ჩემპიონთა ლიგის მიმდინარე სეზონის მთავარი აღმოჩენა - ბოდო გლიმტი, გუნდი, რომელმაც ნაადრევად დაასრულა გასული წლის ფინალისტის, ინტერ მილანის თავგადასავალი ევროთასებზე. გავიხსენოთ საინტერესო ისტორია იმის შესახებ, თუ რატომ არის "ყვითლების" წარმატებული სვლა უბრალო სენსაციაზე გაცილებით მეტი.
პირველი შეხვედრა ინტერთან - ათვლის წერტილი
თასების მფლობელთა თასის 1978/1979 წლების სეზონი - ბოდო გლიმტის ერთ-ერთი პირველი გამოჩენა ევროსარბიელზე. გუნდს, რომელსაც იქამდე ჰქონდა მხოლოდ ნაპოლისთან წაგებისა და უნიონ ლუქსემბურგთან მოგების გამოცდილება, მოწინააღმდეგედ ინტერნაციონალე შეხვდა.
იმ დაპირისპირებაში არაფერი მომხდარა სენსაციური - მილანურმა გუნდმა "ყვითლები" ორი მატჩის ჯამში ანგარიშით 7:1 (5:0, 2:1) გაანადგურა. "ნერაძურიში" იმ დროს ბრწყინავდა ალესანდრო ალტობელი: ფორვარდი, რომელიც 209 გატანილი ბურთით, ჯუზეპე მეაცას შემდეგ, ლომბარდიული კლუბის ყველა დროის საუკეთესო გოლეადორია.
უშუალოდ ასპმირას ბინადრებთან დაპირისპირებაში იტალიელმა თავდამსხმელმა ორი მატჩის ჯამში პოკერი გაიფორმა. ეუგენიო ბერსელინის გუნდიდან ასევე ღირს ჯუზეპე ბარეზის, ევარისტო ბეკალოსის, ივანო ბორდონის, ჯანპიერო მარინის, კარლო მურაროს, გაბრიელე ორიალისა და ალესანდრო სკანციანის გახსენებაც.
ინტერისგან განსხვავებით, ოდბიორნ კრისტოფერსენის გუნდი ვერ დაიკვეხნიდა ხმამაღალი სახელებით, უბრალოდ დაიმახსოვრეთ მხოლოდ ერთი: ჰარალდ ბერგი. რატომ მაინცდამაინც ის? აღნიშნულ მოთამაშესა და ზოგადად, მისი ოჯახის საქმეს მოგვიანებით მივუბრუნდებით. როგორც ვთქვით, მილანელებმა ბოდო გაანადგურეს 7:1, რის შედეგადაც ამ კლუბის ევროსეზონი ნაადრევად დაასრულეს.
მეორეხარისხოვანი როლები ევროსარბიელზე, ქართველის გოლი და ფსკერზე დაშვება
ინტერთან მარცხის შემდეგ, რომელიც როგორც აღვნიშნეთ, მოხდა 1978 წელს, ბოდო გლიმტი თითქმის 20 წლის განმავლობაში ევროთასების მიღმა რჩებოდა. დაბრუნება მოხდა 90-იანების შუაში, მაგრამ "ყვითლებმა" ჯერ წააგეს გენუის სამპდორიასთან, მოგვიანებით კი ტრაბზონსპორთანაც.
"ზღვისპირელებთან" დაპირისპირებაში ასპმირას ბინადრებს ერთ-ერთ დამსჯელად მოევლინა შოთა არველაძეც, რომელმაც პირველ მატჩში გოლი შეაგდო. ცნობისთვის, ეს იყო ქართველი ფორვარდის სადებიუტო ბურთი უეფას თასის ფინალურ ეტაპზე და მოგვიანებით ის თავის აქტივში კიდევ 20+ გოლს ჩაიწერს.
ამსტერდამის აიაქსის ყოფილი თავდამსხმელი დიდი ხნის განმავლობაში იტრიალებს უეფას თასის/ევროპა ლიგის ყველა დროის საუკეთესო გოლეადორთა 10-ეულში, ყველაფერი კი როგორც აღვნიშნეთ, სწორედ ტრონდ სოლიედის გუნდის კარის აღებით დაიწყება. 90-იანების მიწურულს ბოდო კვლავ აღმოჩნდება ევროსარბიელზე, მაგრამ ამჯერად ბრემენის ვერდერთან წააგებს.
