ხვიჩა კვარაცხელია - ჩემპიონობასთან ერთ ნაბიჯში, ევროსარბიელზე ტრიუმფი
კვარაცხელიასთვის ლიგა 1-ში ყველაფერი მიმდინარეობს იდეალური სცენარით - პარის სენ-ჟერმენი ჩემპიონობასთან ერთ ნაბიჯში იმყოფება. იმ შემთხვევაში, თუ საფრანგეთის ლიგის შემდეგ ტურში პსჟ მოუგებს ანჟეს, მე-2 პოზიციაზე მყოფი მონაკო პირველობის თეორიულ შანსს დაკარგავს. თუ არ მოხდა რაიმე გაუთვალისწინებელი, ალბათ ასეც იქნება.
ეს ნიშნავს იმას, რომ ჩემპიონთა ლიგის მეოთხედფინალისთვის პარიზს ლიგა 1-ის ტიტული შესაძლოა უკვე გაფორმებულიც ჰქონდეს. წინ სეზონის დასკვნითი ნაწილია, "ლურჯ-წითლებს" კი ერთი მნიშვნელოვანი საქმე უკვე შესრულებული ექნებათ. ობიექტურად, არავის ეპარებოდა ეჭვი, რომ ტრიუმფატორი სწორედ ლუის ენრიკეს გუნდი იქნებოდა.
პარკ დე პრენსის ბინადრების მთავარი მისია მაინც ეხება ჩემპიონთა ლიგას - ტურნირს, რომელშიც გამარჯვებულების ამპლუაში ისინი არასდროს ყოფილან. ერთადერთ ფრანგულ ტრიუმფატორ კლუბად დღემდე მარსელის ოლიმპიკი რჩება. რაც შეეხება პარის სენ-ჟერმენის მაქსიმუმს: ვიცე-ჩემპიონობა, "თავადების", სენტ-ეტიენისა და რეიმსის მსგავსად.
პსჟ-ს მოწინააღმდეგე ჩემპიონთა ლიგის მეოთხედფინალში იქნება ბირმინგემის ასტონ ვილა, აღნიშნული ბარიერის გადალახვის შემთხვევაში კი ნახევარფინალში მადრიდის რეალსა და ლონდონის არსენალს შორის მოგებული. ერთი სიტყვით, პარიზი მთელი ძალებითა და ყურადღებით სწორედ ევროსარბიელზე იქნება გადართული.
გიორგი მიქაუტაძე - ლიონის ჩემპიონთა ლიგაზე დაბრუნება
მიმდინარე სეზონის ლიონის ოლიმპიკი ჩემპიონთა ლიგის საგზურისთვის მებრძოლი გუნდი არის. ლიგა 1-ში ჩატარებული 27 ტურის შემდეგ, 45 ქულით რონელები არიან მე-7 პოზიციაზე და ლიგის ზონაში მყოფ ნიცას 2 ქულით ჩამორჩებიან. აღსანიშნავია ისიც, რომ მიქაუტაძის გუნდი გასულია ევროპა ლიგის 1/4 ფინალში, სადაც მანჩესტერ იუნაიტედთან მოგებას ეცდება.
"წითელი ეშმაკების" ბარიერის გადალახვის შემთხვევაში, "ლომები" ნახევარფინალში ბილბაოს ატლეტიკსა და გლაზგო რეინჯერსს შორის გამარჯვებულს შეხვდებიან. ევროპა ლიგის მოგებით, გრუპამას ბინადრები ყველაზე პრესტიჟულ საკლუბო ტურნირზე საფრანგეთის ჩემპიონატის 4-ეულში შესვლის გარეშეც მოხვდებიან.
არ უნდა დაგვავიწყდეს ჯონ ტექსტორის კლუბის 500-მილიონიანი ფინანსური დავალიანებაც, რომელიც მიმდინარე სეზონის დასრულების შემდეგ უნდა დაიფაროს. ლიონისთვის გადარჩენის შანსი არის გასვლა ევროპის ყველაზე პრესტიჟულ საკლუბო ტურნირზე, სადაც ეს კლუბი უკვე 5 წელია, რაც ვერ ხვდება.
