2008 წლის 21 მაისი - მანჩესტერ იუნაიტედი ჩემპიონთა ლიგის ფინალში, დრამატულ ბრძოლაში ამარცხებს ლონდონის ჩელსის და ევროპის უძლიერესი კლუბის სტატუსს სრულიად დამსახურებულად იძენს. 17 წლის შემდეგ, "წითელმა ეშმაკებმა" ამ დღეს ითამაშეს კიდევ ერთი ფინალი, მაგრამ გარემოებები კარდინალურად განსხვავდებოდა იმ ყველაფრისგან, რაც 2000-იანების ბოლოს იყო.
2008 წლის 21 მაისი - ევროპის უძლიერესი კლუბის სტატუსი
სერ ალექს ფერგიუსონი მანჩესტერის მწვრთნელი იყო 27 წლის განმავლობაში (1986 - 2013) და არსებობს მოსაზრება, რომ თავისი მოღვაწეობის მწვერვალს მან სწორედ 2008 წლის 21 მაისს მიაღწია. დიახ, იუნაიტედი ევროპის მთავარი საკლუბო ტურნირის ტრიუმფატორი გახდა 1999-შიც, მაგრამ ის წარმატება ბევრისთვის უფრო იყო მოულოდნელობა, ვიდრე კანონზომიერება.
ობიექტურად, "წითელი ეშმაკები" არ ითვლებოდნენ ფავორიტებად არც მილანის ინტერთან მეოთხედფინალში, არც ტურინის იუვენტუსთან ნახევარფინალში და არც მიუნხენის ბაიერნთან ფინალში. "ნერაძურის" ბარიერის გადალახვის შემდეგ, ფერგიუსონის გუნდმა "ბიანკონერისა" და "რეკორდმაისტერთან" ნამდვილი სასწაული შემოგვთავაზა.
განსაკუთრებით ეს ითქმის ფინალზე, როდესაც ოლდ ტრაფორდის ბინადრებმა ოტმარ ჰიცფელდის შეგირდების ზღაპარი მატჩის დასრულებამდე 91-ე - 93-ე წუთებზე დაასრულეს. ერთი სიტყვით, თუ 1999-ში მანჩესტერმა გააოგნა საფეხბურთო სამყარო, 9 წლის შემდეგ ამ კლუბმა ყველა დაგროვილ კითხვას პასუხი გასცა.
იუნაიტედი დომინირებდა არა მხოლოდ ევროსარბიელზე, არამედ პრემიერ ლიგაშიც. დიახ, 2008 წელს ჩემპიონთა ლიგის ტრიუმფატორმა ინგლისის ჩემპიონატიც მოიგო. იმდროინდელი "წითელი ეშმაკები" იყვნენ იდეალური მიქსი, რომელიც შედგებოდა გამოცდილი მოთამაშეებისა (ედვინ ვან დერ სარი, რაიან გიგზი, პოლ სქოულზი) და კლუბის ახალი თაობის წარმომადგენლებისგან (უეინ რუნი, კრიშტიანუ რონალდუ).
მოწოდების სიმაღლეზე იყო აბსოლუტურად ყველა, თუმცა მთავარ როლში მაინც გვევლინებოდა პორტუგალიელი გარემარბი, რომელმაც იმ სეზონის 49 შეხვედრაში 42 ბურთი შეაგდო. ფერგიუსონის გუნდის ვინგერმა გაიტანა ფინალშიც, მართალია, მან ვერ გამოიყენა თავისი შანსი 11-მეტრიანების სერიაში, მაგრამ ამ უიღბლობამ მისი დიდება მაინც ვერ გადაფარა.
წლის ბოლოს კი ოლდ ტრაფორდის ბინადრების შვიდიანი თავის კარიერაში პირველ ოქროს ბურთს დაეუფლა. ასეთი იყო მწვერვალზე ასვლის პროცესი მანჩესტერის შესრულებით. დიახ, მოგვიანებით მათ ჩამოაგდებს პეპ გუარდიოლას ბარსელონა, მაგრამ ეს უკვე სულ სხვა ისტორია არის.
