მასკოტები ევროპის ჩემპიონატებზე - თილისმები, რომლებმაც ტურნირები სხვა კუთხით დაგვამახსოვრეს

დღეს, განვლილი ევროპის ჩემპიონატების თილისმებზე ვისაუბრებთ. მასკოტის არსებობის ტრადიცია კონტინენტის პირველობაზე დამკვიდრდა იტალიაში გამართული ევრო 1980-დან. მაშინ თილისმა პინოქიო იყო. პორტალმა 90min-მა ჩაატარა კვლევა, რომლის მიხედვითაც განვლილი ევროპის ჩემპიონატების საუკეთესო მასკოტები ამოარჩია. განვიხილოთ, როგორ გამოიყურება ტოპ 5 მასკოტი:

საფრანგეთში გამართულ ევროპის ჩემპიონატზე მასკოტი რომ მამალი იყო, არავისთვის გაკვირვებია. "ლურჯების" ემბლემას ამშვენებს სწორედ ეს ცხოველი და ეროვნული გუნდის ერთ-ერთი მეტსახელიც სწორედ ამას უკავშირდება. რაც შეეხება სახელს, "პენო" ფრანგულ სლენგზე პენალტს ნიშნავს. ცნობისთვის, ევრო 1984 სწორედ გალთა ტრიუმფით დასრულდა.

გერმანიის ნაკრების ფორმაში გამოწყობილი კურდღელი, რომელსაც ბერნი შვეიცარიის დედაქალაქის საპატივცემულოდ დაერქვა. რატომ მაინც და მაინც ეს ქალაქი? - იქ მდებარეობს უეფას შტაბბინა და ამის გარდა, "ბუნდესნაკრებმა" 1954 წლის მუნდიალის თასი სწორედ ბერნში აღმართა. რაც შეეხება ევრო 1988-ს, კურდღელი იღბლიანი თილისმა ნიდერლანდებისთვის გამოდგა.

1988 წლის მსგავსად, ევრო 1992-ის მასკოტიც კურდღელი იყო, ამჯერად, შვედეთის ნაკრების ფორმაში. მისთვის არ მოუფიქრებიათ სახელი, ის იყო უბრალოდ რებითი, რაც ინგლისურად სწორედ კურდღელს ნიშნავს. თილისმამ ჩემპიონობა მოუტანა არა "ლურჯ-ყვითლებს", არამედ მათ მეზობელ დანიას, რომელიც თავიდან ტურნირის მონაწილედ არც მოიაზრებოდა.

მეკარის ხელთათმანებში გამოწყობილი სუპერ ვიქტორი, რომელსაც იდეის თანახმად ფრენა შეეძლო. მისი სახელი მოდის ლათინური Victory-დან, რაც გამარჯვებას ნიშნავს. ვიქტორი არ აღმოჩნდა საფრანგეთის ეროვნული გუნდისთვის იღბლიანი თილისმა, რადგან ტურნირის მასპინძლებმა ფინალში პორტუგალიასთან წააგეს.

ბენილაქი არის ლომისა და ეშმაკის ნაზავი, რომელიც აერთიანებდა 2000 წლის ევროპის ჩემპიონატის მასპინძლებს, ნიდერლანდებსა და ბელგიას. მის სახელს ასევე მივყავართ ბენილუქსის კავშირისკენ, რომელშიც სწორედ ეს ორი სახელმწიფოა გაწევრიანებული. ბენილაქი დღემდე ითვლება ერთ-ერთ ყველაზე დასამახსოვრებელ მასკოტად. როგორც გამარჯვების მომტანი თილისმა, ის გადაიხარა საფრანგეთის ეროვნული გუნდის მხარეს, რომელიც ჩემპიონი გახდა.