ქართველი მებრძოლების ტალღა
UFC-ის არასდროს ჰყოლია ჩემპიონი, თანაც ორი, ისეთი პატარა ქვეყნიდან, როგორიც საქართველოა. მსოფლიოს ყველაზე პოპულარულ ორგანიზაციაში 72 ჩემპიონით დომინირებს ამერიკის შეერთებული შტატები, შემდეგ კი 22 მებრძოლით ბრაზილია მოდის. სხვაობა ამ ორ ქვეყანსა და დანარჩენებს შორის უდიდესია.
დღევანდელი დღის შემდეგ, ჩემპიონ ქვეყნებში დაწინაურდა საქართველოც, რომელიც თავისი ორი ჩემპიონის დამსახურებით გაუთანაბრდა კანადას, ავსტრალიას, ნიგერიას, ნიდერლანდებსა და პოლონეთს. ჯერ კიდევ მიმდინარე წლის დასაწყისში, ჩვენი ქვეყნის გრაფაში ეწერა 0, ახლა კი უკვე ვუსწრებთ საფრანგეთს, ჩინეთს, სამხრეთ აფრიკას, ჩეხეთსა და დანარჩენ მსოფლიოს. ზემოთხსენებული ამერიკისა და ბრაზილიის გარდა, საქართველოზე წინ მხოლოდ 3 ქვეყანაა - რუსეთი (4), ინგლისი (3) და მექსიკა (3).
UFC-ის ისტორიაში ცხრა ქართველი მებრძოლი ფიგურირებს. ზემოთხსენებული ორი ჩემპიონის გარდა, მოქმედები არიან გიგა ჭიკაძე, რომან დოლიძე, გურამ ქუთათელაძე და ალექსანდრე თოფურია. წარსულში ყველაზე პოპულარული ორგანიზაციის წევრები ასევე იყვნენ ლევან მაყაშვილი, ზვიად ლაზიშვილი და ლიანა ჯოჯუა.
საჩემპიონო ქამრის დაცვა ქართულად
ორჯერ უკვე ვნახეთ, თუ როგორ ხდება ქართველი UFC-ის ჩემპიონი, წინ კი ქამრის დაცვა გველის. თოფურიას მოწინააღმდეგე იქნება მაქს ჰოლუეი, ბრძოლა 28 ოქტომბერს გაიმართება. შეგახსენებთ, რომ ტიტულისკენ მიმავალ გზაზე ქართველმა ჩემპიონმა მოუგო ლეგენდარულ ალექს ვოლკანოვსკის, რომელიც მე-2 რაუნდში გათიშა.
იმის შემდეგ, თვეების განმავლობაში იყო სპეკულაციები იმასთან დაკავშირებით, თუ ვინ იქნებოდა ილიას შემდეგი მოწინააღმდეგე. იწერებოდა ავსტრალიელ ყოფილ ჩემპიონთან რევანშსა და ისლამ მახაჩევთან ჩხუბზეც კი, მაგრამ ყველაფერი საბოლოოდ დასრულდა იმით, რომ "ელ მატადორისა" და ჰავაელი მებრძოლის დაპირისპირება დაანონსდა.
აღნიშნული ბრძოლა გაიმართება აბუ დაბიში, თუმცა უკვე ცნობილია ისიც, რომ 27 წლის ჩემპიონი გაისად იბრძოლებს მადრიდშიც, სანტიაგო ბერნაბეუზე. დვალიშვილის საჩემპიონო ქამრის დაცვაზე საუბარი ჯერ ძალიან ადრეა, ის ხომ ჩემპიონი დღეს გახდა. ამის მიუხედავად, პრესაში მაინც აქტიურად იწერება ქართველი ჩემპიონის მომავალი სავარაუდო მეტოქეების შესახებ.
ვარიანტებს შორის არის რევანში შონ ო'მალისთან, ბრძოლა დაუმარცხებელ უმარ ნურმაგომედოვთან და UFC-ის ყოფილი ჩემპიონი, დეივისონ ფიგეირედო. ყოფილი ამერიკელი ჩემპიონი სავარაუდოთ გარკვეული დროის მანძილზე დაისვენებს და მასთან მე-2 ჩხუბი უახლოეს მომავალში შეიძლება ითქვას, რომ გამორიცხულია.
დაღესტნელ მებრძოლთან დაპირისპირება ამ დროისთვის ყველაზე ოპტიმალურ ვარიანტად ჩანს. მის ანგარიშზე 18 ბრძოლაში ერთი მარცხიც არ არის და ამის გარდა, სუპერმსუბუქი დივიზიონის ტოპ 15-ში მასზე წინ მხოლოდ მერაბი და "შუგა" არიან. ცნობისთვის, კავკასიელმა მებრძოლმა ახალი ჩემპიონი უკვე გამოიწვია კიდეც.
რაც შეეხება ყოფილი ბრაზილიელი ჩემპიონის ვარიანტს - მასთან ბრძოლისა და გამარჯვების შემთხვევაში, "მანქანის" ანგარიშზე ხუთი დამარცხებული ქამრის მფლობელი მებრძოლი იქნება. შეგახსენებთ, 33 წლის ჩემპიონს აქამდე მოუგია ჟოზე ალდოსთან, ჰენრი სეხუდოსთან, პიოტრ იანთან და ახლა უკვე შონ ო'მალისთანაც.