იმ პერიოდის ნორვეგიული ფეხბურთის მთავარი ცენტრი იყო ტრონჰეიმის როსენბორგი - ელიტსერიას მთავარი ძალა და ჩემპიონთა ლიგის რეგულარული მონაწილე. რაც შეეხება გლიმტს, მეორეხარისხოვანი როლი შიდა ჩემპიონატში, 2005 წელს კი ქვედა დივიზიონში დაქვეითება. "ყვითლები" დიდი ფეხბურთისგან აღმოჩნდნენ ისე შორს, როგორც არასდროს.
დაბრუნება, გრანდების გამწარება, შვილიშვილის შურისძიება
ბოდო გლიმტი ელიტსერიაში დაბრუნდა 2007 წელს და სწორედ ამ მომენტიდან იწყება ნელი ნაბიჯებით ევროპული ფეხბურთის მწვერვალისკენ აღნიშნული კლუბის აღზევება. 2010-იანებში "ყვითლებმა" ადგილი დაიმკვიდრეს ნორვეგიის ჩემპიონატში, შემდეგ დეკადაში კი უკვე ევროსარბიელზეც.
პირველი ფურორი ასპმირას ბინადრებმა მოახდინეს კონფერენს ლიგის 2021/2022 წლების სეზონის ჯგუფურ ეტაპზე, ჟოზე მოურინიოს რომას განადგურებით, 6:1. ეს იყო პირველი და ჯერჯერობით ბოლო შემთხვევა პორტუგალიელი სპეციალისტის კარიერაში, როცა მის მიერ დამოღძვრილმა გუნდმა 6 ბურთი გაუშვა.
დიახ, ლისაბონის ბენფიკას ამჟამინდელ მწვრთნელს ყველაზე მძიმე მარცხი აგემა არა ბარსელონამ (0:5) ან ლონდონის ჩელსიმ (0:4), არამედ კიეტილ კნუტსენის გუნდმა. ცნობისთვის, იმ შეხვედრაში დასრულდა რიკი კალაფიორის კარიერა მისთვის მშობლიურ "ჯალოროსიში". "განსაკუთრებული" პერიოდულად აკრიტიკებდა იტალიელ განაპირა მცველს, ბოდოში დატრიალებული კატასტროფის შემდეგ კი ის საბოლოოდ "შავ სიაში" აღმოჩნდა.
ლონდონის არსენალის ამჟამინდელ მარცხენა მცველს გლიმტთან მომხდარი კოშმარის შემდეგ, კარიერის რეანიმირებისთვის წლები დასჭირდა. "ყვითლები" მოგვიანებით ასევე მოუგებენ ლაციოს, სელტიკს, პორტუს, ალკმაარს, ოლიმპიაკოსსა და ბეშიქთაშს, რითაც დაამტკიცებენ, "მგლების" განადგურება შემთხვევითობა არ იყო.
აღსანიშნავია ისიც, რომ ევროპა ლიგის გასულ სეზონში ასპმირას ბინადრების შეჩერება მოახერხა მხოლოდ მომავალმა ჩემპიონმა, ლონდონის ტოტენჰემმა, 1/2 ფინალში. რაც შეეხება მიმდინარე სეზონს, კნუტსენის გუნდმა გადააჭარბა ყველა მოლოდინს და ევროპის მთავარი საკლუბო ტურნირის 1/8 ფინალის საგზური გაიფორმა.
ბოდოს უწინასწარმეტყველებდნენ იმ ადგილას ყოფნას, სადაც ჩემპიონთა ლიგის ფაზის დასრულების შემდეგ აღმოჩნდნენ ქაირათი, პაფოსი და სლავია, მაგრამ ნორვეგიული კლუბი აუტსაიდერის სტატუსს არ შეეგუა. ფრე "მამლებსა" და ბორუსია დორტმუნდთან, შემდეგ კი მოგება, ყურადღებით, მანჩესტერ სიტისა და ატლეტიკო მადრიდთან.