აღნიშნული მისიის ვერშესრულების შემთხვევაში, ოლიმპიკი იძულებული იქნება გუნდის წამყვანი ფეხბურთელები გაყიდოს, ხოლო ვინც კლუბში დარჩება, მათ ხელფასების საგრძნობლად შემცირება მოუწევთ. დიახ, სიტუაცია კრიტიკულად მძიმეა და დღევანდელი მოცემულობით, რონელებს ლიგა 2-ში დაქვეითება კვლავ ემუქრებათ.
რაც შეეხება ქართველ თავდამხმელს, ჩემპიონთა ლიგაზე ვერგასვლის შემთხვევაში, "ლომებს" ერთ-ერთი პირველი სავარაუდოთ სწორედ ის დატოვებს. ჟორჟი სატრანსფერო ბაზარზე საკმაოდ მოთხოვნადია, განსაკუთრებით სეზონის მე-2 ნახევრის ფეერიულად ჩატარების შემდეგ. 14 გატანილი ბურთით, გრუპამას ბინადრების ფორვარდი თავისი კლუბის საუკეთესო გოლეადორია.
24 წლის თავდამსხმელს ჰყავს არაერთი მსურველი, მათ შორის ევროპის ტოპ ჩემპიონატებიდანაც და აქედან გამომდინარე, მისი ტრანსფერი ტექსტორის კლუბისთვის შესაძლოა ძალიან სარფიანი იყოს. ყველაფერი გადაწყდება სეზონის ბოლოს, იქამდე კი არავის ეპარება ეჭვი, რომ ლიონის 69-ე ნომერი კიდევ ბევრს შეაგდებს.
ზურიკო დავითაშვილი - სენტ-ეტიენისთვის ადგილის შენარჩუნება
დიახ, სენტ-ეტიენი გასავარდნ ზონაშია - ლიგა 1-ში ჩატარებული 27 ტურის შემდეგ, აღნიშნული გუნდი 20 ქულით ბოლოსწინა, მე-17 ადგილზე არის. საპლეიოფო, მე-16 პოზიციამდე "ლეს ვერტსს" აშორებს 4 ქულა, გადამრჩენელ მე-15 ადგილამდე კი 6. დავითაშვილის გუნდს სიტუაციის გამოსასწორებლად 7 მატჩი აქვს.
რონელებს ნამდვილად არ ელით იოლი გასეირნება, რადგან მათ დარჩენილი აქვთ შეხვედრები ისეთ გუნდებთან, როგორებიც არიან მეზობელი ლიონი, მონაკო, ლანსი, ბრესტი, ასევე ევროსარბიელის საგზურისთვის მებრძოლი სტრასბურგი. არ უნდა დაგვავიწყდეს რეიმსი და ტულუზაც, რომლებიც დაახლოებით "მწვანეების" მსგავს მდგომარეობაში არიან.
რაც შეეხება ქართველ გარემარბს, ჟოფრუა გიშარზე ის ყველაზე შედეგიანი ფეხბურთელია. მის ანგარიშზე გოლს პლიუს საგოლე გადაცემის მაჩვენებლით არის 12 ქულა (7 ბურთი, 5 ასისტი), ეს ფაქტი კი ზურიკოს სხვა კლუბში ტრანსფერზე საუბრებს აჩენს. დიახ, ეირიკ ჰორნელანდის გუნდის ლიგა 2-ში გავარდნის შემთხვევაში, ნაკლებად სავარაუდოა, რომ საქართველოს ეროვნული გუნდის ვინგერი ლიგა 1-ის სხვა კლუბებმა ქვედა დივიზიონში დატოვონ.
ამის შესახებ საუბარი ჯერ ადრეა, თუმცა მაინც მხედველობაში ვიქონიოთ 24 წლის გარემარბის სხვა გუნდში დაწინაურების ალბათობა. სენტ-ეტიენის საფრანგეთის უმაღლეს დივიზიონში დარჩენის შემთხვევაშიც კი, ამ კლუბის 22-ე ნომერზე მოთხოვნა ზაფხულში მაინც იქნება. ერთი სიტყვით, დავითაშვილს წინ საინტერესო მოვლენებით დატვირთული რამდენიმე თვე ელის.
