გალაქტიკოსების ჩრდილში მყოფი მადრიდის მუდამ მეორე გუნდი - როგორ ქმნის სიმეონე რეალის ანტიპოდს?

სანამ სანტიაგო ბერნაბეუს ბინადრები ბანაობენ წარმატებისა და სიდიადის სხივებში, იმავე ქალაქში გაძლიერებას ცდილობს გუნდი, რომელიც მთელი თავისი ისტორიის მანძილზე იმყოფება მათი ჩრდილის ქვეშ. საუბარი მადრიდის ატლეტიკოს შესახებ არის. ფაქტია, ეს გუნდი სატრანსფერო ბაზარზე დღიდან დღემდე გვაოცებს.

სანამ გადავალთ "როხიბლანკოს" უკვე შემდგარ და პოტენციურ შენაძენებზე, განვიხილოთ, თუ რატომ არის ეს გუნდი ესპანეთის დედაქალაქში მუდამ მეორე. ამის გარდა, განვიხილოთ, თუ როგორ გაუმწარა რეალმა სამწვრთნელო კარიერა "ინდიელთა" უცვლელ დამრიგებელს, დიეგო სიმეონეს, რომელიც უკვე 13 წელია, რაც გუნდს არ იცვლის.

უფროსი თანაქალაქელის ჩრდილში

ობიექტურად, "სამეფო კლუბი" მეტროპოლიტანოს ბინადრებს აღემატება ყველაფერში - ევროთასები, ლა ლიგა, ფეხბურთელების ხარისხი თუ სტატუსი, ურთიერთმატჩები და ა.შ. არ არსებობს კომპონენტი, რომელშიც "ბლანკოსი" ატლეტიკოზე უკან დგას. დიახ, "უმცროსებს" აქვთ უპირატესობა ევროპა ლიგასა და თასების თასზე, მაგრამ ეს წვრილმანებია.

რამდენად არის ევროპა ლიგის სამი და თასების მფლობელთა თასის ერთი ტიტული "როხიბლანკოს" სიდიადის მსაზღვრელი, როდესაც "თეთრებს" ჩემპიონთა ლიგის 15 თასი აქვთ კოლექციაში?! ეს ყველაფერი იმის გათვალისწინებით, რომ ბერნაბეუს ბინადრებმა 2014 და 2016 წლებში ფინალში სწორედ "ინდიელებს" მოუგეს.

ცუდი ბიჭების ახალი ნაკადი

როგორც აღვნიშნეთ, არგენტინელი მწვრთნელი თავის ამჟამინდელ გუნდში მოღვაწეობს 13 წელი და ამ დროის განმავლობაში მან "თეთრ-წითლების" არაერთი ვარიაცია შემოგვთავაზა. სიმეონეს ხელში თავისი საუკეთესო ფეხბურთი ითამაშეს რადამელ ფალკაომ, დიეგო გოდინმა, არდა თურანმა, იან ობლაკმა და სხვებმა.

დიეგოს ტოვებდნენ, თუმცა შემდეგ უბრუნდებოდნენ იგივე ანტუან გრიზმანი, დიეგო კოშტა და საულ ნიგესი. მას ჰყავდა რამდენიმე ერთგული ჯარისკაცი, მაგალითად გაბი ფერნანდესი და კოკე რესურესიონი. ცხადია, მეტროპოლიტანოზე გატარებულ წლებს არ ჩაუვლია მტრის ბანაკში გადასვლის ფაქტის გარეშეც და აქ, ტიბო კურტუა უნდა ვახსენოთ.

არგენტინელმა მწვრთნელმა ატლეტიკო აქცია სრულფასოვან ტოპ გუნდად, თუმცა რეალის ჩრდილიდან გამოსვლა მაინც შეუსრულებელ მისიად დარჩა. რთული სათქმელია, რამდენად შეძლებს "როხიბლანკო" ამას გაისად, მაგრამ ფაქტია, რაღაც ახალი და განსხვავებული ამ კლუბში მართლაც მწიფდება. უბრალოდ გადავხედოთ "ინდიელთა" აქტიურობას სატრანსფერო ბაზარზე.