გლიმტმა ყველაზე გემრიელი ლუკმა შემოინახა ჩემპიონთა ლიგის პლეიოფში, სადაც როგორც აღვნიშნეთ, ბრძოლას გამოთიშა ვიცე-ჩემპიონი, ინტერნაციონალე. სწორედ ის კლუბი, რომელმაც 48 წლის წინ, "ყვითლები" 2 შეხვედრის ჯამში 7:1 გაანადგურა. სტატიის დასაწყისში ვახსენეთ ასპმირას ბინადრების ექს-ფლეიმეიქერი გვარად ბერგი და ახლა იწყება ყველაზე საინტერესო.
დიახ, 1978 წლის ოქტომბერში ჩატარებულ მატჩებში მონაწილეობას იღებდა ზემოაღნიშნული ნორვეგიელი ნახევარმცველი, 2026 წლის თებერვალში კი მილანელებს მოუგო მისმა შვილიშვილმა, პატრიკ ბერგმა, თანაც კაპიტნის სამკლაურით თავის ხელზე. ერთი სიტყვით, იდეალური შურისძიება სკანდინავიური საფეხბურთო ოჯახისგან.
ნორვეგიელმა ნახევარმცველმა "ნერაძურის" წინააღმდეგ შეუცვლელად ითამაშა ორივე მატჩი და გააკეთა ის, რაც ოთხი ათწლეულის წინ, ჰარალდისთვის შეუძელებელი ჩანდა. კნუტსენის გუნდის ზღაპარი გრძელდება, ამჯერად უკვე 1/8 ფინალში, რომელშიც "ქალაქელებსა" და ლისაბონის სპორტინგს შორის ერთ-ერთს შეხვდება.
რაც შეეხება ბოდოს შანსებს, მათ უკვე აქვთ პეპ გუარდიოლას გუნდის დამარცხების გამოცდილება, "ლომები" კი ნამდვილად არ არიან ის მოწინააღმდეგეები, რომლებისაც ნორვეგიელებს შეეშინდებათ, მითუმეტეს, იმ ყველაფრის შემდეგ, რაც მათ ევროპის მთავარ საკლუბო ტურნირზე გამოიარეს.
ვინ დგას ბოდო გლიმტის წარმატების უკან?
ამ კითხვაზე პასუხის გასაცემად სამი პიროვნება უნდა ვახსენოთ. უსმუნ ბიორკანი - ბოდო გლიმტის მწვრთნელი 2015 - 2018 წლებში, ვინც მოგვიანებით გადაინაცვლა სპორტული დირექტორის თანამდებობაზე, გუნდის დამრიგებლობა კი მან უბოძა თავის იმდროინდელ ასისტენტს, კნუტსენს.
დიახ, საუბარია "ყვითლების" ამჟამინდელ მწვრთნელზე, ვინც როგორც აღვნიშნეთ, თავის საქმეს 2018 წლიდან ასრულებს. ნორვეგიელ დამრიგებელთან ერთად, ასპმირას ბინადრები 5 წელში ქვეყნის ჩემპიონები გახდნენ 4-ჯერ (2020-2024), ის ხმაურიანი მოგებებიც სწორედ მის სახელს უკავშირდება.
მესამე პიროვნება, ვინც დგას კნუტსენის გუნდის წარმატების უკან არის არა რომელიმე მწვრთნელი ან სელექციონერი, არამედ როგორი გასაკვირიც არ უნდა იყოს, მფრინავი. საქმე ისაა, რომ ბოდოს სტადიონი მდებარეობს საერთაშორისო აეროპორტიდან 300 მეტრში და ნატოს სამხედრო ბაზიდან 3 კილომეტრში.
ბიორნ მანსვერკი 20 წლის განმავლობაში მსახურობდა ამ ბაზაზე საჰაერო ძალების გამანადგურებლის პილოტად და მონაწილეობდა ალიანსის სპეცოპერაციებში, ავღანეთსა და ლიბიაში. ნორვეგიელი მფრინავი ფეხბურთს არ უყურებდა, სამოქალაქო ცხოვრებაზე გადმოსვლის წინ, გლიმტის თამაშზე მხოლოდ ერთხელ იყო.
