ბუნდესლიგის საუკეთესო მოთამაშე, რომლის ვარსკვლავი რეალში ჩაქრა

ტრანსფერი რეალში - ვარსკვლავის ჩაქრობა

საჩემპიონო სეზონის შემდეგ, თურქი ნახევარმცველით დაინტერესდა რეალი, რომელსაც ახალგაზრდა ფეხბურთელმა უარი ვერ უთხრა - "ერთადერთი გუნდი, რომლის გამოც დავტოვებდი დორტმუნდს არის რეალი. ისინი დამიკავშირდნენ და მე ვერასდროს ვაპატიებდი ჩემს თავს რომ ეს შანსი არ გამომეყენა", - აცხადებდა ნური 2011 წლის ზაფხულში, მადრიდში გადასვლის შემდეგ.

ბორუსიას ნახევარმცველი მადრიდში გადავიდა ტრავმით და პირველ ვარჯიშზე მისი მუხლის მდგომარეობა კიდევ უფრო გაუარესდა. მან გამოტოვა მთელი პრესეზონი და "სამეფო კლუბის" პირველი 8 მატჩიც. ესპანური გუნდის მე-5 ნომერი მოედანს დაუბრუნდა ნოემბერში, მაგრამ ოპტიმალურ ფორმაში ჩადგომის მცდელობა პრაქტიკულად სეზონის ბოლომდე გაიწელა.

ტრავმასთან ერთად, შაჰინს აწუხებდა კონკურენციით გამოწვეული ფსილოგიური პრობლემები - ჩაბი ალონსო და სამი ხედირა "ბლანკოსის" სასტარტოში არ თმობდნენ ადგილს, თურქ შუახაზელს კი მათთან ბრძოლის ძალა უბრალოდ არ ჰქონდა. ამასთან ერთად, მას არ ენდობოდა ბერნაბეუს ბინადრების იმდროინდელი დამრიგებელი, ჟოზე მოურინიო.

პორტუგალიელი მწვრთნელი პრაქტიკულად მთელი სეზონის განმავლობაში იმეორებდა, რომ ნური არ არის სათამაშოდ მზად და მას დრო სჭირდებოდა. საბოლოოდ ყველაფერი დასრულდა იმით, რომ მოურინიოს გუნდის შუახაზელმა მოასწრო მხოლოდ 10 მატჩის ჩატარება, 1 ბურთის გატანა და 1 ასისტის გაფორმება.

2011/2012 წლების სეზონის დასრულების შემდეგ, რეალმა თავისი მეხუთე ნომერი განათხოვრების წესით თავდაპირველად გაუშვა ლივერპულში, შემდეგ ასევე იჯარით ვესტფალიაში დაბრუნდა. ქომაგებმა ძველი შაჰინი ვერც მისთვის მშობლიურ კლუბში იხილეს. დროის უმეტეს ნაწილს ის ატარებდა სათადარიგოთა სკამზე, რადგან "შავ-ყვითლებში" იმ დროს ბრწყინავდა უკვე ახალი ვარსკვლავი: ილქაი გიუნდოგანი.

თურქი ნახევარმცველის კარიერის უკანასკნელ პერიოდში იყო ბრემენის ვერდერი და ანტალიასპორი, 2021 წელს კი მან კარიერა დაასრულა. პრესაში ხშირად გვხვდება სხვადასხვა ტოპები, რომლებიც ეხება წარმატებულ თუ წარუმატებელ ტრანსფერებს და როდესაც საუბარია მადრიდელთა წარუმატებელ გარიგებებზე, ყველგან აუცილებლად ნურის დორტმუნდიდან გადმოსვლაც ფიგურირებს.

გამოწვევა მწვრთნელის რანგში

საფეხბურთო კარიერის დასრულების შემდეგ, ბორუსიას აღზრდილმა ნახევარმცველმა დაიწყო სამწვრთნელო საქმიანობა და მისთვის კარგად ნაცნობი ანტალიასპორი ჩაიბარა. აღნიშნულ კლუბში 2-წლიანი მუშაობის შემდეგ, 36 წლის დამრიგებელი დაბრუნდა მისთვის მშობლიურ ვესტფალიაში, სადაც ედინ ტერზიჩი შეცვალა.

დღეს, შაჰინი "შავ-ყვითლების" მწვრთნელის რანგში უპირისპირდება გუნდს, რომელშიც მან ოცნებები ვერ აიხდინა. ცხადია, მისთვის აღნიშნული დაპირისპირება პრინციპულიც არის და განსაკუთრებულიც. საინტერესოა ისიც, რომ მასპინძელთა რიგებში არის მოთამაშე, რომელიც ყოფილი თურქი შუახაზელის მსგავსად, "სამეფო კლუბში" სიგნალ იდუნა პარკიდან გადავიდა.

საუბარია ჯუდ ბელინგემის შესახებ, რომელიც ნურისგან განსხვავებით, "სამეფო კლუბში" მსოფლიოს ერთ-ერთ საუკეთესო ფეხბურთელად ჩამოყალიბდა. ინგლისელმა გამთამაშებელმა ერთხელ უკვე ითამაშა დორტმუნდის წინააღმდეგ, გასულ სეზონში, ჩემპიონთა ლიგის ფინალში, ვნახოთ, რა იქნება ამჯერად.