ბარსელონასა და პარის სენ-ჟერმენს ერთმანეთთან არაერთი ვარსკვლავი აკავშირებთ. ორივე გუნდის შემადგენლობაში სხვადასხვა დროს უთამაშიათ ისეთ გამორჩეულ შემსრულებლებს, როგორებიც არიან: ლეო მესი, ზლატან იბრაჰიმოვიჩი, დანი ალვეში, ნეიმარ ჟუნიორი და ბევრი სხვა. ცხადია, არც რონალდინიო გაუჩო უნდა გამოგვრჩეს.
ბრაზილიელი შემტევი ხომ პირველია, რომელმაც ორივე სამყაროს კარი შეაღო. მისი ტრანსფერი დღემდე ბურუსით არის მოცული და არსებობს სხვადასხვა თეორია, თუ როგორ აღმოჩნდა ის კატალონიაში და არა მანჩესტერ იუნაიტედში. დიახ, მოსაზრებების თანახმად, პსჟ-ს ფლეიმეიქერს თავდაპირველად სწორედ "წითელ ეშმაკებში" ელოდნენ.
თვალი გადავავლოთ ფეხბურთის ისტორიაში ერთ-ერთი ყველაზე იდუმალ ტრანსფერს, რომელმაც მომავალში ლიონელ მესისა და კრიშტიანუ რონალდუს ფორმირებაზეც კი მოახდინა გავლენა. გადავინაცვლოთ 2001 წლის ზაფხულში და გავიხსენოთ იმდროინდელი პარიზული კლუბი, რომელიც ყატარული ინვესტიციებისგან ჯერ კიდევ შორს იყო.
"ლურჯ-წითლებს" არ ჰქონდათ ასტრონომიული ფული, თუმცა ამის მიუხედავად, ლიგა 1-ის კვალობაზე მათი შემადგენლობა ძალიან საინტერესოდ გამოიყურებოდა: ჯეი-ჯეი ოკოჩა, ნიკოლა ანელკა, მიკელ არტეტა (კიდევ ერთი "ბლაუგრანელი"), მაურისიო პოჩეტინო და სხვები. ამ სიას ბრაზილიის ეროვნული გუნდის მომავალი 10-იანიც დაემატა.
"ჯადოქრის" პერფომანსები პარკ დე პრენსზე არაერთგვაროვანი იყო - დაუვიწყარ შოუებთან ერთად, გულშემატკივრებს არაერთი ჩაგდებული თამაშიც ახსოვთ. რონალდინიო თავის არასტაბილურობაში ადანაშაულებდა პარის სენ-ჟერმენის იმდროინდელ დამრიგებელს, ლუის ფერნანდესს, რომელიც ემხრობოდა მკაცრად განსაზღვრულ ტაქტიკურ ფეხბურთს, რითაც ის ზღუდავდა ახალგაზრდა შემსრულებლის პოტენციალს.
მოგვიანებით, ბრაზილიელი შემტევი ფრანგი მწვრთნელის შესახებ იტყვის -
"ის ღიზიანდებოდა, როდესაც მე ბედნიერი ვიყავი".
გარდამტეხი აღმოჩნდა 2002 წლის მუნდიალი, რომლის დასრულების შემდეგ, გაუჩო აღარ იყო უბრალოდ ნიჭიერი მოთამაშე, პსჟ-ში დაბრუნდა ნამდვილი სუპერვარსკვლავი და თანაც, მსოფლიო ჩემპიონი.
პარიზელთა შემტევი ლიგა 1-ის საშუალო დონის გუნდში დემოტივაციას განიცდიდა. ის არ იწუხებდა თავს ვარჯიშებზე. რაც შეეხება თამაშს - დროებითი გამონათებები ლიონისა და მარსელის დონის კლუბებთან, სხვა დანარჩენი მას უბრალოდ აღარ აინტერესებდა. ერთი სიტყვით, "ლურჯ-წითლების" 10-იანს ახალი გამოწვევები სჭირდებოდა.
