ხვიჩა კვარაცხელიას პარის სენ-ჟერმენის მოწინააღმდეგე ჩემპიონთა ლიგის ფინალში ინტერ მილანი იქნება. შეგახსენებთ, რომ ახალგაზრდა ქართველ ვინგერს "ნერაძურის" კარში გოლი გატანილი ჯერ არ აქვს. მთავარი საკლუბო ტურნირის გადამწყვეტ დუელამდე, გავიხსენოთ ის "ჯვაროსნები", რომლებმაც იტალიური კლუბის კარის აღება შეძლეს.
პირველმა ჯუზეპე მეაცას ბინადრებს გაუტანა ლეგენდარულმა დავით ყიფიანმა, უეფას თასის 1977/1978 წლების სეზონში. პირველი მატჩი მოიგო თბილისის დინამომ, სწორედ ქართველი ფლეიმეიქერის ერთადერთი გატანილი ბურთით, მეორე შეხვედრაში კი უგოლო ფრე დაფიქსირდა.
რაც შეეხება "ლურჯ-თეთრების" გამთამაშებლის გოლს, ჯიაჩინტო ფაკეტისთვის ბურთის წართმევის შემდეგ, მან ეფექტურად გადაგზავნა ბურთი ივანო ბორდონის კარში. ეუგენიო ბერსელინის გუნდთან მოგების შემდეგ, ნოდარ ახალკაცის შეგირდებმა გადალახეს კოპენჰაგენ ბოლდკლუბის ბარიერი, მე-3 რაუნდში კი გრასჰოპერთან წააგეს.
უეფას თასიდან გადავინაცვლოთ ჩემპიონთა ლიგაზე, სადაც ინტერს მიხეილ აშვეთიამ გაუტანა. ეს ყველაფერი მოხდა 2003/2004 წლების სეზონში, რომელშიც არაერთი სენსაცია დაფიქსირდა. ერთ-ერთი მოულოდნელობა ვიხილეთ ჯგუფურ ეტაპზე: მილანელები მოსკოვის ლოკომოტივთან 0:3 განადგურდნენ.
"რკინიგზელების" მხრიდან "ნერაძურის" კარში მეორე გოლი სწორედ ქართველმა თავდამსხმელმა გაიტანა. საინტერესოა, რომ იტალიურმა კლუბმა ვერ შეძლო ჯგუფური ეტაპის გადალახვა, იური სიომინის გუნდი კი მოხვდა 1/8 ფინალში, მაგრამ იქ უძლური აღმოჩნდა მომავალი ფინალისტის, მონაკოს წინაშე.
ჩემპიონთა ლიგიდან გადავინაცვლოთ სერია ა-ში, სადაც ჯუზეპე მეაცას ბინადრების კარში ორმა ქართველმა ფეხბურთელმა გაიტანა. დავიწყოთ კახა კალაძით, რომელიც იტალიური კარიერის მანძილზე ინტერნაციონალეს დერბი დელა მადონინაში არაერთხელ დაუპირისპირდა.
2006 წლის 14 აპრილს მილანმა თანაქალაქელები სწორედ ქართველი მცველის გატანილი გოლით დაამარცხა. აღსანიშნავია ისიც, რომ წარსულში "როსონერის" უკანახაზელმა მეზობლების წინააღმდეგ თავის აქტივში 2 ასისტიც ჩაიწერა. საერთო ჯამში მას თანაქალაქელებთან მოგებული აქვს 9 შეხვედრა, უფრო მეტი გამარჯვება "შავ-წითლების" მე-4 ნომერმა იზეიმა მხოლოდ რომის ლაციოსთან, 11.
კალაძის შემდეგ, მილანელებს გაუტანა ლევან მჭედლიძემაც, თანაც მან დუბლი შეასრულა. 2015 წლის 31 მაისს, სერია ა-ს უკანასკნელ ტურში "ნერაძურიმ" ემპოლის 4:3 მოუგო. ეს იყო მაურო იკარდისა და ქართველი ფორვარდის პერსონალური დუელი, ორივე შემტევმა 2-2 ბურთი შეაგდო.
