეინიშნება როგორც დადებითი, ისე უარყოფითი მხარეები. კარგი ის არის, რომ ახალ გუნდში გადასვლით, შედეგიანობა მას არ დაუკარგავს. კილიანმა მადრიდში მოასწრო 13 მატჩის ჩატარება, რომელშიც 8 ბურთი გაიტანა. ამის გარდა, მის კლასს, ოსტატურობასა და სისწრაფეს "სამეფო კლუბი" ახალ საფეხურზე აჰყავს.
რაც შეეხება უარყოფით მხარეებს, "ბლანკოსის" თავდამსხმელი გუნდში ჯერ არ არის ისეთი გამოკვეთილი ფიგურა, როგორსაც მას საფრანგეთის ნაკრებსა და პარის სენ-ჟერმენში ვხედავდით. ანჩელოტის გუნდის 9-იანი საკუთარი თამაშის ძიებაშია, ხშირ შემთხვევაში კი თავისი ბრაზილიელი მეწყვილის ჩრდილში იმყოფება.
"დონატელოს" სანტიაგო ბერნაბეუზე ადგილის დასამკვიდრებლად სჭირდება დიდ შეხვედრებში თავის გამოჩენა და ელ კლასიკო ამის ყველაზე კარგი საშუალებაა. რეალის კიდევ ერთი თავსატეხი არის ტონი კროოსის წასვლით გამოწვეული სიცარიელის ამოვსება. იტალიელმა სპეციალისტმა საამისოდ ჯუდ ბელინგემიც კი ჩამოწია სიღრმეში.
ინგლისელი ნახევარმცველი მიმდინარე სეზონში კონცენტრირებულია ბურთის განაწილებასა და შეტევის გაშლაზე, სწორედ ამიტომ არ არის ის ისეთი შედეგიანი, როგორიც წინა წელს. მადრიდელთა გარშემო ტრიალებს ბევრი კითხვა, პირველ რიგში ის, შეძლებს თუ არა კარლო ბალანსის პოვნას. ყველა კითხვას პასუხი 26 ოქტომბერს გაეცემა.
ფლიკის გერმანული გამანადგურებლის ნაწილებით აწყობილი კატალონიური მანქანა
კამპ ნოუზე უკვე ძალიან დიდი ხანია ცდილობენ ისეთი მწვრთნელის პოვნას, რომელიც გუნდისთვის ახალი პეპ გუარდიოლა იქნება, თუმცა უშედეგოდ. ბარსა პერიოდულად აძლევდა შანსს კლუბის ყოფილ მოთამაშეებსა და აკადემიის აღზრდილებს, მაგრამ სეზონის დაწყების წინ, მიდგომა შეიცვალა: გუნდში მოვიდა სპეციალისტი, რომელიც კატალონიელებთან მხოლოდ მეტოქის რანგში თუ იკვეთებოდა.
"ბლაუგრანაში" დაინერგა ისეთი რამ, რაც აქამდე არასდროს ყოფილა. ფლიკმაც ანალოგიურად სრულიად ახალი გამოწვევა მიიღო. გერმანელ მწვრთნელებს "ლურჯ-ბროწეულისფრებში" აქამდეც უმუშავიათ, მაგრამ წარუმატებლად: 1975-1976 წლებში ჰენეს ვაისვაილერი, 1981-1983 წლებში კი უდო ლატეკი. 41 წლის შემდეგ, კამპ ნოუზე კიდევ ერთი გერმანელი მოვიდა.
რა შეიცვალა ბარსელონაში ჰანს-დიტერის დანიშნვის შემდეგ? წარსულს ჩაბარდა ტიკი-ტაკა და ყველაფერი ის, რაც ამ ტერმინთან მიახლოებული იყო. კატალონიელთა სპეციალისტმა აქცენტი გააკეთა უბრალო კონცეფციასა და ინტენსიურ ფიზიკურ მუშაობაზე. ფეხბურთელებს ეძლევათ სრული თავისუფლება და გადაწყვეტილებების დამოუკიდებლად მიღების საშუალება.
59 წლის მწვრთნელის "ბლაუგრანა" არის შემტევი, აგრესიული და უშიშარი - ეს "რეკორდმაისტერთან" შეხვედრაშიც გამოჩნდა. ლა ლიგაში ჩატარებული 10 ტურის შემდეგ, "ლურჯ-ბროწეულისფრების" ანგარიშზე 27 ქულა, 9 მოგება, 33 გატანილი ბურთია და მხოლოდ 10 გაშვებული. ფლიკის ხელში თამაშის ჩვეულ სტილს რობერტ ლევანდოვსკიც დაუბრუნდა.
პოლონელმა თავდამსხმელმა ბავარიაში გერმანელ მწვრთნელთან მუშაობის დროს 71 შეხვედრაში გაიტანა 83 გოლი, დღეს მათი ერთობლივი ძალებით 84 მატჩში უკვე 98 ბურთია. შეიძლება ითქვას, რომ ჰანსის განკარგულებაშია მისი ყველაზე ლეტალური იარაღი, რომლისგანაც "სამეფო კლუბმა" 15 მატჩში 8 ბურთი გაუშვა.
