თბილისური დუელიდან ბარსელონურ ქამბექამდე | ენრიკე VS ემერი

თბილისური შეხვედრა - უეფას სუპერთასი

როგორც გვახსოვს, 10 წლის წინ, უეფას სუპერთასი სწორედ საქართველოს დედაქალაქში ჩატარდა. ჩემპიონთა ლიგის გამარჯვებულს წარმოადგენდა ენრიკეს ბარსა, ევროპა ლიგის ტრიუმფატორს კი ემერის სევილია. დინამო არენაზე დამსწრე მაყურებელმა იხილა 9-ბურთიანი თრილერი, რომელიც 120 წუთის განმავლობაში გრძელდებოდა.

რაც შეეხება უშუალოდ მატჩის მიმდინარეობას, ანგარიში საჯარიმო დარტყმით მესამე წუთზე გახსნა ევერ ბანეგამ, რითაც ანდალუსიელები წინ გაიყვანა. "თეთრ-წითლების" ფლეიმეიქერის სტანდარტიდან ზუსტად 4 წუთში, ჯარიმა შეაგდო ლეო მესიმაც და 9 წუთის შემდეგ, მეორეც. პირველი ნახევრის მიწურულს "ლოს ნერვიონენსეს" კარი რაფინია ალკანტარამაც აიღო.

მეორე ტაიმის დასაწყისში ლუის სუარესმა სხვაობა გახადა დამანგრეველი და მატჩის ინტრიგაც თითქოს მოკლა, თუმცა რამონ სანჩეს პისხუანის ბინადრები დანებებას არ აპირებდნენ. 57-ე - 81-ე წუთების შუალედში ემერის გუნდმა კატალონიელებს 3 ბურთი შეუგდო. თავი გამოიჩინეს ხოსე ანტონიო რეიესმა, კევინ გამეირომ და იევგენ კონოპლიანკამ.

მატჩის ძირითადი დრო დასრულდა ანგარიშით 4:4, ექსტრა ტაიმების დამთავრებამდე ხუთი წუთით ადრე კი პედრო როდრიგესმა "ბლაუგრანასთვის" ტიტულის მომტანი ბურთი შეაგდო. ეს იყო ესპანელი სპეციალისტების პირველი შეხვედრა სამშობლოს ფარგლებს გარეთ, მაგრამ დრომ გვიჩვენა, რომ არა უკანასკნელი.

თბილისში გამართული უეფას სუპერთასის შემდეგ, ლუისი და უნაი ერთმანეთს გადაეყარნენ ლა ლიგის მომდევნო სეზონშიც - ერთხელ იმარჯვეს "ლურჯ-ბროწეულისფრებმა", ერთხელაც სევილიამ მოიგო. საინტერესოა ისიც, რომ ასტონ ვილას ამჟამინდელმა დამრიგებელმა თავისი ერთ-ერთი ყველაზე უხერხული მეტოქე მე-6 ცდაზე დაამარცხა.

53 წლის მწვრთნელის სიხარული არ გაგრძელებულა დიდხანს, რადგან იმავე სეზონის ბოლოს, კამპ ნოუს ბინადრებმა ანდალუსიელებს კოპა დელ რეის ფინალში მოუგეს. ენრიკეს უპირატესობა ემერიზე ხდებოდა უბრალოდ კოლოსალური: 8 შეხვედრა, 6 მოგება, 1 ფრე და 1 წაგება. რთული გამოსაცნობი არ არის, თუ რომელი სპეციალისტის სასარგებლოდ იყო ეს სტატისტიკა.

ისტორიული ქამბექი, რომელმაც საფეხბურთო სამყარო გააოგნა

2016 წელს უნაიმ დატოვა სევილია და პარის სენ-ჟერმენის მთავარი მწვრთნელის თანამდებობაზე ლორან ბლანი შეცვალა. ენრიკე დარჩა ბარსელონაში და ბასკ ოპონენტს ამჯერად უკვე ევროპის მთავარ საკლუბო ტურნირზე შეხვდა. ეს ყველაფერი მოხდა 1/8 ფინალში, რომელშიც კატალონიელებს სწორედ პსჟ დაუპირისპირდა.

