იოჰან კრუიფმა ერთხელ თქვა - "მირჩევნია გავიმარჯვო ანგარიშით 5:4, ვიდრე 1:0. ორივე შემთხვევაში იტან მეტოქეზე ერთით მეტ გოლს და ჯობია ეს უფრო სანახაობრივად გააკეთო. ანალოგიურად წაგებაზეც ვფიქრობ. თუ მარცხი გარდაუვალია, მირჩევნია ჩემი თამაში ხალხისთვის დასამახსოვრებელი იყოს".
ჩემპიონთა ლიგის ნახევარფინალმა გვაჩუქა დაუვიწყარი მატჩი, რომელიც სწორედ ლეგენდარული ნიდერლანდელის საყვარელი ანგარიშით დასრულდა. ბაიერნ მიუნხენისა და პარის სენ-ჟერმენის დუელთან ერთად, გავიხსენოთ სხვა ყველაზე ცნობილი 5:4-ები ფეხბურთის ისტორიაში.
ბარსელონა 5:4 ატლეტიკო | როცა კამპ ნოუზე იფორმებ პოკერს, თუმცა შოუს მაინც რონალდო იპარავს
კოპა დელ რეის 1996/1997 წლების სეზონის მეოთხედფინალი - პირველ მატჩში ანგარიშით 2:2 დაფიქსირებული ფრეს შემდეგ, მაყურებელმა ნამდვილი საფეხბურთო სპექტაკლი იხილა. შეხვედრის მთავარი გმირი უნდა ყოფილიყო მილინკო პანტიჩი, რომელმაც 44 წუთის შუალედში ბარსას პოკერი შეუსრულა.
კატალონიური გუნდი იდგა კატასტროფის წინაშე - მატჩის 31-ე წუთისთვის მასპინძლები ნადგურდებოდნენ ანგარიშით 0:3-ს, მეორე ტაიმის სტარტზე კი ტაბლოზე უკვე 2:4 იყო. როგორც აღვნიშნეთ, ატლეტიკოს მხრიდან "ბლაუგრანას" ოთხივე ბურთი სწორედ სერბმა ფლეიმეიქერმა შეუგდო.
მადრიდული გუნდის ნახევარმცველის შოუ მოიპარა რონალდომ, ვინც მეტოქეს საერთო ჯამში სამი გოლი გაუტანა. კამპ ნოუს ბინადრების ქამბექი დაიწყო სწორედ ბრაზილიელმა ფორვარდმა, რომლის ჰეთ-თრიქითა და ლუიშ ფიგუს 1 ბურთით, 72-ე წუთისთვის უკვე 4:4 იყო. იმის გათვალისწინებით, რომ პირველი შეხვედრა დასრულდა 2:2, ხსენებული 4:4 ბობი რობსონის შეგირდებს არ აწყობდათ.
იმ დროს მოქმედებდა სტუმრად გატანილი გოლის პრინციპი, ბარსელონას კი ამ მხრივ "როხიბლანკოსზე" ნაკლები ჰქონდა შეგდებული. საბოლოოდ, კატალონიელებმა მაინც გამოგლიჯეს ხელიდან ვისენტე კალდერონის მკვიდრებს ესპანეთის თასის 1/2 ფინალის საგზური. ხუან ანტონიო პიცი, მოთამაშე, რომელმაც "ბლაუგრანას" მხრიდან გადამწყვეტი, მე-5 ბურთი შეაგდო.
ჩელსი 5:4 მანჩესტერ იუნაიტედი | რობერტო დი მატეოს მიერ დამარცხებული ალექს ფერგიუსონი
დი მატეოს სამწვრთნელო კარიერის ყველაზე დასამახსოვრებელი მომენტი თუ არის ჩემპიონთა ლიგაზე გამარჯვება და მისკენ მიმავალი გზა, ამ ყველაფრის შემდეგ, ულაპარაკოდ, იუნაიტედთან 9-ბურთიანი თრილერი მოდის. ინგლისის ლიგის თასის 1/8 ფინალი: ჩელსი 94-ე წუთამდე აგებს 2:3-ს, მაგრამ ბოლოს, მასპინძლებს თამაშში ედენ აზარი აბრუნებს.
