სერხიო აგუერო
აგუერომ ოქროს მედალი 2008 წლის თამაშებზე მოიპოვა. აღნიშნულ ოლიმპიადაზე არგენტინამ თავისი სუპერთაობით დაუვიწყარი შთაბეჭდილება დატოვა. ჯგუფური ეტაპის უმარტივესად გავლის შემდეგ, "ალბისელესტემ" პლეიოფში მოუგო ნიდერლანდებსა და ბრაზილიას, ფინალში კი - ნიგერიას. თავად სერხიომ 1/2 ფინალში "სელესაოს" დუბლი შეუსრულა.
ანხელ დი მარია
კვლავ 2008 წლის ოლიმპიადა და არგენტინის კიდევ ერთი ვარსკვლავური შემტევი. შეიძლება ითქვას, რომ დი მარიამ თავისი ნაკრებისთვის ორი ყველაზე მნიშვნელოვანი ბურთი შეაგდო. ჯერ 1/8 ფინალში ნიდერლანდებთან, 105-ე წუთზე, როდესაც ანგარიში 1:1 იყო და მეორე ფინალში ნიგერიასთან. "ალბისელესტე" ჩემპიონი სწორედ ანხელის ერთადერთი გოლით გახდა.
სამუელ ეტო'ო
2000 წლის ოლიმპიური თამაშების ტრიუმფატორი, რომელიც მართალია აღნიშნულ ტურნირზე მოწინავე პოზიციაზე არ იყო, თუმცა მომავალში დრომ გვიჩვენა, რომ მასზე წარმატებული მოთამაშე კამერუნს არ ჰყოლია. რაც შეეხება ეტოოს პერფომანსს, მან ესპანეთთან ფინალში ერთი ბურთი გაიტანა, შემდეგ კი 11-მეტრიანიც ზუსტად შეასრულა.
ხოსეპ გვარდიოლა
კიდევ ერთი მტკიცებულება იმისა, რომ გვარდიოლა არა მხოლოდ უმაღლესი დონის მწვრთნელი, არამედ თავის დროზე ფეხბურთელიც ასეთი იყო. 1992 წლის ოლიმპიადაზე ესპანეთის პირველი ბურთი სწორედ პეპმა გაიტანა, რომლის გოლით კოლუმბიის განადგურება დაიწყო. მასთან ერთად, მომავალმა ჩემპიონებმა მოგვიანებით მოუგეს ეგვიპტეს, კატარს, იტალიას, განასა და პოლონეთს.
ჯეი-ჯეი ოკოჩა
ნიგერიის თავგადასავალი 1996 წლის ოლიმპიურ თამაშებზე ნამდვილი ფილმის სცენარს ჰგავდა. ჯგუფურ ეტაპზე ბრაზილიასთან მარცხის შემდეგ, რევანშის აღება 1/2 ფინალში, 7-ბურთიან თრილერში მოხერხდა. "სუპერ არწივებმა" 4:3 მოიგეს, თანაც ისე რომ 78-ე წუთამდე ისინი 1:3-ს აგებდნენ. ფინალში კი არანაკლებ დრამატულად აფრიკელებმა არგენტინას 3:2 მოუგეს. ოკოჩამ ამ ტურნირზე გაიტანა 2 ბურთი: იაპონიასა და მექსიკასთან.
ლიონელ მესი
აღნიშნული ათეული მესის გარეშე უბრალოდ წარმოუდგენელი იქნებოდა. აგუეროსა და დი მარიასთან ერთად, 2008 წლის ოლიმპიურ თამაშებზე ლიონელიც იყო. მან ჯგუფში კოტ-დ'ივუარს გაუტანა, შემდეგ კი ნიდერლანდებს 1/4 ფინალში. ეს იყო ერთ-ერთი პირველი ტიტული, რომელიც არგენტინელმა ფეხბურთელმა მოიგო.
ნეიმარ ჟუნიორი
გასულ დეკადაში ბრაზილიის მთავარი ვარსკვლავი, რომელიც თავის ნაკრებს 2016 წლის ოლიმპიურ თამაშებზე გაყვა. ნეიმარმა აღნიშნულ ტურნირზე გაიტანა 4 ბურთი: დუბლი ჰონდურასთან, ერთი კოლუმბიასთან და ერთიც ფინალში, გერმანიასთან. ჟუნიორმა ასევე გაიტანა გადამწყვეტი 11-მეტრიანი, რომლითაც "სელესაო" ჩემპიონი გახდა.
ფერენც პუშკაში
1952 წლის ოლიმპიური თამაშების ტრიუმფატორი უნგრეთი, რომელსაც ნამდვილი ვარსკვლავური თაობა ჰყავდა. ფინალამდე მიმავალ გზაზე მათ დაამარცხეს რუმინეთი, იტალია, თურქეთი, შვედეთი, ბოლოს კი იუგოსლავია. პუშკაშმა იმ ტურნირზე 4 ბურთი გაიტანა, მათ შორის 1 გოლი - გადამწყვეტ მატჩში.
ხუან რომან რიკელმე
2008 წლის ჩემპიონი არგენტინის ერთ-ერთი ყველაზე გამოცდილი ფეხბურთელი. თუ მესი, დი მარია და აგუერო იმ დროს ჯერ კიდევ კარიერის საწყის ეტაპზე იყვნენ, რიკელმე უკვე 30 წლის იყო. ოლიმპიური ოქროს მედალი ერთადერთი ჯილდოა, რომელიც ლეგენდარულმა გამთამაშებელმა "ალბისელესტეში" მოიგო.
ლევ იაშინი
1956 წლის ოლიმპიური თამაშების გამარჯვებული საბჭოთა კავშირთან ერთად. ფინალამდე მიმავალ გზაზე მათ დაამარცხეს გერმანია, ინდონეზია და ბულგარეთი. გადამწყვეტ მატჩში კი სსრკ-მ იუგოსლავიას მოუგო. იაშინმა გაუშვა 3 ბურთი, მაგრამ ისტორიაში ის ტურნირის საუკეთესო კარის დარაჯის სახელით დარჩა.
ერთადერთი ქართველი ფეხბურთელი, რომელმაც ოლიმპიური ოქროს მედალი მოიგო - გელა კეტაშვილი
კეტაშვილი ოლიმპიური თამაშების გამარჯვებული1988 წელს გახდა, როცა საბჭოთა კავშირის შემადგენლობაში თამაშობდა. ფინალამდე მიმავალ გზაზე ჯგუფურ ეტაპზე მათ დაამარცხეს არგენტინა და ამერიკა, შემდეგ პლეიოფში კი ავსტრალია და იტალია. რაც შეეხება ფინალს, სსრკ-მ ბრაზილიას მოუგო. იმ დროს გელა იყო ერთადერთი ქართველი მოთამაშე "წითლების" შემადგენლობაში.
ასევე გამოსარჩევია: ლუის ენრიკე, ნილს ლიდჰოლმი, ხავიერ მასკერანო, გუნარ ნორდალი, ექტორ სკარონე, კარლოს ტევესი.
