საქართველოს ნაკრებისა და იტალიური ფროსინონეს თავდამსხმელი გიორგი კვერნაძე, შეიძლება ითქვას, ბოლო ერთი წლის ყველაზე პროგრესირებადი ქართველი ფეხბურთელია და ყველაზე კარგად ეს 21-წლამდელთა ევროპის ჩემპიონატზე გამოჩნდა, სადაც ფიზიკურად იდეალურად იყო მომზადებული და მოედანზე დიდ სამუშაოს ასრულებდა.
კვერნაძე მიმდინარე სეზონში კარგ ფორმაშია, ფროსინონეს მაისურით 5 გოლი და 4 ასისტი აქვს და სერია ა-ში დასაბრუნებლად იბრძვის. ქართველმა შემტევმა ბოლო 6 მატჩში 3 გოლი გაიტანა და 2 საგოლე გადაცემა შეასრულა.
"ძალიან დიდი შანსი გვაქვს და ძალიან გვინდა, რომ სერია ა-ში დავბრუნდეთ. შეკრული გუნდი ვართ, პოზიტიურად ვართ განწყობილი და ყველაფერს ვაკეთებთ, რომ მიზანს მივაღწიოთ. თან, ცოტა გვიმართლებს კიდეც, რადგან ბევრი მატჩი ბოლო წუთებზე მოვიგეთ."
ამ გამარჯვებებში ერთ-ერთი მთავარი წვლილი შენ შეიტანე, ბოლო 3 მატჩში 2 გოლი გაიტანე...
"ვფიქრობ, ძალიან კარგ ფორმაში ვარ და ეს ყველაფერი გამოცდილების დამსახურებაა. მეტი სათამაშო დრო მაქვს და თამაშს ვგრძნობ. მაგალითად, ბოლო ორი გოლი როგორც გავიტანე, კუთხე ჩავკეტე, რასაც აქამდე არასდროს ვაკეთებდი. ეს ყველაფერი ბევრი შრომის შედეგია."
ფროსინონეში მესამე წელია თამაშობ, ბევრი კარგი მატჩი გქონდა, თუმცა სტატისტიკით ვერ გამოირჩეოდი, რაც წლევანდელ სეზონში გამოსწორებულია...
"დიახ, როგორ გითხარით ეს ყველაფერი გამოუცდელობის ბრალი იყო. სწორ პოზიციას ვერ ვარჩევდი და ხშირად ვიყავი საჯარიმოს გარეთ. თუ გოლი გამქონდა, საჯარიმოს გარედან. ჩემი თამაშები შევისწავლე, მინუსებზე ვიმუშავე და შედეგიანობაც გაიზარდა."
სერია ბ უკვე კარგად შეისწავლე, თამაშები სერია ა-შიც მოგიწია. როგოროა შენი თვალით დანახული იტალიის ჩემპიონატი?
"სერია ბ-ში თამაში ძალიან რთულია,ძალისმიერი თამაში მიდის, უფრო მეტად ჭიდაობა და უხეში თამაში. ვფიქრობ, სერია ა-ს და სერია ბ-ს შორის დიდი სხვაობა არაა. მეტიც, სერია ა-ში თამაში უფრო მარტივი მგონია, რადგან იქ ისეთი მოთამაშეები არიან, ვისთან თამაშითაც სიამოვნებას იღებ."
"არ მახსენდება, აქ რომელიმე მცველთან თამაში გამჭირვებოდა. ერთადერთი, პირველად რომ მოვედი, დი ლორენცომ და ანგისამ ბურთი ისე წამართვეს, ვერც კი გავიგე. ეს მომენტი კარგად დამამახსოვრდა"
ბოლო დროის ერთ-ერთი ყველაზე პროგრესირებადი ქართველი ფეხბურთელი ხარ. ფიზიკურადაც მოუმატე, ტაქტიკურადაც - რა სამუშაო გასწიე ამ მიზნის მისაღწევად?
"ფროსინონეში რომ მოვედი, 68 კილოგრამი ვიყავი, ახლა 78 ვარ. ფიზიკურად ძალიან სუსტი ვიყავი. აქ ყოველთვის დატვირთული ვარჯიშებია. წარმოიდგინეთ, ვარჯიშებზე 10-11 კილომეტრს დავრბივართ და ხშირად დღეში ორი ვარჯიშიც გვაქვს. იტალიაში რომ ჩამოვედი, მეგონა საქართველოში არასდროს მივარჯიშია. დღევანდელი გიორგი და 2 წლის წინანდელი გიორგი ცა და დედამიწაა როგორც ფიზიკურობაში, ისე საფეხბურთო ცოდნაში. ყველა თამაშში თავს კომფორტულად ვგრძნობ და უცხოდ აღარ ვარ."
ფიზიკურად ზრდამ გამოიწვია ის, რომ მოედანზე შენი ფუნქციები შეიცვალა და მომტყუებელი ფლანგის შემტევის ნაცვლად, უფრო ფორვარდი გახდი, რომელიც პრესინგზე კარგად მუშაობს...