დამატებით დროში ლონდონურმა გუნდმა გაიტანა კიდევ ორი გოლი, რითაც თავის გულშემატკივრებს სრულფასოვანი ქამბექი აჩუქა. მართალია, 120-ე წუთზე მანჩესტერელთა მხრიდან შეაგდო რაიან გიგზმაც, მაგრამ თამაშის გადასარჩენად ეს არ გამოდგა საკმარისი, რის შედეგადაც მოგება "არისტოკრატებს" დარჩათ.
ეს იყო იტალიელი მწვრთნელის ბოლო წარმატებული მატჩი სტემფორდ ბრიჯზე მუშაობის პერიოდში. ამ გამარჯვებიდან მალევე საფეხბურთო სამყარო იხილავს ანტირეკორდს: ჩელსი გახდება პირველი გუნდი ევროპის მთავარი საკლუბო ტურნირის ისტორიაში, რომელიც ჯგუფში მოქმედი ჩემპიონის სტატუსით ჩარჩება.
ბენფიკა 4:5 ბარსელონა | გამარჯვება ჰანსი ფლიკის საფირმო სტილში
ერთ-ერთი ყველაზე სანახაობრივი მატჩი ჩემპიონთა ლიგის ისტორიაში, რომელიც ბარსელონასთვის კატასტროფულად იწყებოდა. ვანგელის პავლიდისის ჰეთ-თრიქის დამსახურებით, ბენფიკა 30-ე წუთისთვის იგებდა 3:1-ს, რონალდ არაუხოს ავტოგოლით კი მასპინძლებმა მე-4 ბურთიც ჩაიწერეს.
კატალონიურ გუნდს მხსნელებად მოევლინენ რობერტ ლევანდოვსკი და რაფინია ბელოლი, ვინც ლისაბონში ორ-ორი გოლი გაიტანეს. რემონტადაში თავისი წვლილი 1 ბურთით ერიკ გარსიამაც შეიტანა. მაყურებელმა შეხვედრის კულმინაცია იხილა 90+6 წუთზე, რომელზეც "ბლაუგრანასთვის" მოგების მომტანი გოლი ბრაზილიელმა ვინგერმა შეაგდო.
ეს არ იყო პირველი და არც ბოლო შემთხვევა, როდესაც კამპ ნოუს ბინადრებმა ფლიკის მწვრთნელობით თავის გულშემატკივრებს ჩემპიონთა ლიგაზე უხვგოლიანი სანახაობა აჩუქეს. ეპიკური თრილერები ბაიერნთან, ინტერსა და ნიუკასლთან, ბარსელონას თანამედროვე ისტორიის ნაწილია უკვე.
ლივერპული 5:4 ალავესი | 2000/2001 წლების სეზონის მთავარი მშვენება
უეფას თასის ფინალი, რომელშიც ლივერპული ითვლებოდა გამოკვეთილ ფავორიტად, თუმცა დეპორტივო ალავესის შეუპოვრობამ ყველაფერი თავდაყირა დააყენა. მერსისაიდელთათვის სტარტი იყო იდეალური: 2:0 მე-16 წუთისთვის, მაგრამ შეხვედრის მიწურულს ტაბლოზე უკვე 4:4 ფიქსირდებოდა.
საინტერესოა, რომ "წითლების" კარში მეოთხე გოლი გაიტანა ლეგენდარული იოჰანის ვაჟმა, იორდიმ. დიახ, ანგარიშით 5:4-ით დასრულებულ შეხვედრებზე საუბარი კრუიფის გვარის ხსენების გარეშე არ ჩაივლიდა. რაც შეეხება აღნიშნული დუელის კულმინაციას, ანუ ენფილდის მკვიდრთა მე-5 ბურთს, ის დელფი გელის ავტოგოლით გავიდა.
შეგახსენებთ, რომ 2001 წელს ოქროს ბურთი სწორედ უეფას თასის გამარჯვებულმა ფეხბურთელმა მიიღო. საუბარია მაიკლ ოუენის შესახებ, რომელმაც უშუალოდ ბასკებთან შეხვედრაში თავი გამოიჩინა 2 ასისტით, ზოგადად კი იმ სეზონში მისი მონაგარი შეადგენდა 46 თამაშში 24 ბურთსა და 7 საგოლე პასს.
