საბა გოგლიჩიძე (ტორპედოდან - ემპოლიში, €450 ათასი, 06/01/2024)
მართალია, გოგლიჩიძე ემპოლიში გამოჩნდა მიმდინარე სეზონში, თუმცა მისი ტრანსფერი გასულ ზამთარს განხორციელდა. ახალ სეზონში ის სერია ა-ს ერთ-ერთი მთავარი აღმოჩენაა და "აძურის" შეუცვლელი წევრი. საბას სახელს კალჩოს ტოპ კლუბებს უკვე უკავშირებენ.
გიორგი გულიაშვილი (საბურთალოდან - სარაიევოში, €120 ათასი, 17/01/2023)
გულიაშვილის სტარტი სარაიევოში გამოდგა მძიმე, რის შედეგადაც ის განათხოვრების წესით რაღაც პერიოდით გაუშვეს სხვა გუნდში, თუმცა მიმდინარე სეზონში ვხედავთ სულ სხვა სურათს: 17 მატჩში გატანილი 12 ბურთი და ინტერესი ევროპის წამყვანი ლიგებიდან.
კახა კალაძე (დინამო კიევიდან - მილანში, €16 მილიონი, 23/01/2001)
ერთ-ერთი ყველაზე დიდი ტრანსფერი ქართული ფეხბურთის ისტორიაში. კალაძე მილანში გადასვლის მომენტისთვის იყო ყველაზე ძვირადღირებული უკანახაზელი, მოგვიანებით კი ის ყველაზე წარმატებულ ქართველ მოთამაშედაც იქცა. ჩემპიონთა ლიგის 2 თასი, სკუდეტო და სხვა ტიტულებიც...კახამ ამ ყველაფერს "როსონერიში" მიაღწია.
ჯაბა კანკავა (არსენალ კიევიდან - დნიპროში, უფასოდ, 01/01/2007)
კანკავამ კარიერის უმნიშვნელოვანესი ნაწილი გაატარა დნიპროში, რომლის შემადგენლობაში მან 130-ზე მეტი შეხვედრა ჩაატარა. ყველაზე მნიშვნელოვანი მომენტი: ევროპა ლიგის ვიცე-ჩემპიონობა 2014/15 წლების სეზონში. ჯაბას თავგადასავალი "ლურჯებში" დაიწყო 2007 წლის ზამთარში, არსენალიდან უფასო ტრანსფერის შემდეგ.
გიორგი ხარაიშვილი (საბურთალოდან - გიოტებორგში, იჯარა და €300 ათასად გამოსყიდვა, 23/02/2018)
ხარაიშვილმა კარიერის საუკეთესო პერიოდი გაატარა გიოტებორგში, რომლის შემადგენლობაში მან 76 შეხვედრაში გაიტანა 22 გოლი და 13 საგოლე გადაცემა მიითვალა. "თეთრ-ლურჯებში" იჯარით გადასვლის შემდეგ, შვედურმა კლუბმა ერთი წლის შემდეგ გიორგი €300 000-ად გამოისყიდა.
ლევან კობიაშვილი (დინამო თბილისიდან - ფრაიბურგში, იჯარა და €125 ათასად გამოსყიდვა, 01/01/1998)
ფრაიბურგის ისტორიაში ერთ-ერთი საუკეთესო ფეხბურთელი, რომელმაც კლუბის მაისურით 180-ზე მეტი შეხვედრა ჩაატარა. ცნობისთვის, კობიაშვილის კარიერაში არის კიდევ ერთი გამორჩეული ზამთრის ტრანსფერი: 2010 წელს, გელზენკირხენის შალკედან ბერლინის ჰერტაში.
ნიკა კვეკვესკირი (ტობოლიდან - ლეხში, უფასოდ, 29/01/2021)
შემთხვევა, როდესაც უფასო ტრანსფერი შესაძლოა ძალიან შედეგიანი გამოდგეს. ასე მოხდა კვეკვესკირის შემთხვევაში, რომელიც ლეხში თავისუფალი აგენტის სტატუსით გადავიდა. ნიკამ პოზნანში ჩაატარა 120-ზე მეტი მატჩი და პოლონეთის ჩემპიონობაც იზეიმა.
გიორგი მიქაუტაძე (აიაქსიდან - მეცში, იჯარა და €13 მილიონად გამოსყიდვა, 04/01/2024)
აიაქსში წარუმატებელი ნახევარი სეზონის შემდეგ, მიქაუტაძე დაბრუნდა მისთვის კარგად ნაცნობ მეცში, სადაც ძველებურად ათამაშდა. ახალგაზრდა ფორვარდმა "ლეს გრენატსში" სეზონი დაასრულა 22 მატჩში გატანილი 14 ბურთით, მაგრამ ლიგა 1-ში ადგილის შენარჩუნებისთვის ეს საკმარისი არ გამოდგა. ლოთარინგიელების შემდეგ, ჟორჟი ძველი მისიის შესასრულებლად მშობლიურ ლიონში წავიდა.
კახაბერ ცხადაძე (დინამო მოსკოვიდან - აინტრახტში, უფასოდ, 01/01/1993)
ერთ-ერთი პირველი ქართველი ფეხბურთელი ევროპის ტოპ 5 ლიგაში. სამშობლოსა და რუსეთში ძალიან კარგი თამაშის შემდეგ, ცხადაძე გადავიდა ბუნდესლიგის ბინადარ აინტრახტში, რომელშიც მან 4 წლის მანძილზე 90 მატჩი ჩაატარა.
ბუდუ ზივზივაძე (ფეჰერვარიდან - კარლსრუეში, €150 ათასი, 31/01/2023)
უნგრეთის შემდეგ, ზივზივაძემ მიაშურა გერმანიას, სადაც კარლსრუეში თავის კარიერას ახალი სული შესძინა. სტარტი გამოდგა რთული, თუმცა უკვე მიმდინარე სეზონში ბუდუ მე-2 ბუნდესლიგის საუკეთესო გოლეადორად მოგვევლინა. დღეს, ის უკვე პირველი ბუნდესლიგის ბინადარი ჰაიდენჰაიმის მოთამაშეა, რომელშიც რამდენიმე დღის წინ გადავიდა.
