გზა ფინალამდე
"წითლებს" მარტივი გზით არ უვლიათ თავიდანვე - პლეიოფის საგზური უკანასკნელ ტურში მოიპოვეს, პირეოსის ოლიმპიაკოსის დამარცხებით. მერვედფინალში მერსისაიდელებმა ლევერკუზენის ბაიერს მოუგეს, შემდეგ კი - ტურინის იუვენტუსს. რაც შეეხება ნახევარფინალს, ლონდონის ჩელსისთან დაპირისპირებაში ყველაფერი ლუის გარსიას გოლმა-მოჩვენებამ გადაწყვიტა.
"როსონერიმ" თავის მხრივ ჯგუფური ეტაპი მარტივად გადალახა, პლეიოფში კი დაამარცხეს მანჩესტერ იუნაიტედი, თანაქალაქელი ინტერნაციონალე და პსვ ეინდჰოვენი. ყველაზე მეტი პრობლემა "შავ-წითლებს" ერედივიზიის წარმომადგენლებმა შეუქმნეს, მეზობლები და "მანკუნიანელები" მომავალმა ფინალისტებმა უბრალოდ არ შეიმჩნიეს.
"ეშმაკების" დომინირიება თანაქალაქელებზე იმდენად მკაფიო იყო, რომ "ნერაძურის" გულშემატკივრებმა მეოთხედფინალის განმეორებითი შეხვედრა ჩაშალეს. პიროქეტნიკის ცვენა, დაზარალებული ნელსონ დიდა, ტექნიკური 0:3 და შემდგომი დისკვალიფიკაცია "გველებს", ყველაფერი ეს მადონინაში მოხდა. მარკო მატერაცისა და მანუელ რუი კოშტას ეპოქალური ფოტო სწორედ იმ მატჩიდან შემოგვრჩა.
ფინალი: პირველი ტაიმი - ნაადრევი ზეიმი
კარლო ანჩელოტის გუნდი გამოკვეთილი ფავორიტი იყო, ამაზე მეტყველებდა ყველაფერი - შემადგენლობა, კლასი, გამოცდილება. ობიექტურად, "სქაუზერებს" იმ დროის ყველაზე ძლიერი გუნდი უპირისპირდებოდა. სან სიროს ბინადრებმა დომინირება თავიდანვე დაიწყეს, სწორედ სტამბოლში გავიდა ლიგის ფინალების ისტორიაში ყველაზე სწრაფი გოლი და მისი ავტორი პაოლო მალდინი იყო.
მილანი ერთი წამითაც არ გაჩერებულა - ტაიმის ბოლოსთვის ანგარიში 3:0 იყო. ლეგენდარული იტალიელი მარცხენა მცველის სწრაფ გოლს ერნან კრესპოს დუბლი მოჰყვა. გამოსარჩევი იყო არგენტინელი ფორვარდის მე-2 ბურთი, რომლის გატანის დროს მან და რიკი კაკამ სამყაროს აჩვენეს, თუ როგორი ლამაზი შეიძლება იყოს სამხრეთ ამერიკული ფეხბურთი.
სწორედ "როსონერის" თავდამსხმელი უნდა გამხდარიყო იმ შეხვედრის მთავარი გმირი, თუმცა შემდგომმა მოვლენებმა მისი უმაღლესი დონის პერფომანსი მთლიანად გადაფარა. ენფილდელთა იმდროინდელი დამრიგებელი, რაფა ბენიტესი იხსენებს:
"ყოველთვის ვცდილობ სიმშვიდის შენარჩუნებას, მაგრამ მე-2 ბურთის გაშვების შემდეგ, ავნერვიულდი.
მესამე გოლით სიტუაცია კრიტიკული გახდა, თითქოს ყველაფერი უკვე დასრულებული იყო, თუმცა ჩვენი გულშემატკივრების მხარდაჭერა დანებების საშუალებას არ გვაძლევდა. ვხვდებოდი, რომ მათი გულისთვის რაღაც აუცილებლად უნდა მოგვეფიქრებინა", - ასე იხსენებს ესპანელი სპეციალისტი სტამბოლის ფინალს.
ლივერპულის გულშემატკივრების მხარდაჭერით ანჩელოტიც გაოგნებული დარჩა:
"მათი გუნდი პირველი ტაიმის ბოლოსთვის ნადგურდებოდა, თუმცა ისინი მაინც კლუბის ჰიმნს მღეროდნენ. შოკში ვიყავი. იტალიელი ქომაგები 0:3-ზე ქვების სროლას იწყებენ, აქ კი სულ სხვა სურათი ვნახე", - აცხადებდა იტალიელი სპეციალისტი.