ბოლოს კი ბონუსად გავიხსენოთ საქართველოს ნაკრების ფეხბურთელი, რომელმაც ჯუზეპე მეაცას ბინადრებს ახალგაზრდულ დონეზე გაუტანა. იუნიორთა ჩემპიონთა ლიგის 2017/2018 წლების სეზონის პირველი რაუნდი: სტეფანო ვეკის გუნდის კარს კიევის დინამოს მხრიდან გიორგი წიტაიშვილი იღებს.
ის მატჩი დასრულდა ფრედ, 2:2, ყველაფერი კი სწორედ ქართველი გარემარბის გოლით დაიწყო. გამოსარჩევია ისიც, რომ ინტერის შემადგენლობაში იმ დროს თამაშობდა ნიკოლო ძანიოლო, რომელიც მოგვიანებით რომაში გაიბრწყინებს. რაც შეეხება იმ დუელის საბოლოო შედეგს, მილანელებმა საპასუხო შეხვედრაში "თეთრ-ლურჯები" 3:0 გაანადგურეს.
დინამო კიევის აღზრდილი გარემარბის მიმართებაში საინტერესოა ისიც, რომ "ნერაძურის" წინააღმდეგ უთამაშია მის მამასაც, კლიმენტი წიტაიშვილს. შვილისგან განსხვავებით, მეაცას ბინადრების კარში მას ბურთი არ გაუტანია, მაგრამ ის გახდა კვიპროსული ფეხბურთის ისტორიაში ერთ-ერთი ყველაზე დასამახსოვრებელი 2-რაუნდიანი დაპირისპირების მონაწილე.
ჩემპიონთა ლიგის 2008/2009 წლების სეზონის ჯგუფური ეტაპი, ჟოზე მოურინიოს გუნდსა და ტურნირის დებიუტანტს, ფამაგუსტის ანორთოსისს შორის ფიქსირდება დრამატული ფრე, 3:3. ქართველი ფორვარდი იმ შეხვედრაში დარჩა სათადარიგოთა სკამზე, მაგრამ ორი კვირით ადრე, ამ გუნდებს შორის ჩატარებულ პირველ თამაშში მონაწილეობა მანაც მიიღო.
ინტერმა იმარჯვა ადრიანო ლეიტე რიბეიროს ერთადერთი გოლით, ვაროშელთა თავდამსხმელი კი მოედანზე 75-ე წუთზე შემოვიდა. ანტონის პაპადოპულოსის სახელობის სტადიონის ბინადრების წარმატების მთავარი შემოქმედი იყო მათი დამრიგებელი, თემურ ქეცბაია, რომელმაც მრისხანე მეტოქეს არაფერი დაუთმო.
ქართველი ფეხბურთელები, რომლებმაც ინტერს გაუტანეს
| ფეხბურთელი | მატჩი | ტურნირი | თარიღი |
| დავით ყიფიანი | ინტერი 0:1 დინამო თბილისი | უეფას თასი | 14/09/1977 |
| მიხეილ აშვეთია | ლოკომოტივ მოსკოვი 3:0 ინტერი | ჩემპიონთა ლიგა | 21/10/2003 |
| კახა კალაძე | მილანი 1:0 ინტერი | სერია ა | 14/04/2006 |
| ლევან მჭედლიძე | ინტერი 4:3 ემპოლი | სერია ა | 31/05/2015 |
| გიორგი წიტაიშვილი | ინტერი 2:2 დინამო კიევი | ჩემპიონთა ლიგა, U-19 | 27/09/2017 |
მთავარი ფოტო:Guerin Sportivo | ინტერი 0-1 დინამო თბილისი (გოლი დავით ყიფიანი 78') | 14.09.1977
