რობერტო ბაჯო
იტალიური ფეხბურთის უდიდესი ფიგურა, რომელმაც კარიერის საუკეთესო პერიოდი ფლორენციის ფიორენტინასა და ტურინის იუვენტუსში გაატარა, შემდეგ კი მილანურ კლუბებში გადავიდა. ბაჯო 1995-1997 წლებში იცავდა "როსონერის" ღირსებას, შემდეგ კი ბოლონიას გავლით, გადავიდა ინტერში, სადაც ასევე 2 სეზონი ითამაშა. რობიმ ორივე კლუბში პრაქტიკულად თანაბარი კვალი დატოვა.
ლეონარდო ბონუჩი
ბონუჩის დიდი ფეხბურთი ინტერში დაიწყიო, სადაც ადგილის დამკვიდრება მან ვერ მოახერხა. რამდენიმე პატარა გუნდში თამაშის შემდეგ, მან იპოვა თავისი კარიერის მთავარი კლუბი: იუვე. 2017 წელს, გარკვეული მიზეზების გამო, ლეოს მოუწია მილანში გადასვლა, მაგრამ ზუსტად 1 წლის შემდეგ, ის კვლავ ტურინში დაბრუნდა.
ერნან კრესპო
2002 წლის ზაფხულში მსოფლიო ჩემპიონი რონალდო ნაზარიო, ინტერიდან გადავიდა მადრიდის რეალში და მის შემცვლელად კლუბმა კრესპო გაიფორმა. საოცარი სტარტის შემდეგ, ერნანმა ტრავმა მიიღო და "ნერაძურის" რამდენიმე თვით ჩამოშორდა. შემდეგ იყო ტრანსფერი ლონდონის ჩელსიში და იქიდან იჯარა მილანში, რომლის რიგებში მან სტამბოლის ფინალში 2 ბურთი გაიტანა.
"არისტოკრატებთან" კონტრაქტის ამოწურვის შემდეგ, არგენტინელი თავდამსხმელი "ნერაძურიში" დაბრუნდა. უკვე ასაკში მყოფმა ვეტერანმა შემტევმა "გველებთან" ერთად მოიგო 3 სკუდეტო, ბოლოს კი ჯენოას გავლით, მისთვის ასევე ნაცნობ პარმაში მან კარიერა დაასრულა. საფეხბურთო კარიერის დასრულების შემდეგ, "შავ-ლურჯების" ყოფილმა ფორვარდმა სამწვრთნელო საქმიანობა დაიწყო.
ზლატან იბრაჰიმოვიჩი
იუვენტუსის სერია ბ-ში დაქვეითების შემდეგ, იბრაჰიმოვიჩი დათანხმდა ინტერის წინადადებას, რის შედეგადაც ამ გუნდის რიგებში მან სამი სეზონი გაატარა. შემდეგ იყო ბარტერი სამუელ ეტოოზე და ტრანსფერი ბარსელონაში, 1 წლის შემდეგ კი მილანში გადასვლა. 2 სეზონის შემდეგ, ზლატანი გადავიდა პარის სენ-ჟერმენში, კარიერის ბოლოს ის "როსონერიში" დაბრუნდა. ყოფილი შვედი ფორვარდი ახლაც ამ კლუბის სტრუქტურაშია.
ჯუზეპე მეაცა
ფეხბურთელი, რომლის სახელს ატარებს ორივე კლუბის სტადიონი, როდესაც მასპინძლის სტატუსი ინტერს აქვს. მეაცა 284 გოლით ყველა დროის საუკეთესო გოლეადორია "ნერაძურის" ისტორიაში. ჯუზეპეს მემკვიდრეობა 70 წლის მერეც ხელშეუხებელია. ცნობისთვის, 2 სეზონი მას მილანშიც აქვს გატარებული.
ანდრეა პირლო
პირლო კარიერის დასაწყისში თამაშობდა თავდამსხმელად და ინტერშიც ის ამ პოზიციაზე განიხილებოდა. ვერ დამკვიდრების შემდეგ, ის იჯარით გაუშვეს რეჯინასა და მშობლიურ ბრეშიაში, სადაც ანდრეა რეჯისტად მოგვევლინა. მოგვიანებით, მის კარიერაში გაჩნდა მილანი და მან ამ კლუბთან ერთად ისტორია დაწერა. ობიექტურად, იტალიელი ფეხბურთის ისტორიაში ერთ-ერთი საუკეთესო შუახაზელია.
