არის ასეთი მოსაზრება, რომ თითოეული ტოპ მწვრთნელს შექმნილი ჰყავს მინიმუმ ერთი მონსტრი - ფერგიუსონს რონალდუ, ანჩელოტის კაკა, გუარდიოლას მესი და ა.შ. ბარსელონას ფორვარდის ე.წ. "შემქმნელად" მიჩნეულია კლოპი, რომლის ხელმძღვანელობითაც მან დორტმუნდის ბორუსიაში 187 შეხვედრაში 103 ბურთი გაიტანა.
გოლების რაოდენობის მხრივ, კატალონიელთა ცხრიანი ყველაზე შედეგიანი იყო სწორედ იურგენთან, თუმცა ცალკე გამოსარჩევია ის ფაქტი, თუ როგორი ცივსისხლიანი და დაუნდობელი ის ფლიკის ხელმძღვანელობის ქვეშ იყო. თავად განსაჯეთ: მიუნხენის ბაიერნში ერთად მუშაობის პერიოდში, 36 წლის ფორვარდმა 71 მატჩში 83 ბურთი გაიტანა.
ლევანდოვსკიმ გერმანელ მწვრთნელთან ერთად მოიგო ჩემპიონთა ლიგა, ორჯერ ბუნდესლიგა და კიდევ რამდენიმე ტიტული. მესი - რონალდუს ეპოქაში, 2019-2020 წლების შუალედში, პოლონელი ფორვარდი სრულიად დამსახურებულად ითვლებოდა მსოფლიოს საუკეთესო მოთამაშედ და კორონავირუსის პანდემია რომ არა, ის უდიდესი ალბათობით ოქროს ბურთსაც მოიგებდა.
2020-2021 წლების სეზონის დასრულების შემდეგ, ჰანს-დიტერმა დატოვა "რეკორდმაისტერი" და გერმანიის ნაკრებში გადაინაცვლა. რობერტი დარჩა და ამჯერად უკვე იულიან ნაგელსმანის ხელმძღვანელობით მან 46 მატჩში 50 ბურთი გაიტანა. 2021/22 წლების სეზონის დასრულების შემდეგ, ბავარია პოლონეთის ეროვნული გუნდის კაპიტანმაც დატოვა.
ალიანც არენას ბინადრების ყოფილმა ცხრიანმა მიაშურა "ბლაუგრანას", ორი სეზონის შემდეგ კი მას "ბუნდესნაკრების" ყოფილი მწვრთნელიც შეუერთდა. დღეს, ისინი იცავენ იმ კლუბის სახელს, რომელიც წლების წინ 8:2 გაანადგურეს. აღსანიშნავია ის, რომ 36 წლის ფორვარდსა და ფლიკს შორის ბაიერნში არსებული ქიმია არც "ლურჯ-ბროწეულისფრებში" გამქრალა.
კამპ ნოუს ბინადრები ლიდერობენ ლა ლიგის სატურნირო ცხრილს, ლევანდოვსკი კი ბომბარდირთა რბოლას. მის ანგარიშზე მიმდინარე სეზონში 12 შეხვედრაში 14 ბურთია, გერმანელი სპეციალისტის ხელმძღვანელობით კი 83 მატჩში მან უკვე 97 გოლი გაიტანა. დღეს, პოლონელ ფორვარდსა და მის საყვარელ დამრიგებელს ჩემპიონთა ლიგაზე განსაკუთრებული მატჩი ელით.
ფლიკის გუნდის მოწინააღმდეგე იქნება მიუნხენური მანქანა, რომელსაც ვენსან კომპანის ხელმძღვანელობით ჩვეული ტემპი არ დაუგდია. რობერტის გარშემო ტრიალებს რამდენიმე მოსაზრება: თითქოს ის არ აის Big Game Player-ი, მისი დრო უკვე წავიდა და "რეკორდმაისტერმა" ის დროულად მოიშორა. ბარსას ფორვარდს აქვს კრიტიკოსების დადუმების ჩინებული შანსი, თანაც განსაკუთრებული მეტოქის წინააღმდეგ.