პირველი მატჩი ემერისთვის დასრულდა ზღაპრულად - პარიზმა "ბლაუგრანა" 4:0 გაანადგურა. ანხელ დი მარიას დუბლი, ასევე თითო გოლი ედინსონ კავანისა და იულიან დრაქსლერისგან..."ლურჯ-წითლები" მორალურად უკვე 1/4 ფინალისკენ ემზადებოდნენ. რაც შეეხება საპასუხო შეხვედრას, მაყურებელმა იხილა ნამდვილი საფეხბურთო დღესასწაული, რომელიც პარკ დე პრენსის ბინადრებისთვის კოშმარად იქცა.

პირველ მატჩში დაფიქსირებული ანგარიშიდან გამომდინარე, "ლურჯ-ბროწეულისფრებს" სჭირდებოდათ გამარჯვება მინიმუმ ოთხგოლიანი უპირატესობით, ბურთის გაშვების შემთხვევაში კი ხუთით. დიახ, კამპ ნოუს ბინადრებმა გაუშვეს 1 გოლი, მაგრამ საპასუხოდ 6 შეაგდეს. ზღაპრულ განწყობაზე ამჯერად იყო ასტურიელი სპეციალისტი და არა მისი ოპონენტი.

ყველაფერი დაიწყო სუარესის მიერ გატანილი თავურით, რასაც პირველი ტაიმის ბოლომდე მოყვა კურზავას ავტოგოლი და მესის პენალტი. ენრიკეს გუნდმა იგრძნო, რომ ქამბექის მოხდენა სულაც არ იყო არარეალური და ეს სულისკვეთება ვერც კავანის მიერ 62-ე წუთზე შეგდებულმა ბურთმა ჩააქრო. ბარსა გაჩერებას არ აპირებდა.

უნდა აღინიშნოს ისიც, რომ ურუგვაელი თავდამსხმელის გოლის შემდეგ, კატალონიელების ამოცანა უფრო გართულდა - საჭირო იყო უკვე არა ორის, არამედ სამი ბურთის შეგდება. "ბლაუგრანას" სასწაული დაიწყო 88-ე წუთიდან, როდესაც ნეიმარ ჟუნიორმა შეაგდო ჯერ ჯარიმიდან, 3 წუთის შემდეგ კი 11-მეტრიანიდან.

ტაბლოზე ანათებდა 5:1, თუმცა მეოთხედფინალში გასასვლელად "ლურჯ-ბროწეულისფრებისთვის" ეს საკმარისი არ იყო. კულმინაცია მოხდა 95-ე წუთზე - ბრაზილიელი ფორვარდის ჩაწოდებას ოპერატიულად გამოეხმაურა სერხი რობერტო, რომელმაც ემერის გუნდს მე-6 ბურთი შეუგდო. კამპ ნოუ დაინგრა, ისევე როგორც პარის სენ-ჟერმენი, მაგრამ მიზეზი განსხვავებული იყო.

აღსანიშნავია სანტოსის ამჟამინდელი კაპიტნის სტატისტიკა, რომელიც მოიცავდა ორ გოლსა და ორ საგოლე გადაცემას - ობიექტურად, საუკეთესო მატჩი ენრიკეს გუნდის მე-11 ნომრის კარიერაში. ამით, ორი სპეციალისტის დუელი დასრულდა, მაგრამ არა სამუდამოდ. დაუვიწყარი ქამბექიდან 8 წლის შემდეგ, ესპანელი ტაქტიკოსები ერთმანეთს კვლავ უპირისპირდებიან.

