ინტერი 2:4 მილანი (სერია ა, მე-8 ტური, 21/10/2001)
სეზონი, რომელშიც ინტერმა ჩემპიონობის შანსი ბოლო ტურში გაუშვა. იქამდე იყო კიდევ ერთი მძიმე მომენტი - უპირატესობის განიავება და წაგება მილანთან. ნიკოლა ვენტოლას გატანილ ბურთს მეზობლებმა უპასუხეს 4 გოლით, დუბლი ანდრეი შევჩენკომ გაიფორმა. მატჩის მიწურულს "ნერაძურის" მხრიდან ერთი ბურთი მოჰამედ კალონმა გაქვითა.
მილანი 3:2 ინტერი (სერია ა, 22-ე ტური, 21/02/2004)
მილანის სასკუდეტო სეზონი. მეორე წრის დასაწყისში ინტერს ჰქონდა თანაქალაქელების შეჩერების მცდელობა - დეიან სტანკოვიჩისა და კრისტიანო ძანეტის გატანილი ბურთებით, "ნერაძური" პირველი ნახევრის ბოლოსთვის 2:0-ს იგებდა. სკუდეტოს მოწყურებულმა "როსონერიმ" საპასუხოდ გაიტანა 3, იონ დალ ტომასონის, რიკარდო კაკასა და კლარენს ზეედორფის დამსახურებით.
მილანი 2:1 ინტერი (იტალიის სუპერთასი, 06/08/2011)
მომენტი, როდესაც სერია ა-ს ტრიუმფატორი მილანი კოპა იტალის მფლობელ ინტერს დაუპირისპირდა. უესლი სნეიდერის ჯარიმას მოქმედმა ჩემპიონმა "როსონერიმ" ზლატან იბრაჰიმოვიჩისა და კევინ-პრინს ბოატენგის გატანილი ბურთებით უპასუხა. საინტერესოა ის, რომ ქამბექი შედგა 8 წუთში, 61-69 წუთების შუალედში.
ინტერი 1:2 მილანი (სერია ა, 24-ე ტური, 05/02/2022)
მილანის კიდევ ერთი საჩემპიონო სეზონი და აღსანიშნავია ის, რომ ამ შეხვედრის მომენტისთვის სერია ა-ს სატურნირო ცხრილში პირველ ადგილზე ინტერი იყო. პირველი ნახევარი ივან პერიშიჩის გატანილი ბურთით მოიგო იმდროინდელმა ლიდერმა, მაგრამ მე-2 ტაიმში, ოლივიე ჟირუმ 3 წუთის შუალედში "ნერაძურის" კარი 2-ჯერ აიღო.
მილანი 3:2 ინტერი (სერია ა, მე-5 ტური, 03/09/2022)
სეზონი, რომელშიც ინტერიც და მილანიც ხვიჩა კვარაცხელიას ნაპოლის შეჩერებას ცდილობდნენ. რაც შეეხება მათ დაპირისპირებას პირველ წრეში, მარსელო ბროზოვიჩის გატანილ ბურთს "როსონერიმ" უპასუხა რაფა ლეაოს დუბლითა და ოლივიე ჟირუს 1 გოლით. "ნერაძურის" მხრიდან გაიტანა ედინ ჯეკომაც, მაგრამ ეს საკმარისი არ იყო.
ინტერი 2:3 მილანი (იტალიის სუპერთასის ფინალი, 06/01/2025)
ბოლოს კი შეხვედრა, რომლის შთაბეჭდილებისგან საფეხბურთო სამყარო ჯერ არ გამოსულა. ინტერი ლაუტარო მარტინესისა და მედჰი ტარემის გოლებით მშვიდად მიდიოდა ტიტულის მოგებისკენ, მაგრამ ტეო ერნანდესმა, კრისტიან პულიშიჩმა და ტემი აბრაჰამმა ყველაფერი თავდაყირა დააყენეს. სუპერთასი მილანს დარჩა.