"რონალდინიო პარის სენ-ჟერმენში პრაქტიკულად აღარ ვარჯიშობდა. ის გუნდის ბაზაზე მოდიოდა პარასკევს, იმისთვის რომ შაბათის თამაშისთვის ფორმაში ყოფილიყო. გაუჩო ბაძავდა რომარიოს, მათი ცხოვრების წესი და შეხედულებები მსგავსი იყო",
- იხსენებს პარკ დე პრენსის ბინადრების ექსგამთამაშებელი, ჟერომ ლეროი.
როგორც ვიცით, ბრაზილიელი შემტევი გადმოიბირეს "ლურჯ-ბროწეულისფრებმა", თუმცა თავდაპირველად, მათ სულ სხვა გეგმები ჰქონდათ. ნომერ პირველ სატრანსფერო სამიზნედ განიხილებოდა დევიდ ბექჰემი, რომლის "მანკუნიანელებში" დარჩენა სერ ალექს ფერგიუსონთან კონფლიქტის შემდეგ, არ განიხილებოდა.
თავად ინგლისელ ნახევარმცველს არ ხიბლავდა კამპ ნოუზე არსებული არასტაბილური გარემო და ის უფრო მადრიდის რეალში გადასვლისკენ იხრებოდა. ამის მიუხედავად, ბარსას იმდროინდელმა პრეზიდენტობის კანდიდატმა, ხოან ლაპორტამ, მთელი თავისი საარჩევნო კამპანია სწორედ ფერგიუსონის გუნდის შუახაზელის გარშემო ააწყო.
ოლდ ტრაფორდის ბინადრები არ იყვნენ თავიანთი შვიდიანის კატალონიაში გაყიდვის წინააღმდეგები, ორ გუნდს შორის არსებობდა ერთგვარი წინასწარი შეთანხმებაც, მაგრამ მოგვიანებით, საქმეში ჩაერია თავად მოთამაშე, რომელმაც თავისი ტრანსფერი დაბლოკა. ბექჰემს მხოლოდ "სამეფო კლუბი" აინტერესებდა.
ინგლისელ ნახევარმცველს ნატვრა ძალიან მალე აუხდა - ასპარეზზე გამოვიდა ფლორენტინო პერესი, რომელმაც ფინანსური თვალსაზრისით "ბლაუგრანას" წინადადება მთლიანად გადაფარა. მანჩესტერმა დევიდის სანაცვლოდ 37.5 მილიონი მიიღო, "ბლანკოსის" რიგები კი ლუიშ ფიგუს, ზინედინ ზიდანისა და რონალდო ნაზარიოს შემდეგ, კიდევ ერთი "გალაქტიკოსით" შეივსო.
"ლურჯ-ბროწეულისფრების" პრეზიდენტობის ესპანელ კანდიდატს სჭირდებოდა ახალი ვარსკვლავი და არჩევანი შეჩერდა გაუჩოზე, თუმცა სირთულეების გარეშე არც ამ ტრანსფერს ჩაუვლია. საქმე ისაა, რომ პარის სენ-ჟერმენის მოთამაშისთვის ბრძოლაში ფავორიტად მოიაზრებოდა იუნაიტედი, რომელიც ინგლისის ნაკრების შუახაზელის ბერნაბეუზე გაყიდვის შემდეგ, ფინანსური კუთხით კამპ ნოუს ბინადრებზე ბევრად ძლიერი იყო.
"ჯადოქარი" ბარსელონას ფეხბურთელი ზაფხულის სატრანსფერო ფანჯრის ბოლოს გახდა, თუმცა ივლისში ყველაფერი თითქოს იმისკენ მიდიოდა, რომ ის "წითელ ეშმაკებში" აღმოჩნდებოდა. არსებობს რამდენიმე თეორია, თუ რატომ აირჩია პსჟ-ს 10-იანმა კატალონია და არა ინგლისური კლუბი. მივყვეთ თანმიმდევრობით.
პირველი ვერსია - "მანკუნიანელებსა" და პარიზელებს შორის იყო ყველაფერი შეთანხმებული, თუმცა მოლაპარაკებების ფინალურ სტადიაზე ინგლისურმა მხარემ უარი თქვა 32 მილიონის გადახდაზე, რის შემდეგაც ფრანგებმა ტრანსფერი დაბლოკეს.
