ბორდოს უკანასკნელი სამი წელი - მუდმივი ბრძოლა გადარჩენისთვის. კლუბი გაკოტრების პირას არის და ახალ სეზონს საფრანგეთის მესამე ლიგაში დაიწყებს. საქმე ისაა, რომ ლიგა 2-ში დარჩენისთვის "ჟირონდელებს" 30-40 მილიონი სჭირდებათ, რომელიც კლუბის არსებობის ერთგვარი ფინანსური გარანტია იქნება.
"ლურჯებს" აღნიშნული თანხა ჯერჯერობით არ აქვთ. კლუბი რამდენიმე კვირის განმავლობაში ეძებდა ახალ ინვესტორებს, თუმცა უშედეგოდ. იყო მოლაპარაკებები Fenway Sports Group-თან, რომელიც არის ლივერპულისა და ბოსტონ რედ სოქსის მფლობელი, მაგრამ რაღაც დროის შემდეგ, ეს მოლაპარაკებები ჩიხში შევიდა.
ფინანსური პრობლემების მიზეზი
აკვიტანიელების პრეზიდენტი ჟერარდ ლოპესია, რომელიც 2016-2020 წლებში ლილის პრეზიდენტიც იყო. აღნიშნულ კლუბს იმ დროისთვის ფინანსური დავალიანება ჰქონდა, მაგრამ ლუქსემბურგელმა ბიზნესმენმა ფინანსური მდგომარეობის გამოსწორება ვერ მოახერხა. 2021 წელს ის უკვე ბორდოზე გადაერთო.
დიახ, "ჟირონდელები" გაკოტრების პირას არიან, თუმცა ყველაფერი გაცილებით უფრო ადრე დაიწყო, მაშინ, როცა კლუბი საინვესტიციო კომპანია King Street-ის ხელში იყო. ამერიკულმა კომპანიამ "ლურჯები" ახალი სატელევიზიო კონტრაქტის გაფორმებამდე ცოტა ხნით ადრე, 2018 წლის ნოემბერში იყიდა.
King Street-ი არ აქცევდა საკმარის ყურადღებას აკვიტანიელებს და პანდემიის დაწყების შემდეგ, კომპანიამ კლუბი საერთოდ მიატოვა. ლოპესის მისვლის მომენტში ბორდოს ისედაც ჰქონდა უმძიმესი ფინანსური მდგომარეობა, მაგრამ პრობლემების მოგვარება ვერც ახალმა პრეზიდენტმა შეძლო. ყველაფერი კი სრულდება იმით, რომ "ჟირონდელები" მომავალ წელს მე-3 ლიგაში ითამაშებენ.
ქართველი, რომელმაც თავს დააღწია
როგორც გვახსოვს, "ლურჯების" ღირსებას ორი სეზონის განმავლობაში, ზურიკო დავითაშვილი იცავდა. მან ამ პერიოდში 71 შეხვედრის ჩატარება და 14 გოლის გატანა მოასწრო. ცოტა ხნის წინ, ქართველი ვინგერი 6 მილიონის სანაცვლოდ სენტ-ეტიენში გადავიდა, მაგრამ აღნიშნულმა თანხამ აკვიტანიელთა ფინანსური მდგომარეობა ვერ გამოასწორა.
უნდა აღვნიშნოთ ქართულ ფეხბურთთან ახლოს მყოფი კიდევ ერთი პიროვნება - ნაკრების მთავარი მწვრთნელი, ვილი სანიოლი, რომელიც ბორდოში 2014-2016 წლებში მუშაობდა. საფრანგეთის ეროვნული ნაკრების სხვადასხვა ასაკობრივ გუნდში მუშაობის შემდეგ, "ჟირონდელები" იყვნენ პირველები, რომლებმაც მას მთავარ გუნდში დაუძახეს.
ბორდოს მემკვიდრეობა
ბორდოს ფრანგული ფეხბურთის იერარქიაში მნიშვნელოვანი ადგილი უჭირავს. ამ გუნდი ლიგა 1-ის ჩემპიონობა ექვსჯერ აქვს მოპოვებული. მათი უკანასკნელი ტრიუმფიარც ისე დიდი ხნის წინ, 2009 წელს იყო. ამის გარდა, "ჟირონდელები" 1985 წელს გავიდნენ ჩემპიონთა თასის 1/2 ფინალში, სადაც მომავალ ჩემპიონთან, ტურინის იუვენტუსთან წაგება იგემეს.
კიდევ ერთი საინტერესო ფაქტი - ჩემპიონთა თასის 1987-1988 წლების სეზონში "ლურჯები" დაუმარცხებლად გამოვარდნენ, მხოლოდ ერთი გოლის გაშვებით. აკვიტანელთა გზაზე იყო ბერლინის დინამო (2:0; 2:0), ლილესტროიმი (1:0; 0:0) და პსვ ეინდჰოვენი (1:1; 0:0). ასევე გვახსოვს, რომ ჩემპიონთა ლიგის 2009/10 წლების სეზონში ბორდო 1/4 ფინალამდე მივიდა.
"ჟირონდელებში" სხვადასხვა დროს არაერთ გამორჩეულ ფეხბურთელს უთამაშია. სია ნამდვილად შთამბეჭდავია - ზინედინ ზიდანი, ჟან ტიგანა, ალენ ჟირესი, ჟან-პიერ პაპენი, ერიკ კანტონა, დიდიე დეშამი, ბიქსენტ ლიზარაზუ, სილვიენ ვილტორი და სხვები. თანამედროვე ვარსკვლავებიდან: ორელიან ჩუამენი და ჟიულ კუნდე.
პირველ რიგში ,გამოსარჩევი მაინც ზიდანია, რომელმაც "ლურჯებში" 4 სეზონი გაატარა. 179 ჩატარებულ შეხვედრაში 39 გოლის გატანის შემდეგ, 1996 წლის ზაფხულში ფრანგი გამთამაშებელი 3.5 მილიონად "ბებერ ქალბატონში" გადავიდა. როგორც ვხედავთ, აკვიტანელებმა ფრანგულ ფეხბურთში ნამდვილად მნიშვნელოვანი კვალი დატოვეს.