კარლოს არაფერი შეუცვლია შესვენების დროს, ყველაფერი გეგმის მიხედვით მიდიოდა, "წითლების" მწვრთნელს კი სასწრაფოდ სჭირდებოდა გარდატეხის შეტანა, როგორც ტაქტიკურად, ისე მორალურადაც.
"მჭირდებოდა რაღაც განსაკუთრებულის თქმა, მაგრამ არ მქონდა ინგლისური ენის საკმარისი ცოდნა, თანაც ამისთვის სულ რაღაც 15 წუთი მქონდა", - იხსენებს ბენიტესი.
რაც შეეხება ტაქტიკურ გადაადგილებას, გამანადგურებელ ანგარიშს დაემატა სტივენ ფინანის ტრავმა, რის შემდეგაც ესპანელმა მწვრთნელმა სამ მცველზე გადასვლის გადაწყვეტილება მიიღო. ირლანდიელი განაპირა მცველის ნაცვლად მოედანზე შემოვიდა დიტმარ ჰამანი, რომელმაც მოგვიანებით, "მერსისაიდელთა" წონასწორობის აღდგენაში უდიდესი როლი ითამაშა.
მეორე ტაიმი: "შენ არასდროს ივლი მარტო"
მეორე ტაიმის დასაწყისისთვის "შავ-წითლები" მოდუნებულები ჩანდნენ, თუმცა შეტევების განხორციელებისგან თავს მაინც არ იკავებდნენ. "სქაუზერთა" მხრიდან ყურადღების ცენტრში აღმოჩნდა გუნდის კაპიტანი, სტივ ჯერარდი, რომელმაც გასახდელში ჯერ მოტივაციური მონოლოგი წარმოთქვა, შემდეგ კი მოედანზე რაფას დავალებაც იდეალურად შეასრულა.
ინგლისელ ცენტრალურ ნახევარმცველს ევალებოდა მხოლოდ ერთი რამ - შეტევა. პირველი გოლი სწორედ მან გაიტანა, მეორე ბურთი კი შეცვლაზე შემოსულმა ვლადიმირ შმიცერმა. რაც შეეხება მესამეს, ენფილდელთა კაპიტნის წაქცევის შედეგად დაინიშნა 11-მეტრიანი, რომელიც ჩაბი ალონსომ შეასრულა.
მართალია, თვითონ პენალტი დიდამ აიღო, თუმცა დამატებაზე ესპანელმა ცენტრალურმა ნახევარმცველმა მაინც გაიტანა - 3:3. ბენიტესი იხსენებს:
"ვიცოდით, რომ მე-2 ნახევარში სწრაფი ბურთის გატანის შემთხვევაში, რაღაც შანსი გაჩნდებოდა. მე-3 გოლის გატანის შემდეგ კი მოგებაზე ფიქრი უკვე სერიოზულად დავიწყე".
დამატებითი დრო და პენალტები - შევჩენკოს კოშმარი, დუდეკის ზღაპარი
"3:0-ის შემდეგ, გვეგონა, რომ დასასრულს ცრემლებით შევხვდებოდით, თუმცა შეხვედრის მიმდინარეობამ აჩვენა, რომ სხვა ფინალს ვიმსახურებდით", - აცხადებდა ლივერპულის ლეგენდარული მე-8 ნომერი. ოვერტაიმისთვის ორივე გუნდის მოთამაშეები დაიღალნენ, ანჩელოტიმ კი თამაშიდან დუბლის ავტორი კრესპო მოხსნა.
მოგვიანებით, ბევრი იტყვის, რომ არგენტინელი თავდამსხმელის ნაცვლად, კარლოს ანდრეი შევჩენკო უნდა გაეყვანა. ოქროს ბურთის მოქმედი მფლობელი 3:3-ის შემდეგ გაუჩინარდა, ოვერტაიმის 118-ე წუთზე კი მან ირჟი დუდეკს 2 მეტრიდან ვერ გაუტანა. უკრაინელი ფორვარდი "წითლებთან" მატჩს მოგვიანებით ყველაზე კოშმარულს უწოდებს.
როგორც გვახსოვს, "შავ-წითლების" თავდამსხმელმა გადამწყვეტი პენალტიც გააფუჭა.
"ამ მომენტს რამდენჯერმე ვუყურე. სიზმარში ვხედავდი, თუ როგორ ვაგებდი ყოველ ჯერზე დუდეკთან დუელს. ნამდვილი კოშმარია", - გაიხსენებს "ეშმაკების" ყოფილი 7-იანი. ასეთი არის სტამბოლის ღამე, ვიღაცისთვის ზღაპარი, ვიღაცისთვის კი კოშმარი.