უნაი ხელმძღვანელობს ბირმინგემულ გუნდს, ლუისი კი პსჟ-ს, სწორედ იმ კლუბს, რომელსაც წლების წინ, 0:4-ის შემდეგ, თამაში შემოუბრუნა. რა ხდებოდა იქამდე? პარიზელთა ამჟამინდელმა სპეციალისტმა რამდენიმე წლით გადაინაცვლა სანაკრებო ფეხბურთში და ესპანეთის ეროვნულ გუნდში იმუშავა. "ვილანების" თავკაცმა კი ძალები არსენალსა და ვილიარეალში მოსინჯა.

ემერის პარიზიდან ენრიკეს პარიზამდე

ემერიდან - ენრიკემდე სხვაობა არის ხუთი წელი და უნდა აღინიშნოს ის ფაქტი, რომ პარის სენ-ჟერმენმა დროის ამ შუალედში იდეოლოგია მკვეთრად შეიცვალა. ბასკი თავკაცის მოღვაწეობის პერიოდში პსჟ ჯერ კიდევ იყო ის "ფულის ტომარა", რომელიც მხოლოდ შემდგარი და ვარსკვლავური მოთამაშეებით ინტერესდებოდა.

ბარსელონასთან განადგურების მიუხედავად, უნაი დატოვეს პარიზში, ზაფხულში კი მას ნეიმარისა და მბაპეს დუეტიც მიუყვანეს. დიახ, დედაქალაქური კლუბი სატრანსფერო რეკორდებს სწორედ ასტონ ვილას ამჟამინდელი თავკაცის მოღვაწეობის დროს ხსნიდა. გამოადგნენ თუ არა მას ბრაზილიელი და ფრანგი ფორვარდები? სამწუხაროდ, არა.

ვარსკვლავებით გადავსებული "ლურჯ-წითლები" ჩემპიონთა ლიგიდან გამოვარდნენ მერვედფინალში, მადრიდის რეალთან ორმატჩიანი დაპირისპირების შემდეგ. სეზონის ბოლოს, პარკ დე პრენსი 53 წლის თავკაცს დაემშვიდობა. მის შემდეგ, დედაქალაქურ კლუბში მუშაობის მცდელობა ჰქონდათ ტომას ტუხელს, მაურისიო პოჩეტინოსა და კრისტოფ გალტიეს, მაგრამ მათი მოღვაწეობა ემერის შედეგებისგან დიდად არ განსხვავდებოდა.

შეგვიძლია გამოვარჩიოთ მხოლოდ გერმანელი მწვრთნელი, რომლის მუშაობის დროს მისი გუნდი ჩემპიონთა ლიგის ფინალამდე მივიდა. აქვე დავამატებთ, რომ იმ პერიოდში პარის სენ-ჟერმენის ისედაც ვარსკვლავური შემადგენლობა მესითა და რამოსით შეივსო. რას ვხედავთ ახლა? დედაქალაქური კლუბი თავიდან ბოლომდე ახალგაზრდა მოთამაშეებზე არის აგებული.

აღნიშნული ხედვა პსჟ-ში შემოიტანა ასტურიელმა მწვრთნელმა, რომელმაც ფრანგული გუნდის პომპეზურ სატრანსფერო პოლიტიკაზე უარი თქვა. დღეს, პარიზში ბრწყინავენ ჯანლუიჯი დონარუმა, აშრაფ ჰაკიმი, ხვიჩა კვარაცხელია, ოსმან დემბელე, ბრედლი ბარკოლა და სხვები. საუბარია მოთამაშეებზე, რომლებიც მოტივაციის ნაკლებობას ნამდვილად არ უჩივიან.

"ლურჯ-წითლებმა" ლივერპულის დამარცხების სახით პირველი რთული გამოცდა უკვე ჩააბარეს. ვნახოთ, რა იქნება ბირმინგემელებთან მიმართებაში. რაც შეეხება ბასკ თავკაცს, "ვილანებში" მან მიიღო ის, რისი ბედნიერებაც პარკ დე პრენსზე არ ჰქონდა. საუბარია შემადგენლობაზე, რომელიც მის იდეებსა და ხედვას თავიდან ბოლომდე იაზრებს.