"შავ-ლურჯებიდან" ხუთი ფეხბურთელი იტალიის ნაკრებშია (მატეო დარმიანი, ნიკოლო ბარელა, ფედერიკო დიმარკო, ალესანდრო ბასტონი და დავიდე ფრატეზი). რაც შეეხებათ "ქალაქელებს", გამოკვეთილად ერთი ეროვნული გუნდი არ ფიგურირებს, პრემიერ ლიგის ჩემპიონებს 2-2 მოთამაშე ჰყავთ ინგლისში, პორტუგალიაში, ბელგიასა და ხორვატიაში.
ხოსეპ გვარდიოლას გუნდისა და ჯუზეპე მეაცას ბინადრების შემდეგ, მოდიან მადრიდის რეალი, ბარსელონა და პარის სენ-ჟერმენი - 12 ფეხბურთელი. ევრო 2024-ზე ერთი კლუბიდან აღებული მოთამაშეების სატრანსფერო ღირებულების გათვალისწინებით, პირველ პოზიციაზე 826 მილიონ ევროთი ეტიჰადელები არიან.
სიტის მოსდევს პსჟ (658 მილიონი ევრო), სამეულს კი ლონდონის არსენალი (585 მილიონი ევრო) ხურავს. ცალკე გამოსარჩევია ის, თუ რა თანხას უხდის უეფა იმ კლუბებს, რომელთა მოთამაშეები ევროპის ჩემპიონატზე გამოდიან. წლევანდელი ტურნირისთვის უეფამ გამოყო 240 მილიონი ევრო, რომელიც მთლიანად კლუბებს მოხმარდება.
ტურნირიდან ტურნირამდე, თანხა იზრდება, მაგალითად, 2008 წლის ევროპის ჩემპიონატზე გამოყოფილი იყო 43 მილიონი ევრო, 2012-ში - 100 მილიონი, 2016 წელს 150 მილიონი, უკანასკნელ ევროზე კი 200 მილიონი. არ აქვს მნიშვნელობა დაფიქსირებულ შედეგებს, ამ სქემაში მთავარია ის, თუ რამდენ დღეს გაატარებს მოთამაშე ჩემპიონატზე.
ათვლა იწყება პირველი შეხვედრის გამართვიდან 10 დღით ადრე. მაგალითად, თუ ფეხბურთელი პირველ მატჩს გამართავს 18 ივნისს, ათვლა იწყება 8 ივნისიდან, საბოლოო წერტილი კი იქნება მომენტი, როდესაც გუნდი ტურნირს გამოეთიშება. არის კიდევ ერთი სქემა: კლუბები 3 კატეგორიად არის დაყოფილი.
პირველი კატეგორიის გუნდების ფეხბურთელებზე გამოყოფილია 8700 ევრო დღიურად, მეორე კატეგორიაზე - 5800 ევრო, მესამეზე კი - 2900. რის მიხედვით ყოფს უეფა კლუებებს 3 კატეგორიად ოფიციალურად ცნობილი არ არის. როგორც ვხედავთ, ევრო 2024-ზე მოთამაშეების გაშვებით ყველაზე დიდ ფინანსურ მოგებას ნახავენ სიტი და ინტერი, რომლებსაც როგორც აღვნიშნეთ 13-13 მოთამაშე ეყოლებათ.