"სიმართლე გითხრათ, ჩემთვის უფრო კომფორტული ფლანგზე თამაშია, თუმცა თავდამსხმელად თამაშიც არ მიჭირს. იყო თამაშები, სადაც 5 მცველში ფლანგის მცველად მაყენებდნენ, მაგრამ მწვრთნელმა ჩემი შეტევითი პოტენციალი ნახა, ტაქტიკა გადააწყო და ახლა სულ შეტევაში თამაში მიწევს, რაც დიდი ფუფუნებაა."
გადავიდეთ საქართველოს ნაკრებზე. შენი დებიუტი ესპანეთის ნაკრების წინააღმდეგ შედგა. როგორი იყო ემოციები?
"ყოველდღიურად იმისთვის ვვარჯიშობ, რომ ეროვნულ ნაკრებში მოვხვდე. პირველად რომ გამომიძახეს, მახსოვს კიტემ ტრავმა მიიღო და ხიზანიშვილმა დამირეკა, ხვალვე უნდა გამოფრინდეო. ძალიან ბედნიერი ვიყავი. რომ ჩავედი, ძალიან მეგობრული გარემო დამხვდა და ადაპტაცია საერთოდ არ დამჭირდა. რაც შეეხება დებიუტს, ბედნიერი ვიყავი, მაგრამ სამწუხაროდ, დავმარცხდით."
საქართველოს ნაკრებში ორი მატჩი ჩაატარე და ორივე ესპანეთის ნაკრების წინააღმდეგ, მეორე უკვე სავსე დინამო არენაზე...
"ეროვნული ნაკრების მაისურით, სავსე დინამო არენაზე თამაშით ოცნება ავიხდინე. ზოგადად, სავსე ტრიბუნებით ყველაზე დიდ სიამოვნებას ვიღებ ხოლმე. ეს ერთ-ერთი გამორჩეული მომენტი იყო ჩემს კარიერაში. კუკურელიას წინააღმდეგ თამაში მომიწია და გამაოცა. ძალიან განათლებული ფეხბურთელია. ფიქრობ, რომ სუსტია, მარტივად მოატყუებ, მაგრამ მის წინააღმდეგ თამაში ურთულესია. ცოტა ბინძურად გეთამაშება და არაფრის გაკეთების საშუალებას არ გაძლევს."
კომუნიკაცია ვილი სანიოლთან
"პირველ შეკრებაზე ვილი სანიოლი ჩემთან მოვიდა და წარმატებები მისურვა, მითხრა, იმედი მაქვს ნაკრებში მომავალშიც ხშირად გამოგიძახებო. ერთადერთი, შედეგიანობა გაქვს მოსამატებელიო. რაც არ უნდა იყოს, ფეხბურთში საბოლოოდ შედეგი ფასდება."
როგორც ვიცი, კარგი ურთიერთობა ჩამოგიყალიბდა საქართველოს ნაკრების ლიდერებთან - ხვიჩასთან, ზუკასთან და ა.შ.
"დიახ, ყველასთან კარგი ურთიერთობა ჩამომიყალიბდა, განსაკუთრებით ლოჩოსთან, კვარასთან და ზუკასთან. ისინი მოედანზე გარეთაც მეხმარებიან. მაგალითად, კოჭის ტრავმა რომ მივიღე, კვარაცხელიამ თავის პირად ფიზიოთერაპევტთან დამაკავშირა და ბევრ რამეში დამეხმარა. ზოგადად, საქართველოს ნაკრებში ძალიან მეგობრული გარემოა და არავინ გაგრძნობინებს, რომ ახალი ხარ."
ერთა ლიგაზე ჩვენი მეტოქეები უნგრეთი, ჩრდ.ირლანდია და უკრაინა იქნებიან, როგორ შეაფასებდი შანსებს?
"ჯერ წინა ციკლს შევეხები. ჩემი აზრით, ეს ჩავარდნა ნორმალურია, რადგან რაღაც პერიოდი, ჩავარდნა ყველა ნაკრებს და გუნდს აქვს. ვარჯიშებზე და თამაშებზე რასაც ვხედავდი, ბიჭები ბოლომდე იხარჯებოდნენ და გვაქვს იმის პოტენციალი, რომ გულშემატკივარი კიდევ ერთხელ გავახაროთ. ერთა ლიგას რაც შეეხება, სამივე რთული მეტოქეა, მაგრამ საქართველოს ნაკრებს ამ ჯგუფიდან გასვლა შეუძლია. ჩვენს ნაკრებში ბევრი ვარსკვლავი, ბევრი ახალგაზრდა ფეხბურთელი თამაშობს და ჩვენ სიტყვას აუცილებლად კიდევ ვიტყვით"
შენს პროგრესზე ბევრი ვსაუბრეთ. როგორ ფიქრობ, რა კომპონენტებში გაქვს კიდევ მოსამატებელი?
"ვმუშაობ, რომ საფეხბურთო ცოდნა კიდევ გავიუმჯობესო, რაც შემდეგ მოედანზე გამომადგება. ახლა მხოლოდ ერთ რამეზე ვფიქრობ - ფროსინონესთან ერთად სერია ა-ში გადასვლა. ამისთვის ყველაფერს ვაკეთებ, მსურს ჩემი წვლილიც შევიტანო და გულშემატკივარს თავი დავამახსოვრო."