მეორე ვერსია - რონალდინიო მართლაც ჩაფრინდა ინგლისში და მასზე ძალიან ცუდი შთაბეჭდილება ამინდმა მოახდინა.
აღნიშნულ მოსაზრებას ადასტურებს ფერგიუსონის გუნდის ყოფილი ნახევარმცველი, კვინტონ ფორჩუნი:
"რომ არა წვიმა, რონალდინიო კონტრაქტს სწორედ მანჩესტერთან გააფორმებდა. სამწუხაროდ, გაუჩოს ჩამოსვლას დაემთხვა უამინდობა, სხვა ნებისმიერ ვითარებაში, ის აქედან არ წავიდოდა", -
იხსენებს სამხრეთ აფრიკელი შუახაზელი.
მესამე ვერსია - ბრაზილიელ შემტევს ჰქონდა წინასწარი შეთანხმება სანდრო როსელთან, პიროვნებასთან, რომელიც მეგობრობდა ფეხბურთელის ძმასთან და აგენტთან, რობერტო დე ასისთან. საქმე ისაა, რომ "ბლაუგრანას" მომავალი პრეზიდენტის საარჩევნო შტაბში შესვლამდე, ესპანელი ფუნქციონერი მუშაობდა Nike-ის ბრაზილიურ დეპარტამენტში.
ლაპორტას თანაშემწემ ძალიან კარგად იცოდა ბრაზილიის ნაკრების შემტევის შესაძლებლობები და მისი მიზანში ამოღება იუნაიტედის გამოჩენამდე ბევრად ადრე მოხდა. მხარეებმა დადეს შეთანხმება: იმ შემთხვევაში, თუ როსელი და მისი თანამემამულე გაიმარჯვებდნენ არჩევნებში, "ჯადოქარი" სწორედ "ლურჯ-ბროწეულისფრებს" მიაშურებდა.
თავად ბრაზილიის ნაკრების ათიანი სწორედ აღნიშნულ ვერსიას ადასტურებს:
"რატომ ბარსელონა? - როსელთან დიდხნიანი მეგობრობა მაკავშირებდა. ამის გარდა, ძალიან მინდოდა მეთამაშა კლუბში, რომელშიც თავის დროზე ასპარეზობდნენ რომარიო, რონალდო და რივალდო. კატალონიელთა ახალი R მე ვიქნებოდი",
- იხსენებს რონალდინიო.
ერთი სიტყვით, ბრაზილიელმა შემტევმა აირჩია "ბლაუგრანა", "წითელ ეშმაკებმა" კი მის სანაცვლოდ დაიმატეს იმედისმომცემი გარემარბი ლისაბონის სპორტინგიდან, კრიშტიანუ რონალდუ. რა მოხდა შემდეგ? გაუჩომ "ლურჯ-ბროწეულისფრები" აიყვანა ახალ საფეხურზე, პარალელურად კი მისი ფრთის ქვეშ გამოიჩეკა შემსრულებელი, რომელსაც მოგვიანებით ფეხბურთის ისტორიაში საუკეთესო მოთამაშეს უწოდებენ.
საუბარია ლიონელ მესის შესახებ, რომელიც თავის პირველ და ყველაზე დიდ მენტორად სწორედ ბრაზილიის ნაკრების ლეგენდარულ შემტევს მოიხსენიებს. სანამ არგენტინელი შემსრულებელი "სელესაოს" 10-იანისგან ეუფლებოდა საფეხბურთო ჯადოქრობას, "მანკუნიანელებში" ღვინდებოდა მისი მარადიული მეტოქე, მაგრამ ეს უკვე სულ სხვა ისტორიაა...
"ბარსელონას დატოვებით, ნეიმარმა შეცდომა დაუშვა", - მაიკონი
კასილასი, მალდინი, რონალდინიო, მესი, რონალდუ - ჰოლანდმა ოცნების გუნდი შეადგინა
