სერხიო აგუერო - 33 წლის
2021 წელს, აგუერო მანჩესტერ სიტიდან გადავიდა ბარსელონაში და ეს ნაბიჯი უნდა ყოფილიყო მისი კარიერის ახალი ეტაპი, თუმცა ყველაფერი ნაადრევად დასრულდა. ამის მიზეზი გახდა გულის პრობლემა, რის გამოც სერხიოს კარიერის დასრულება მოუწია. მან კატალონიაში 5 მატჩის ჩატარება და 1 ბურთის გატანა მოასწრო.
გარეთ ბეილი - 34 წლის
ერთ დროს მსოფლიოს ყველაზე ძვირადღირებული ფეხბურთელი, რომელიც დროთა განმავლობაში ფეხბურთს ჩამოშორდა. გოლფი და ტრავმები - ეს არის 2 ძირითადი მიზეზი, რის გამოც ბეილმა კარიერა ნაადრევად დაასრულა. კარიერის ბოლოს მან ბურთი გააგორა მლს-ში, ლოს ანჯელესის შემადგენლობაში. გარეთის მონაგარი 13 მატჩსა და 3 ბურთს შეადგენდა.
ერიკ კანტონა - 30 წლის
ფეხბურთის ისტორიაში ერთ-ერთი ყველაზე სკანდალური ფეხბურთელი, რომლის კარიერაში მრავლად იყო სხვადასხვა სახის დისკვალიფიკაციები. ერთ-ერთი ასეთის გასვლის შემდეგ, კანტონამ 30 წლის ასაკში კარიერა დაასრულა. მისი მიზანი იყო ლამაზად წასვლა, კარიერის პიკზე, სამუდამოდ მეფედ რომ დარჩენილიყო.
ედენ აზარი - 32 წლის
ლონდონის ჩელსის ისტორიაში ერთ-ერთი საუკეთესო ფეხბურთელი, რომელიც ახალი გამოწვევისთვის მადრიდის რეალში გადავიდა. აზარმა დროის უმეტესი ნაწილი გაატარა ლაზარეთში და 4 სეზონის მანძილზე არასრული 76 მატჩის ჩატარება შეძლო. ამ ყველაფრის მიუხედავად, ედენმა მადრიდში ტიტულების კოლექცია 6 თასით შეავსო.
ტონი კროოსი - 34 წლის
34 წელი არც ისე პატარა ასაკია, თუმცა კროოსის მიმართებაში ნამდვილად ითქმის, რომ ის ნაადრევად წავიდა. თავის უკანასკნელ სეზონში მან რეალთან ერთად მოიგო ჩემპიონთა ლიგა, შემდეგ კი ტონი დაბრუნდა გერმანიის ეროვნულ გუნდში, ევრო 2024-ზე სათამაშოდ. მას არ დაუგდია არც თამაშის ხარისხი და არც ტემპი.
ფილიპ ლამი - 32 წლის
ერთ-ერთი ყველაზე ელეგანტური მცველი, რომელსაც კარიერის განმავლობაში წითელი ბარათი არ მიუღია. ლამი იყო სულ რაღაც 32 წლის, როდესაც კარიერის დასრულება გადაწყვიტა. ფილიპს არ ჰქონია ტრავმები, მან უბრალოდ მაშინ შეწყვიტა ფეხბურთის თამაში, როდესაც ამ საქმისგან სიამოვნების მიღება შეწყვიტა.
მიშელ პლატინი - 32 წლის
ერთ-ერთი პირველი, ვინც გვახსენდება ფეხბურთიდან ნაადრევად წასულებზე. პლატინი ბუცების ლურსმანზე ჩამოკიდების მომენტში 32 წლის იყო. კარიერის დასრულებამდე, მიშელმა მოასწრო ჩემპიონთა თასის, ევრო 1984-ისა და 3 ოქროს ბურთის მოგება. მან ფეხბურთის ისტორიაში ერთ-ერთი ყველაზე დიდი მოთამაშის სახელი დატოვა.
მარკო ვან ბასტენი - 30 წლის
ბევრის აზრით, ფეხბურთის ისტორიაში ყველაზე დიდი თავდამსხმელი, რომლის კარიერა იქნებოდა კიდევ უფრო შთამბეჭდავი, რომ არა ტრავმები. ვან ბასტენმა კარიერა დაასრულა 30 წლის ასაკში, მაგრამ მოედანზე ის 28 წლამდეც არ გამოჩენილა. ასეთი იყო ევრო 1988-ის ტრიუმფატორისა და 3 ოქროს ბურთის მფლობელის გზა.
რაფაელ ვარანი - 31 წლის
ფეხბურთელი, რომელმაც 25 წლის ასაკისთვის ყველაფერი მოიგო. ვარანის ანგარიშზე იყო მსოფლიო ჩემპიონობა და ჩემპიონთა ლიგაზე ტრიუმფი, თანაც არაერთხელ. რაფას დროთა განმავლობაში გაუჩნდა მოტივაციასთან დაკავშირებული პრობლემები, მისი თამაშის ხარისხი კი დაეცა. ამ ყველაფერს დაემატა ტრავმაც, რის გამოც ფრანგი უკანახაზელი ფეხბურთიდან 31 წლის ასაკში წავიდა.
ზინედინ ზიდანი - 34 წლის
ზიდანი კარიერის დასრულების მომენტში უკვე იყო სოლიდურ ასაკში, თუმცა მისი თამაშის ხარისხის გათვალისწინებით, ის ნამდვილად ნაადრევად წავიდა. ზინედინმა საფრანგეთის ეროვნული გუნდი გაიყვანა 2006 წლის მუნდიალის ფინალში, სადაც მარკო მატერაცისთან მომხდარი ინციდენტის შემდეგ, წითელი ბარათი მიიღო. იმის შემდეგ, ფრანგი გამთამაშებელი მოედანზე აღარ დაბრუნებულა.
ასევე გამოსარჩევია: სებასტიან დაისლერი, ჟუსტ ფონტენი, კევინ კიგანი, იურგენ კლინსმანი, პატრიკ კლუივერტი, ჰიდეტოში ნაკატა, მაიკლ ოუენი, ფრანკ რაიკაარდი, ტიაგო ალკანტარა.