მეორე ვიზიტი მოხდა 2017 წელს. "ყვითლებმა" ალიანსის ყოფილი პილოტი დაიქირავეს ფსიქოლოგად, რათა მას აემაღლა ფეხბურთელების თვითშეფასება. "მე დავნერგე მხოლოდ 2 წესი: ურთიერთობა უნდა ყოფილიყო სურვილით, არავის ვაძალებდი ჩემთან საუბარს. მე არ ვარ ბოდოს აგენტი, არ მითქვამს მოთამაშეებისთვის, რომ აუცილებლად უნდა გახდნენ წარმატებულები ან უფრო მეტი იმუშაონ".
57 წლის ყოფილი პილოტი უბრალოდ აქრობდა დაძაბულობას - ის მოუწოდებდა გლიმტის ფეხბურთელებს პრობლემების ღიად განხილვისკენ, ერთმანეთისთვის უკუკავშირის მიცემისთვისა და წაგებების დასავიწყებლად, რადგან მისი თქმით, საუკეთესო შედეგები მათ ყოველთვის წინ ექნებოდათ.
ასე, "ყვითლები" გადაიქცნენ სამეგობრო ჯგუფად, რომელიც საათობით განიხილავდა ამა თუ იმ საკითხს. მოგვიანებით, მანსვერკი ახალი გამოწვევის წინაშე აღმოჩნდა: ასპმირას ბინადრები რეგულარულად ტრიალებდნენ ევროსარბიელზე და თამაშობდნენ ტოპ კლუბებთან, რის გამოც მოთამაშეებში სტრესის დონემ საგრძნობლად იმატა.
ნორვეგიელი ყოფილი პილოტი ხსნის - "ნერვიულობა ნორმალურია, თუმცა თუ ის არ გვეხმარება, შეიძლება შევცვალოთ დამოკიდებულება ნერვიულობის მიმართ და ვფიქრობდეთ ასე: თუ მე არ ვნერვიულობ, ეს ნიშნავს, რომ რაღაცას ვაკეთებ არასწორად“. ინდივიდუალური და ჯგუფური საუბრების გარდა, ბიორნმა დანერგა მედიტაციისა და იოგის სესიები, რომლებიც ასევე ამცირებენ სტრესს.
"ასე ვზოგავთ ენერგიას იმ საქმეებისთვის, რომლებზეც შეგვიძლია გავლენის მოხდენა. არ გვინდა ვიფიქროთ იმაზე, რაზეც გავლენა არ გვაქვს“, - როგორც ვხედავთ, კნუტსენის გუნდის ფსიქოლოგის რჩევა-დარიგებები მოქმედებს, მოკრძალებული ნორვეგიული კლუბი ნამდვილ მენტალურ მონსტრად იქცა.
ცხადია, უნდა ვახსენოთ უშუალოდ ბოდოს ფეხბურთელები და მათი შერჩევის გზა. გუნდი დაკომპლექტებულია ადგილობრივი მოთამაშეებით, ფულის არავითარი ფლანგვა სამხრეთ ამერიკელ ან აფრიკელ ლეგიონერებზე, გლიმტს ისინი უბრალოდ არ სჭირდება. მიდგომა, რომელიც თანამედროვე ფეხბურთს ასე აკლია.
ბოლოს, კიდევ ერთი საინტერესო ფაქტი, რომელიც უშუალოდ ფინანსებს უკავშირდება. "ყვითლების" ფეხბურთელთა ჯამური ფასი ოდნავ აღემატება 57 მილიონს, მაშინ, როცა იგივე ინტერნაციონალეს რამდენიმე ცალკე აღებული მოთამაშეც კი მთლიან ნორვეგიულ კლუბზე ძვირადღირებულია.
ასპმირას ბინადრებთან დაპირისპირების წინ, მილანური გუნდის შემადგენლობის ჯამური ფასი შეადგენდა 667 მილიონ ევროს, რაც 610 მილიონით მეტია, ვიდრე კნუტსენის გუნდის ღირებულება. დიახ, ეს ის იშვიათი შემთხვევაა, როცა თანამედროვე ფეხბურთში ფული მეორეხარისხოვანია.
