ზურიკო დავითაშვილი — კიდევ ერთი სინათლე საქართველოდან და ბოლო იმედი სენტ-ეტიენისთვის

ფეთქებადი ქართველი ფეხბურთელი, ზურიკო იყო იმ მცირერიცხოვან მოთამაშეებს შორის, ვინც ამ ზაფხულს ბორდოს ნამსხვრევებს შედარებით უვნებლად გადაურჩა. ზურიკო დავითაშვილი, რომელიც საფრანგეთში ბათუმის დინამოდან 2022 წელს გადავიდა, იყო ბორდოს ნათელი წერტილი ბოლო ორ სეზონში და ზოგადად, ერთ-ერთი გამორჩეული მოთამაშე საფრანგეთის მეორე ლიგაში. ამ დროში ქართველმა ფეხბურთელმა 71 მატჩში მიიღო მონაწილეობა, გაიტანა 14 გოლი და 12 საგოლე გადაცემითაც გამოიჩინა თავი.

მიუხედავად იმისა, რომ ფეხბურთელს რამდენიმე ჩაგდებული თამაში ჰქონდა, დავითაშვილი საფრანგეთში ჩამოსვლისთანავე მალევე იქცა გუნდის ლიდერად. ის ყველასგან გამორჩეული იყო, თავისი გაბედული დრიბლინგებითა და დაუღალავი სირბილით. მიუხედავად იმისა, რომ ის არაა გოლეადორი, როგორც სხვა შემტევი ფეხბურთელები, გარემარბისთვის გამორჩეულად შრომისმოყვარეა და გუნდისთვის ბოლომდე იხარჯება.

თავისი მეგობრის, ხვიჩა კვაარცხელიას მსგავსად, ზურიკოც თავს ყველაზე კომფორტულად მარცხენა ფლანგზე გრძნობს. თუმცა მისი მრავალფეროვნება რჩება მის ერთ-ერთ გამორჩეულ თვისებად. მას შეუძლია რამდენიმე პოზიციის დაფარვა, შესაბამისად, მის კარიერაში ყოფილა ისეთი შემთხვევები, როდესაც დავითაშვილს სხვა პოზიციებზეც უთამაშია, მათ შორის საყრდენ ზონაშიც კი.

დავითაშილმა ყველას ყურადღება მაინც წინა სეზონში მიიპყრო, როდესაც ბორდოს რამდენიმემატჩიანი გამონათება ჰქონდა. ბორდოს ბოლო ცხრა თამაშში ათი გოლის გატანით, გარემარბმა შეძლო და ყველა აალაპარაკა. იმის მიუხედავად, რომ ბორდო განწირული იყო, ზურიკომ მოახერხა და ლიგა 1-ის კლუბების ინტერესი დაიმსახურა.

შემდეგ იყო ბორდოს ფინანსური პრობლემები, რასაც საბოლოო ჯამში, სამოყვარულო ლიგაში დაქვეითება მოჰყვა...ევრო 2024-ზე დავითაშვილის საქართველომ ისტორია დაწერა, მალევე კი ფეხბურთელი სენტ-ეტიენში აღმოჩნდა, ფრანგული ფეხბურთის კიდევ ერთ "დაღუპულ" გიგანტში, რომელმაც, ბორდოსგან განსხვავებით, მოახერხა ლიგა 2-დან თავის დაღწევა და დაბრუნება იქ, სადაც მისი ადგილია, ლიგა 1-ში.

დავითაშვილმა სენტ-ეტიენში ადგილი მალევე დაიმკვიდრა, რასაც ოქტომბრის თვის საუკეთესო ფეხბურთელად დასახელებაც მოჰყვა. ქართველი ფეხბურთელის კარგი ფორმა, მისთვის სამწუხაროდ გუნდზე დიდად არ აისახა. სენტ-ეტიენი ლიგა 1-ში დასარჩენად იბრძვის და დიდი ალბათობით, ასე იქნება სეზონის ბოლომდეც. გუნდმა რამდენიმე მნიშვნელოვანი მატჩის მოგება მოახერხა, თუმცა ეს თავიდან ბოლომდე ქართველი ფხეხბურთელის დამსახურება იყო. ზურიკო გუნდის ერთადერთი ნათელი წერტილია, გუნდის მთავარი მამოძრავებელი ძალა, რომელიც ყველაფერს აკეთებს გუნდის გადასარჩენად. მან კარგად იცის როგორია ასეთ გუნდში თამაში, ბორდოში დიდი გამოცდილება მიიღო, თუმცა ახლა სიტუაცია ბევრად რთულადაა, რადგან საუბარია ლიგა 1-ზე და არა მეორე დივიზიონზე. უახლოეს თვეებში დავითაშვილს სხვა ფეხბურთელებმაც თუ არ აუბეს მხარი, გუნდი ლიგა 2-ში გასავარდნადაა განწირული.

ოქტომბრის თვეში, დავითაშვილმა თავი ოსერთან ჰეთ-თრიკითა და ანჟესთან დუბლით გამოიჩინა. გარემარბი თვის საუკეთესო ფეხბურთელი სრულიად დამსახურებულად გახდა. ზურიკო რჩება სენტ-ეტიენის ყველაზე საშიშ ფორვარდად ამ სეზონში, მაგრამ ერთადერთი რაც დავითაშვილის პოტენციალის სრულად გამოვლენაში უშლის ხელს, საკუთარი ცვალებადი ფორმა და ზოგჯერ გადამწყვეტ მომენტში, არასწორი გადაწყვეტილებების მიღებაა.

მიუხედავად იმისა, რომ ევროპის სცენა ნეაპოლიდან მის თანამემამულეს აქვს დაპყრობილი, დავითაშვილი საფრანგეთში აგრძელებს ბრძოლას — ბრძოლას საკუთარი გუნდის გადასარჩენად. ზურიკო გამორჩეული ქართული თაობის წარმომადგენელია, რომელიც ევროპულ საფეხბურთო რუკაზე საკუთარ ადგილს ნელ-ნელა იმკვიდრებს.