
ქარიმ ბენზემა | რეალი 3:1 პსჟ (ჩემპიონთა ლიგის 1/8 ფინალის საპასუხო მატჩი, 2021/22)
ქამბექი, რომლის შემდეგაც რეალის ტრიუმფალური სვლა დაიწყო. პირველ შეხვედრაში მარცხის შემდეგ, მომავალი ჩემპიონები აგებდნენ განმეორებით მატჩშიც, მაგრამ ბენზემას ჯადოქრობამ ყველაფერი თავდაყირა დააყენა. პარის სენ-ჟერმენის ბარიერის შემდეგ, მადრიდელებმა მოუგეს ლონდონის ჩელსისაც, ასევე ქარიმის ჰეთთრიკით.

ალფრედო დი სტეფანო | რეალი 7:3 აინტრახტი (ჩემპიონთა თასის ფინალი, 1959/60)
ჩემპიონთა თასის ფინალი, რომელშიც არც მეტი არც ნაკლები 10 გოლი გავიდა. აღნიშნული შეხვედრა ყველაზე კარგად ასახავს, თუ როგორი დომინანტური იყო იმდროინდელი რეალი და მისი შემტევი დუეტი: დი სტეფანო - პუშკაში. პირველმა შეასრულა ჰეთთრიკი, მეორემ კი პოკერი. ამ მოგებით, მადრიდელებმა ზედიზედ მე-5 ტიტული მოიპოვეს.

კილიან მბაპე | არგენტინა 3:3 საფრანგეთი (პენ. 4:2) (მსოფლიო ჩემპიონატის ფინალი, 2022)
მბაპეს კარიერაში გვხვდება სამი დიდი ჰეთთრიკი - მანჩესტერ სიტისთან ჩემპიონთა ლიგის პლეიოფში, ბარსელონასთან მერვედფინალში და რა თქმა უნდა, არგენტინასთან, მუნდიალის ფინალში. დემორალიზებული საფრანგეთი გამოაცოცხლა სწორედ მბაპემ, რომელმაც მომავალ ჩემპიონებს 3 ბურთი გაუტანა. ეს ყველაფერი იმის გათვალისწინებით, რომ "მამლები" მე-80 წუთამდე 0:2-ს აგებდნენ.

ლიონელ მესი | ბარსელონა 3:3 რეალი (ლა ლიგის მე-16 ტური, 2006/07)
მესის კარიერაში პირველი ჰეთთრიკი, თანაც პირდაპირ ელ კლასიკოში, რეალის წინააღმდეგ. აღსანიშნავია, რომ ლეგენდარული შემტევი იმ მომენტისთვის სულ რაღაც 19 წლის იყო. წლების შემდეგ, ლეო კიდევ ერთ მატჩში გაუტანს მადრიდელებს 3 ბურთს, მაგრამ ცხადია, პირველი ჰეთთრიკი მაინც ყველაზე განსაკუთრებულია.

ედსონ არანტეს დო ნასიმენტო პელე | ბრაზილია 5:2 საფრანგეთი (მსოფლიო ჩემპიონატის 1/2 ფინალი, 1958)
ბრაზილიური ფეხბურთის დომინირების დასაწყისი - სამგზის მსოფლიო ჩემპიონობა 1958 - 1970 წლების შუალედში. ეს ყველაფერი წარმოუდგენელი იქნებოდა პელეს გარეშე, რომელმაც უბრალოდ წარუშლელი კვალი დატოვა. საფრანგეთთან ჰეთთრიკის მომენტისთვის ის იყო სულ რაღაც 17 წლის, მაგრამ გამოუცდელობა ედსონს სულაც არ ეტყობოდა.

კრიშტიანუ რონალდუ | პორტუგალია 3:3 ესპანეთი (მსოფლიო ჩემპიონატის ჯგუფური ეტაპი, 2018)
ჰეთთრიკების მეფე, რომლის კარიერიდან ერთის ამორჩევა პრაქტიკულად წარმოუდგენელია. რონალდუს გოლებით რეალი აქამბექებდა ჩემპიონთა ლიგის პლეიოფში და შემდეგ, ტიტულებს იგებდა. რატომ ესპანეთთან მატჩი? ეს ყველაფერი მოხდა მუნდიალზე, თავისი ქვეყნის ეროვნული გუნდის მაისურით, თანაც დრამატულ დაპირისპირებაში.

რონალდო ნაზარიო | მანჩესტერ იუნაიტედი 4:3 რეალი (ჩემპიონთა ლიგის 1/4 ფინალის საპასუხო მატჩი, 2002/03)
რონალდოს საუკეთესო შეხვედრა ჩემპიონთა ლიგაზე. ლეგენდარულმა თავდამსხმელმა გააკეთა ყველაფერი იმისთვის, რომ ნახევარფინალში გასულიყო რეალი და არა მანჩესტერი. საინტერესოა, რომ ნაზარიომ ჰეთთრიკი შეასრულა ფაბიენ ბარტეზის წინააღმდეგ, იმ გოლკიპერთან, რომელსაც 1998 წლის მუნდიალის ფინალში ვერაფერი მოუხერხა.

ანდრეი შევჩენკო | ბარსელონა 0:4 დინამო კიევი (ჩემპიონთა ლიგის ჯგუფური ეტაპი, 1997/98)
შეხვედრა, რომელშიც შევჩენკომ პირველივე ტაიმში გადაწყვიტა ყველაფერი. დიახ, ბარსელონა და დინამო შესვენებაზე გავიდნენ მაშინ, როდესაც ტაბლოზე იყო 0:3, ისე რომ სამივე ბურთი სწორედ ანდრეიმ გაიტანა. აღსანიშნავია, რომ ლეგენდარული ფორვარდი იმ მომენტისთვის სულ რაღაც 21 წლის იყო.

ლუის სუარესი | ბარსელონა 5:1 რეალი (ლა ლიგის მე-10 ტური, 2018/19)
როდესაც საქმე ეხება რეალის განადგურებას, პირველ რიგში გვახსენდება მესი, თუმცა ამჯერად ყურადღების ცენტრში სუარესი მოექცა. საუკეთესო მეგობრის ტრავმის შემდეგ, ბარსას ლიდერობა ითავა ლუისმა, რომელმაც მადრიდელებს ჰეთთრიკი შეუსრულა. ლეოს არყოფნა ნამდვილად არ ყოფილა შესამჩნევი ურუგვაელი ფორვარდის დამსახურებით.

მარკო ვან ბასტენი | ინგლისი 1:3 ნიდერლანდები (ევროპის ჩემპიონატის ჯგუფური ეტაპი, 1988)
ნიდერლანდების ნაკრებისთვისა და პერსონალურად ვან ბასტენისთვის ტრიუმფალური ტურნირი, რომელიც ჩემპიონობით დაგვირგვინდა. იქამდე იყო ჯგუფური ეტაპი, რომელზეც მარკომ ინგლისს ჰეთთრიკი შეუსრულა. მასზე შედეგიანი, ეფექტური და წარმატებული ევრო 88-ზე არავინ ყოფილა.

















