ლივერპულის ტექნიკური სპონსორი 2025/2026 წლების სეზონისთვის იქნება ადიდასი - ახალი ეკიპირების პრეზენტაცია უკვე შედგა. ეს არის მერსისაიდელებისა და გერმანული ბრენდის თანამშრომლობის მე-3 შემთხვევა. ამ ორ სახელს ერთმანეთთან აკავშირებს ისტორია და არაერთი დაუვიწყარი მოგონება, რაც ყველაზე გამორჩეული მომენტების გახსენების საფუძველსაც გვაძლევს.
1985-1996 | ჩემპიონობა 30-წლიან უტიტულო სერიამდე
ადიდასი ლივერპულის ტექნიკური სპონსორი პირველად გახდა 1985 წელს და მათმა თანამშრომლობამ 11 წელი გასტანა. ინგლისურმა გუნდმა იმ პერიოდში მოიგო 12 ტიტული: 3 ჩემპიონობა, 3 ასოციაციის თასი, ლიგის თასი, 4 სუპერ თასი და ლიგის სუპერთასი. როგორც ვხედავთ, მერსისაიდელთა ბოლო ჩემპიონობა 30-წლიან მშრალ სერიამდე გერმანული ბრენდის მაისურით იყო.
"წითლებში" იმ დროს ბრწყინავდნენ იან რაში, ბრიუს გრობელარი, ჯონ ბარნსი და სხვები. ადიდასი მოესწრო როგორც უკვე ვეტერან კენი დალგლიშს, ისე ახალგაზრდა რობი ფაულერსაც. ერთი სიტყვით, ენფილდის ბინადრებისა და გერმანული ბრენდის პირველი თანაშრომლობა საკმაოდ ნაყოფიერი გამოდგა.
2006-2012 | ესპანური ლივერპული და კრიზისი
მართალია, ეს პერიოდი არ ყოფილა ტიტულებით მდიდარი (ასოციაციის თასი და ლიგის თასი), თუმცა იმ ფორმაციის ლივერპულს ნამდვილად ნებისმიერ მეტოქესთან შეეძლო მოგება. 2009 წლამდე, მერსისაიდელები იყვნენ ინგლისის ჩემპიონატის მთავარი ოთხეულის მუდმივი წევრები და მთავარი საკლუბო ტურნირის პლეიოფების რეგულარული მონაწილეები.
ახალი ათწლეულის დაწყებას კი "წითლები" შეხვდნენ კრიზისში, რომელიც იურგენ კლოპის მოსვლამდე გაგრძელდა. 2000-იანების შუა პერიოდში ენფილდზე ბრწყინავდნენ სტივენ ჯერარდი, ჩაბი ალონსო, ფერნანდო ტორესი, ხავიერ მასკერანო, დირკ კიუტი და სხვები. ცნობისთვის, გერმანული ბრენდი ლივერპულში ლუის სუარესის მოსვლასაც მოესწრო.
2025- | ახალი ერა
დღეს ჩვენ ვხედავთ განახლებულ ლივერპულს - ამ ტერმინის ზუსტი მნიშვნელობით. არნე სლოტის თავგადასავლის მეორე სეზონი, ადიდასის დაბრუნება, რეკორდული ტრანსფერები და უმაღლესი მიზნები. ამ ყველაფრის მონაწილე არის გიორგი მამარდაშვილიც, რომელიც უკვე სრულფასოვანი მერსისაიდელია.
როგორც ვხედავთ, "წითლები" არასდროს ყოფილან ჩემპიონთა ლიგის გამარჯვებულები მაშინ, როდესაც მათი ტექნიკური სპონსორი ადიდასი იყო. საკმაოდ მაღალია იმის ალბათობა, რომ ეს უსიამოვნო ტრადიცია დაირღვეს უახლოეს მომავალშივე, იმის გათვალისწინებით, თუ როგორ გაძლიერდნენ ენფილდის ბინადრები.