მანჩესტერ იუნაიტედი 5:4 ლიონი | ოლდ ტრაფორდზე დადგმული შოუ გიორგი მიქაუტაძის მონაწილეობით
როდესაც მატჩის 110-ე წუთისთვის ოლდ ტრაფორდზე შენს სასარგებლოდ ანგარიში არის 4:2, თუმცა ბოლოს მაინც მარცხდები. დიახ, ლიონის ოლიმპიკმა მიქაუტაძესთან ერთად ევროპის რანგით მე-2 საკლუბო ტურნირის 1/4 ფინალის საპასუხო შეხვედრაში სწორედ აღნიშნული რამ გამოიარა.
პირველი მატჩი, ისევე როგორც განმეორებითის ძირითადი დრო დასრულდა ფრედ, ანგარიშით 2:2, დამატებითში კი როგორც აღვნიშნეთ, "ლომები" მოგებასთან იყვნენ ისე ახლოს, როგორც არასდროს. იუნაიტედის ქამბექი დაიწყო 114-ე წუთიდან და 120+1 წუთისთვის ტაბლოზე უკვე 5:4 იყო.
აღსანიშნავია, რომ მანჩესტერული გუნდის მიერ ქამბექის დროს გატანილი სამივე გოლი კარლოს კაზემიროს აქტიურობით გავიდა (ორი ასისტი, გამომუშავებული 11-მეტრიანი). აუცილებლად სახსენებელია ჰარი მაგუაიერიც, სწორედ მან დასვა საბოლოო წერტილი "წითელი ეშმაკებისა" და რონელთა 1/4 ფინალურ დუელში.
პსჟ 5:4 ბაიერნი | მატჩი, რომლითაც ხვიჩა კვარაცხელია ოქროს ბურთს მიუახლოვდა
კრუიფის სიტყვების გახსენების მიზეზი სწორედ ეს მატჩია, ასევე დასამახსოვრებელი 5:4-ებისაც. ამ თამაშის შესახებ უკვე ბევრი ითქვა და დაიწერა, ყველაზე მთავარი კი არის ის, რომ კვარა ბალონ დ'ორს მიუახლოვდა. ჰარი კეინის მიერ გატანილი ბურთის შემდეგ, პარის სენ-ჟერმენი თამაშში სწორედ ქართველმა ვინგერმა დააბრუნა.
მოგვიანებით, ხვიჩამ ბაიერნს მეორე გოლიც გაუტანა. ამ მატჩის დასრულებისას, არაერთმა ლეგენდარულმა ფეხბურთელმა და ექსპერტმა გამოთქვა მოსაზრება, მსოფლიოს საუკეთესო მოთამაშე ამ მომენტისთვის სწორედ პსჟ-ს ვინგერია. ფრანგული კლუბი მორიგი ფინალისკენ მიმავალ გზაზეა, თავისი მე-7 ნომრის ლიდერობით.
გამოსარჩევია ისიც, რომ 25 წლის შემტევს ჩემპიონთა ლიგაზე საერთო ჯამში დაუგროვდა 15 გოლი, რითაც მან უკვე გადაასწრო ისეთ ლეგენდებს, როგორებიც არიან რომარიო, ვეა, რონალდო, კლოზე, ვილა და სხვები. ერთი სიტყვით, კვარას ბალონ დ'ორისკენ მიმავალი ზღაპარი გრძელდება.
რომა 4:5 ინტერი | დრო, როცა საუკეთესო ფეხბურთს სერია A-ში თამაშობდნენ
დაუვიწყარი კლასიკა 1990-იანი წლების მეორე ნახევრიდან. ეს მატჩი მოინათლა რონალდოსა და ტოტის პერსონალურ დუელად, თუმცა ვარსკვლავების დეფიციტი მათ გარეშეც არ შეინიშნებოდა. თავად განსაჯეთ: ბერგომი, ალდაირი, ბაჯო, სიმეონე, ზამორანო, პალიუკა, ჯორკაეფი, ძანეტი და კიდევ ბევრი სხვა.