2025 წლის 21 მაისი - ფსკერი, გამოუვალი მდგომარეობა
მანჩესტერმა 17 წლის განმავლობაში გაიარა გზა ევროპული ფეხბურთის დომინანტიდან - გუნდამდე, რომელმაც უკანასკნელ წლებში ევროპის რანგით მე-2 საკლუბო ტურნირის ფინალში 2-ჯერ წააგო. ამ ყველაფერს დავუმატოთ ის ფაქტი, რომ იუნაიტედი ინგლისის ჩემპიონატის მიმდინარე სეზონს მე-16 პოზიციაზე ასრულებს.
დიახ, პრემიერ ლიგის დასრულებამდე რჩება ერთი ტური და "წითელ ეშმაკებს" შეუძლიათ მე-14 ადგილამდე აღზევება, თუმცა ეს ფაქტი საერთო სურათს დიდად არ ცვლის. ბოლოს, ოლდ ტრაფორდის ბინადრები 10-ეულს მიღმა აღმოჩნდნენ 1974-ში, როდესაც უმაღლესი დივიზიონიდან გავარდნენ.
ბურთების უარყოფითი ბალანსითა და ყოველკვირას დამყარებული სხვადასხვა სახის ანტირეკორდებით კი რუბენ ამორიმის გუნდი ვეღარ გაგვაკვირვებს. დიახ, მანჩესტერის კრიზისი არ არის ახალი ამბავი, მაგრამ რანგით მე-2 საკლუბო ტურნირის წლევანდელი ფინალის წაგება სხვა წარუმატებლობებზე მტკივნეული მაინც გამოდგა.
გამარჯვების შემთხვევაში იუნაიტედი დაბრუნდებოდა ჩემპიონთა ლიგაზე, რითაც პრემიერ ლიგის ფსკერთან ახლოს ყოფნას გარკვეულწილად გადაფარავდა. ამის გარდა, რანგით მე-2 საკლუბო ტურნირის წლევანდელ ფინალში "წითელი ეშმაკების" გარშემო ერთგვარი სიმბოლიზმიც ტრიალებდა.
2008 წლის 21 მაისს ფერგიუსონის გუნდმა ჩემპიონთა ლიგის ფინალში დაამარცხა ჩელსი, 17 წლის შემდეგ კი მორიგი ფინალი და მოწინააღმდეგედ ისევ ლონდონური კლუბი, ამჯერად ტოტენჰემ ჰოტსპური. არსებობდა მოსაზრება, რომ ოლდ ტრაფორდის ბინადრების ჭაობიდან ამოსვლა სწორედ "დეზებთან" მოგებით დაიწყებოდა.
მოლოდინი არ გამართლდა, მანჩესტერი ისევ დამარცხდა. დიახ, პრემიერ ლიგის ყოფილი დომინანტის კრიზისში ყოფნის პერიოდში, ტიტულის მოგება სპურსმაც კი მოასწრო. რა იქნება შემდეგ, ევროპის ყველაზე პრესტიჟული საკლუბო ტურნირის ტრიუმფატორი ლონდონის არსენალი გახდება?!
არ უნდა დაგვავიწყდეს ისიც, რომ მიმდინარე სეზონიდან, იუნაიტედი პრემიერ ლიგის ყველაზე ტიტულოვანი გუნდი აღარ იქნება. მოპოვებული ჩემპიონობების რაოდენობით, "წითელ ეშმაკებს" გაუთანაბრდა ლივერპული და მათ შორის ახლა 20:20 არის. მოქმედი ჩემპიონების კარგი ფორმის გათვალისწინებით კი არაა გამორიცხული, რომ ოლდ ტრაფორდის ბინადრები მომავალში მე-2 პოზიციაზე ჩამოქვეითდნენ.