რონალდო ნაზარიო
ინტერის ისტორიაში ერთ-ერთი უმნიშვნელოვანესი ფეხბურთელი, რომელმაც როგორც კლუბის, ისე ზოგადად იტალიური ფეხბურთის პოპულარიზაციაში უდიდესი როლი ითამაშა. "ნერაძურიში" რონალდო გადავიდა მსოფლიოს საუკეთესო მოთამაშის სტატუსით და მან ოქროს ბურთიც მოიგო. რა მოხდა შემდეგ? გაუთავებელი ტრავმები და კარიერის დასრულების საშიშროებაც კი.
ნაზარიო დაბრუნდა 2002 წლის მსოფლიო ჩემპიონატზე, სადაც მან ძველებურად ფურორი მოახდინა. რეალში გატარებული რამდენიმე სეზონის შემდეგ კი ბრაზილიელი ფორვარდის ევროპული კარიერის ბოლო კლუბი მილანი აღმოჩნდა. ტრავმატული პერიოდისა და ჭარბი წონის მიუხედავად, "გველების" ყოფილმა შემტევმა მცირე კვალი "როსონერიშიც" დატოვა.
კლარენს ზეედორფი
ფეხბურთის ისტორიაში ერთ-ერთი ყველაზე დიდი სატრანსფერო შეცდომა, რომლის ავტორი ინტერია. ზეედორფი შეეწირა კლუბის უცნაურ სატრანსფერო პოლიტიკას, როდესაც "ნერაძურიმ" და მეზობლებმა ერთმანეთში 3-3 მოთამაშე გაცვალეს. მილანმა კლარენსთან ერთად მიიღო პირლოც, საპირისპირო მიმართულებით კი წავიდნენ ისეთი მოთამაშეები, რომლებსაც ფეხბურთი პრაქტიკულად არც უთამაშიათ.
ნიდერლანდელის სახით, "როსონერიმ" მიიღო ფეხბურთის ისტორიაში ერთ-ერთი საუკეთესო ნახევარმცველი, რომელმაც ჩემპიონთა ლიგის თასის აღმართვა მოახერხა 3 სხვადასხვა კლუბთან: აიაქსთან, რეალთან და "შავ-წითლებთან" ერთად. როგორც ვხედავთ, "გველების" სატრანსფერო შეცდომების გარეშე, 2000-იანი წლების ფორმაციის "ეშმაკების" წარმატება პრაქტიკულად წარმოუდგენელი იქნებოდა.
პატრიკ ვიეირა
ფეხბურთელი, რომელიც პირველ რიგში, ლონდონის არსენალთან ასოცირდება. კანიდან წასვლით, ვიეირას პირველი დიდი გუნდი იყო მილანი, თუმცა ერთ სეზონში ხუთი მატჩის ჩატარების შემდეგ, ისტორიის დასაწერად ის "მეთოფეებში" გადავიდა. კარიერის მიწურულს პატრიკი დაბრუნდა კალჩოში, ჯერ იუვეში, შემდეგ კი - ინტერში.
კრისტიან ვიერი
ვიერიმ კარიერის განმავლობაში გამოიცვალა არაერთი გუნდი, თუმცა ყველაზე დიდი კვალი მან ინტერში დატოვა. ექვს სეზონში 120-ზე მეტი გოლის გატანის შემდეგ, კრისტიანი "ნერაძურის" დაემშვიდობა და მილანს შეუერთდა. ის ახალ კლუბში სულ რაღაც ნახევარი წლით გააჩერეს, შემდეგ კი ყოფილ იტალიელ ფორვარდს კონტრაქტი გაუწყვიტეს.
ასევე გამოსარჩევია: ფრანჩესკო აჩერბი, მარიო ბალოტელი, სერჟიო ბატისტინი, ლორენცო ბუფონი, ჰაკან ჩალჰანოღლუ, ანტონიო კასანო, ალდო ჩევენინი, ლუიჯი ჩევენინი, ფულვიო კოლოვატი, მატეო დარმიანი, ედგარ დავიდსი, ჯორჯო გეზი, ამანტეო მანსინი, სალი მუნტარი, კრისტიან პანუჩი, ჯამპაოლი პაცინი და სხვები.