გუნდის განკარგულებაში უკვე არიან ალექსანდერ სორლოტი და რობინ ლე ნორმანი - პირველს ლა ლიგის გასული სეზონის საუკეთესო ბომბარდირობამდე დააკლდა 1 ბურთი, მეორე კი ესპანეთის ეროვნული გუნდის შემადგენლობაში ევრო 2024-ის ჩემპიონი გახდა. ცოტა ხნის წინ, ხულიან ალვარესისა და კონორ გალაგერის ტრანსფერებიც შედგა, ამას "თეთრ-წითლებისგან" ნამდვილად არავინ ელოდა.

არგენტინელმა თავდამსხმელმა თავისი ახალგაზრდული ასაკის მიუხედავად მოიგო ყველაფერი, თუმცა მანჩესტერ სიტიში ერლინგ ჰოლანდის ჩრდილიდან გამოსვლა მან ვერ შეძლო. ჩრდილიდან ვერგამოსვლა სიმეონეს გუნდისთვის ნაცნობი თემაა და ახლა გუნდს "ქალაქელთა" ყოფილი ფორვარდიც ემატება. ცნობისთვის, 24 წლის შემტევმა უარით პარის სენ-ჟერმენი გაისტურმა.

დიახ, პსჟ "ლურჯების" მე-19 ნომერს სთავაზობდა ორჯერ უფრო მაღალ ანაზღაურებას, თუმცა მან მაინც მეტროპოლიტანო აირჩია. არგენტინელი დამრიგებლის ხელში, ალვარესი ეცდება იმის ჩვენებას, თუ რას დაკარგავს პეპ გუარდიოლა მასზე უარის თქმის შედეგად. მან უკვე სადებიუტო მატჩის ჩატარებაც მოასწრო.

არგენტინელი თავდამსხმელის შემდეგ, ატლეტიკოს მაისურს ინგლისელი ცენტრალური ნახევარმცველიც მოირგებს. კირან ტრიპიერის შემდეგ, ის გახდა რიგით მეორე "სამი ლომის" წევრი "როხიბლანკოს" ისტორიაში. ალბიონელი პრიმერა დივიზიონში, ყოველთვის საინტერესოა, მითუმეტეს ახლა: "სამეფო კლუბში" ჯუდ ბელინგემი, "ინდიელებში" კი ლონდონის ჩელსის ყოფილი შუახაზელი.

მოლოდინი

ლა ლიგის ფავორიტად ისევ რჩება "ბლანკოსი", თუმცა თუ აქამდე მთავარ კონკურენტად ითვლებოდა ბარსელონა, დღეს, თამამად შეიძლება ითქვას, რომ ეს სტატუსი "თეთრ-წითლებმაც" გადმოიბარეს. უკვე 13 წელია, რაც დიეგო ცდილობს ბერნაბეუს ბინადრების გამწარებას, მისთვის უკვე სავსებით ნორმალურია ამის გაკეთება კიდევ ერთხელ.

სიმეონეს გუნდი აუცილებლად იბრძოლებს ლა ლიგის ტიტულისთვის და რეალის სიდიადე ამ კოლექტივისთვის საშიში სულაც არ არის. დიახ, შიში არაფერ შუაშია, პრობლემას წარმოადგენს ის ფაქტი, რომ "სამეფო კლუბის" დასამარცხებელი ფორმულა ჯერ არ არის მოფიქრებული, როგორც ევროსარბიელზე, ისე პრიმერაშიც.

ვნახოთ, შეძლებენ თუ არა საფეხბურთო სამყაროს გაოცებას გალაქტიკოსების ჩრდილში მყოფი "ცუდი ბიჭები". "ბლანკოსი" უყვართ, ამ გუნდს ადიდებენ, არგენტინელმა ტაქტიკოსმა კი მისი ანტიპოდი შექმნა. თავის სამწვრთნელო კარიერაში ყველაზე მეტი მატჩი მან ჩაატარა სწორედ "თეთრების" წინააღმდეგ, ვის, თუ არა მეტროპოლიტანოს ბინადრების დამრიგებელს უნდა შეექმნა მათი დასამარცხებელი ვაქცინა.