ინტერის სათადარიგოთა სკამზე ახალგაზრდა და ჯერ კიდევ თავდამსხმელის პოზიციაზე მოთამაშე ანდრეა პირლოც იყო. რაც შეეხება შეხვედრის მიმდინარეობას, მილანელებს მთელი თამაშის მანძილზე ჰქონდათ სოლიდური უპირატესობა, მაგრამ მე-80 წუთისთვის რომა მაინც დაეწია სტუმრებს და ტაბლოზე 4:4 აციმციმდა.
საბოლოოდ, გამარჯვება მაინც დარჩა "ნერაძურის", დიეგოს თავურით, დრამატულად, 87-ე წუთზე. ამ გოლის გარდა, სტუმრების მხრიდან გამოსარჩევია ნაზარიოსა და მისი ჩილელი მეწყვილის დუბლები, ასევე რობის ასისტების ჰეთ-თრიქი. ერთი სიტყვით, აუცილებლად საყურებელი თამაში, ფეხბურთის მოყვარულთა ყველა თაობის წარმომადგენლებისთვის.
სანტოსი 4:5 ფლამენგო | მობერებული რონალდინიოსა და თინეიჯერი ნეიმარის დუელი
ეს სია იქნებოდა არასრული სხვადასხვა ეპოქის ჯადოქრების დაპირისპირების გარეშე. კარნავალის ტოლფასი მატჩი, რომლის მთავარ როლში იყვნენ მშვიდი პენსიისკენ მიმავალი რონალდინიო და მისი მემკვიდრე. რაც შეეხება თამაშის მიმდინარეობას, ეს ის შემთხვევაა, როცა ოსტატმა მოწაფეს აჯობა.
გაუჩომ იმ მატჩში გაიტანა სამი გოლი და გააკეთა ასისტიც, ჟუნიორმა კი მას დუბლითა და ერთი საგოლე გადაცემით უპასუხა. ეს ყველაფერი იმის გათვალისწინებით, რომ შეხვედრის 68-ე წუთამდე სანტოსი იგებდა 4:3-ს, მაგრამ შემდეგ, ფლამენგოს ლიდერმა ჯერ გაათანაბრა ანგარიში, მოგვიანებით კი მოგებაც ჩაიწერა.
ორივე ბრაზილიელი არტისტის კარიერაში იყო სპექტაკლები ბარსელონასა და პარის სენ-ჟერმენში, თუმცა სხვადასხვა სცენარით. მთავარი პერფომანსები ორივე მათგანმა დადგა სწორედ კატალონიაში და რაც შეეხება პსჟ-ს, თუ რონალდინიოსთვის აღნიშნული კლუბი გამოდგა ტრამპლინი, "ალვინეგროს" ამჟამინდელი კაპიტნისთვის საფრანგეთში თამაში უბრალოდ ფინანსურ კეთილდღეობაზე ზრუნვა იყო.
ბარსელონა 5:4 სევილია | უხვგოლიანი საღამო თბილისში
11 წლის წინ, უეფას სუპერ თასი სწორედ თბილისში ჩატარდა. ჩემპიონთა ლიგის გამარჯვებულს წარმოადგენდა ბარსელონა (სხვათაშორის, ლუის ენრიკეს დამრიგებლობით), ევროპის რანგით მე-2 საკლუბო ტურნირის ტრიუმფატორს კი სევილია. ბორის პაიჭაძის სახელობის სტადიონზე დამსწრე მაყურებელმა იხილა 9-ბურთიანი თრილერი, რომელიც 120 წუთის მანძილზე გრძელდებოდა.
რაც შეეხება უშუალოდ მატჩის მიმდინარეობას, ანგარიში საჯარიმო დარტყმით მესამე წუთზე გახსნა ევერ ბანეგამ, რითაც ანდალუსიური კლუბი წინ გაიყვანა. "ნერვიონენსეს" ფლეიმეიქერის სტანდარტიდან ზუსტად 4 წუთში, ჯარიმა შეაგდო ლეო მესიმაც და 9 წუთის შემდეგ, მეორეც.
პირველი ტაიმის მიწურულს უნაი ემერის გუნდს რაფინია ალკანტარამაც გაუტანა. მეორე ნახევარში ლუის სუარესმა სხვაობა გახადა დამანგრეველი და თითქოს მოკლა კიდეც ინტრიგა, მაგრამ რამონ სანჩეს პისხუანის მკვიდრები დანებებას არ აპირებდნენ. 57-ე - 81-ე წუთების შუალედში სევილიამ კატალონიელებს 3 ბურთი შეუგდო.
