10. ნეიმარ ჟუნიორი - პსჟ, 100 გოლი 144 მატჩში
მსოფლიოს ყველაზე ძვირადღირებული ფეხბურთელი, რომელიც ბარსელონადან პარის სენ-ჟერმენში 222 მილიონ ევროდ გადავიდა. ნეიმარმა 100-გოლიან ნიშნულს პსჟ-ში მიაღწია მოკლე დროში, სულ რაღაც 144 მატჩში, მაგრამ ამის მიუხედავად, მისგან საფრანგეთის დედაქალაქში გაცილებით მეტს ელოდნენ. ლეო მესის ჩრდილიდან გამოსვლა ჟუნიორს არ გამოუვიდა.
9. კრისტიან ვიერი - ინტერი, 100 გოლი 138 მატჩში
1999 წლის ზაფხულში რომის ლაციოდან მილანის ინტერში 32 მილიონ ევროდ გაფორმებული თავდამსხმელი ერთი წლის განმავლობაში რჩებოდა მსოფლიოს ყველაზე ძვირადღირებულ მოთამაშედ და ის თავის საქმეს, რაც გულისხმობს გოლების გატანას, ძალიან კარგად ართმევდა თავს. ვიერის "ნერაძურიში" გატარებულ პერიოდს ჰქონდა მხოლოდ 1 ნაკლი: უტიტულობა.
8. კილიან მბაპე - პსჟ, 100 გოლი 137 მატჩში
მბაპე არა მხოლოდ მოკლე დროში ავიდა 100-გოლიან ნიშნულზე, არამედ დროთა განმავლობაში პარის სენ-ჟერმენის ყველა დროის საუკეთესო ბომბარდირიც გახდა. დღეს, კილიანი იგივეს გაკეთებას უკვე მადრიდის რეალის შემადგენლობაში ცდილობს. აქვე დავამატებთ, რომ პსჟ-მ ის 180 მილიონად დაიმატა.
7. რობერტ ლევანდოვსკი - ბაიერნი, 100 გოლი 136 მატჩში
ბაიერნის ისტორიაში ერთ-ერთი საუკეთესო ბომბარდირი, რომელსაც მხოლოდ ლეგენდარული გერდ მიულერი უსწრებს. ლევანდოვსკიმ გერმანული გრანდი დატოვა 344 გატანილი ბურთით, 100-გოლიან ნიშნულამდე კი ის მხოლოდ 136 მატჩით ავიდა. სადებიუტო სეზონის შემდეგ, რობერტი მიუნხენში 40-ზე ნაკლებ ბურთს არ იტანდა.
6. ედინსონ კავანი - ნაპოლი, 100 გოლი 135 მატჩში
ნაპოლის ისტორიაში ერთ-ერთი უდიდესი მეგოლე, რომელმაც 100-გოლიან ნიშნულს 135 შეხვედრაში მიაღწია. კავანის იტალიაში ყოფნის პერიოდში რჩებოდა სულ რაღაც 12 ბურთი იმისთვის, რომ დაემხო დიეგო მარადონას რეკორდი და გამხდარიყო "პარტენოპეის" ყველა დროის საუკეთესო გოლეადორი.
5. რუდ ვან ნისტელროი - მანჩესტერი, 100 გოლი 131 მატჩში
სერ ალექს ფერგიუსონის მანჩესტერის ფუნდამენტი იდგა კლუბის აღზრდილებზე, თუმცა ლეგენდარული მწვრთნელი პერიოდულად ძვირადღირებულ ტრანსფერებსაც აკეთებდა. ერთ-ერთი ასეთი იყო ნისტელროი, რომელიც იუნაიტედმა 28.5 მილიონად გაიფორმა. როგორც დრომ და სტატისტიკამ აჩვენა, რუდის "წითელ ეშმაკებში" ტრანსფერმა გაამართლა.
4. ზლატან იბრაჰიმოვიჩი - პსჟ, 100 გოლი 124 მატჩში
როგორც ვხედავთ, იბრაჰიმოვიჩმა პარის სენ-ჟერმენში 100 გოლი ნეიმარსა და მბაპეზე ადრე გაიტანა. ლეგენდარული თავდამსხმელი კლუბის ყველა დროის საუკეთესო გოლეადორიც იყო, მაგრამ შემდეგ, კილიანმა მას აჯობა. ზლატანი უდავოდ არის პსჟ-სა და ზოგადად ლიგა 1-ის ისტორიაში ერთ-ერთი უდიდესი მოვლენა.
3. ლუის სუარესი - ბარსელონა, 100 გოლი 120 მატჩში
თავდამსხმელი, რომელმაც ლიონელ მესისა და კრიშტიანუ რონალდუს ეპოქაში ოქროს ბუცი ორჯერ მოიპოვა. პირველი იყო ლივერპულში თამაშის დროს, მეორე კი უკვე ბარსაში, თანაც არგენტინელი ფლეიმეიქერის გვერდით. სუარესმა 100-ბურთიან ნიშნულს მიაღწია სულ რაღაც 120 მატჩში, რითაც კიდევ ერთხელ გაუსვა ხაზი თავის უმაღლეს კლასს.
2. ერლინგ ჰოლანდი - სიტი, 100 გოლი 105 მატჩში
ნამდვილად შთამბეჭდავი ციფრებია - ჰოლანდმა სიტიში 100-გოლიან ნიშნულს სულ რაღაც 105 შეხვედრაში მიაღწია. მას საამისოდ 2.5 წელიწადზე ნაკლები დრო დასჭირდა. ცნობისთვის, ერლინგმა გაიმეორა ერთი ლეგენდარული გოლეადორის მიღწევა, რომელიც 1-ელ პოზიციაზე არის.
1. კრიშტიანუ რონალდუ - რეალი, 100 გოლი 105 მატჩში; იუვენტუსი, 100 გოლი 131 მატჩში
ფეხბურთის ისტორიაში მთავარი გოლეადორი, რომელიც აღნიშნულ რეიტინგში ორი გუნდით არის წარმოდგენილი. რონალდუმ რეალში 100 გოლი გაიტანა 105 მატჩში, რაც ჰოლანდის მაჩვენებელთან ერთად, საუკეთესო შედეგია. რაც შეეხება კრიშტიანუს მონაგარს იუვეში, ის დგას ნეიმარზე, ლევანდოვსკიზე, კავანიზე, მბაპესა და კიდევ არაერთ ფორვარდზე წინ.