მატჩის ძირითადი დრო დასრულდა ანგარიშით 4:4, ექსტრა ტაიმების დამთავრებამდე 5 წუთით ადრე კი პედრო როდრიგესმა "ბლაუგრანასთვის" ტიტულის მომტანი ბურთი შეაგდო. ულაპარაკოდ, საუკეთესო დუელი სუპერ თასის ისტორიაში და რაც მთავარია, ქართველი ფანების თვალწინ.
ტოტენჰემი 4:5 არსენალი | ჟოზე მოურინიოს თვალით დანახული ჰოკეი
პრემიერ ლიგის 2004/2005 წლების სეზონის დასაწყისი - დრო, როდესაც მოურინიოს ჩელსი მწვერვალისკენ მიმავალ გზაზე პირველ ნაბიჯებს დგამდა. ბრიტანული საფეხბურთო სამყაროს ყურადღების ცენტრში იყო სწორედ პორტუგალიელი სპეციალისტი, მაგრამ ნოემბრის ერთ მშვენიერ საღამოს ლონდონელი "არისტოკრატები" მეზობელმა არსენალმა და ტოტენჰემმა დაჩრდილეს.
ჟოზეს მოგვიანებით ჰკითხეს, თუ რას ფიქრობდა ის განვლილი დერბის შესახებ, რაზეც ჟურნალისტებმა მიიღეს ცინიკური პასუხი - "5:4? ეს არის არა ფეხბურთის, არამედ ჰოკეის ანგარიში", - თქვა სტემფორდ ბრიჯის მკვიდრთა იმდროინდელმა დამრიგებელმა. ერთი სიტყვით, "განსაკუთრებულმა" მეზობლების მიმართ კომპლიმენტი არ გაიმეტა.
რაც შეეხება უშუალოდ მატჩს, საინტერესოა, რომ ცხრავე გოლი სხვადასხვა ფეხბურთელებმა გაიტანეს. "მეთოფეების" მხრიდან თავი გამოიჩინეს ანრიმ, ვიეირამ, პირესმა, ლიუნგბერგმა და ლორენმა, "მამლებიდან" კი ნაიბეთმა, კანუტემ, დეფომ და კინგმა. აღნიშნული შეხვედრა დღემდე რჩება ყველაზე შედეგიანად არსენალისა და ტოტენჰემის ურთიერთმატჩების ისტორიაში.
ბონუსი - ესპანეთი 5:4 საფრანგეთი | ერთა ლიგის მთავარი სანახაობა
მართალია, საუბარი გვაქვს საკლუბო ფეხბურთში დაფიქსირებულ 5:4-ებზე, თუმცა ესპანეთისა და საფრანგეთის სპექტაკლისთვის გვერდის ავლა დანაშაული იქნებოდა. ერთა ლიგის 1/2 ფინალი: "ლა როხა" 55-ე წუთისთვის "ლურჯებს" ანადგურებს 4:0-ს და თითქოს გადაწყვეტილია, თუ რომელი ეროვნული გუნდი გავა ფინალში.
შემდეგ მალევე ანგარიში გახდა 5:1 - არაფერი განსაკუთრებული "წითლებისთვის". 79-ე წუთიდან დაიწყო "გალიელთა" გამოღვიძება და შეხვედრის ბოლოსთვის ტაბლოზე უკვე 5:4 იყო. დიახ, დიდიე დეშამის შეგირდებმა ლუის დე ლა ფუენტეს გუნდის კარი აიღეს კიდევ 3-ჯერ, მაგრამ თამაშის გადასარჩენად ეს საკმარისი არ გამოდგა.
იმ მატჩში მოედანზე ბრწყინავდნენ კილიან მბაპე, პედრი გონსალესი, ლამინ იამალი, რაიან შერკი და სხვა ვარსკვლავური არტისტები საფრანგეთსა და ესპანეთიდან. ფეხბურთის ისტორიაში ყოფილა სხვა 5:4-ებიც, რაც ნიშნავს იმას, რომ კრუიფის მემკვიდრეობა მარადიულად ცოცხლობს.
