შოთა არველაძე | რეინჯერსი 0:1 მანჩესტერ იუნაიტედი (ჩემპიონთა ლიგის ჯგუფური ეტაპი, 2003/04)
არველაძეს მანჩესტერის წინააღმდეგ აქვს უარყოფითი სტატისტიკა, ის ორიდან ორ შეხვედრაში დამარცხდა. ეს ყველაფერი მოხდა ჩემპიონთა ლიგის 2003/2004 წლების სეზონის ჯგუფურ ეტაპზე: იუნაიტედმა ჯერ 3:0 გაანადგურა რეინჯერსი, შემდეგ კი მინიმალური ანგარიშით სტუმრადაც მოიგო. შოთამ ორივე შეხვედრაში 90 წუთი ითამაშა.
გიორგი დემეტრაძე | დინამო კიევი 0:0 მანჩესტერ იუნაიტედი (ჩემპიონთა ლიგის ჯგუფური ეტაპი, 2000/01)
არველაძის მსგავსად, მანჩესტერი ჩემპიონთა ლიგაზე ვერც დემეტრაძემ დაამარცხა, თუმცა მის აქტივში ერთი ფრე არის. ევროპის მთავარი საკლუბო ტურნირის ჯგუფურ ეტაპზე იუნაიტედმა დინამოს ჯერ მინიმალური ანგარიშით მოუგო, საპასუხო შეხვედრაში კი უგოლო ფრე დაფიქსირდა. ცნობისთვის, გიორგისთან ერთად, კიეველთა რიგებში კახა კალაძეც იყო.
კახა კალაძე | მილანი 3:0 მანჩესტერ იუნაიტედი (ჩემპიონთა ლიგის 1/2 ფინალი, 2006/07)
კალაძეს მანჩესტერის წინააღმდეგ ჩატარებული აქვს ოთხი მატჩი და მისი მონაგარი ასეთია - ორი მოგება, ერთი ფრე და ერთი მარცხი. ჩემპიონთა ლიგის 2006/07 წლების სეზონის 1/2 ფინალში მილანმა იუნაიტედი გაანადგურა 3:0 და ამ ყველაფრის მონაწილე კახაც იყო. რა მოხდა შემდეგ? ფინალში ლივერპულთან მოგებით, ქართველმა უკანახაზელმა ევროპის მთავარი საკლუბო ტურნირის თასი კარიერაში მეორედ აღმართა.
მიხეილ ყაველაშვილი | მანჩესტერ სიტი 2:3 მანჩესტერ იუნაიტედი (პრემიერ ლიგის 34-ე ტური, 1995/96)
ერთადერთი ქართველი ფეხბურთელი, რომელმაც მანჩესტერს გაუტანა. ეს ყველაფერი პრემიერ ლიგის 1995/1996 წლების სეზონში მოხდა. საინტერესოა ის, რომ ყაველაშვილის დებიუტი სიტის რიგებში შედგა სწორედ მეზობელი იუნაიტედის წინააღმდეგ და თავისი სადებიუტო ბურთიც მან სწორედ ამ შეხვედრაში შეაგდო.
თემურ ქეცბაია | ნიუკასლი 3:0 მანჩესტერ იუნაიტედი (პრემიერ ლიგის 25-ე ტური, 1999/00)
აღნიშნულ მატჩამდე ერთი სეზონით ადრე, მანჩესტერმა ქეცბაიას ნიუკასლი ინგლისის ასოციაციის თასის ფინალში დაამარცხა. ერთი წლის შემდეგ შედგა რევანში, მაგრამ ამჯერად უკვე პრემიერ ლიგაში. თემური მოედანზე შემოვიდა 61-ე წუთზე, დანკან ფერგიუსონის ნაცვლად, როდესაც ანგარიში 1:0 იყო. შეხვედრის ბოლოსთვის კი ანგარიში გამანადგურებელი გახდა.
ზურაბ ხიზანიშვილი | მანჩესტერ იუნაიტედი 1:2 ბლექბერნი (პრემიერ ლიგის მე-7 ტური, 2005/06)
პრემიერ ლიგის 2005/2006 წლების სეზონის ერთ-ერთი მთავარი სენსაცია - მანჩესტერის მარცხი ბლექბერნთან, თანაც ოლდ ტრაფორდზე. ხიზანიშვილი იმ დროს ინგლისის ჩემპიონატში დგამდა პირველ ნაბიჯებს და ის ამ ისტორიული მოგების მონაწილეც გახდა. როვერსმა იმარჯვა მორტენ გამსტ პედერსენის დუბლით და რაც შეეხება ზურაბს, მან მოედანზე 90 წუთი გაატარა.
გიორგი ქინქლაძე | მანჩესტერ იუნაიტედი 2:1 მანჩესტერ სიტი (ასოციაციის თასის 1/8 ფინალი, 1995/96)
ქინქლაძეს მანჩესტერის წინააღმდეგ უთამაშია პრემიერ ლიგაშიც, თუმცა ასოციაციის თასზე გამართული მატჩი გამორჩეული იყო იმით, რომ მან საგოლე პასი მიითვალა. გიორგის ასისტით ანგარიში გახსნა უვე როსლერმა, მაგრამ მოგვიანებით, ერიკ კანტონამ და ლი შარპმა იუნაიტედს მოგება მოუტანეს. ეს არ იყო ერთადერთი შემთხვევა, როდესაც ქართველმა ფლეიმეიქერმა "წითელ ეშმაკებთან" შედეგიანი ქმედება ჩაიწერა.
2000 წელს, უკვე დერბი ქაუნთიში თამაშის დროს, მან სიტის ყოფილმა ლიდერმა "მანკუნიანელებთან" კიდევ ერთი საგოლე გადაცემა გააკეთა. აღსანიშნავია ისიც, რომ პრემიერ ლიგის 2000/01 წლების სეზონის ბოლოს, "ვერძებმა" სერ ალექს ფერგიუსონის იმ მომენტისთვის უკვე გაჩემპიონებულ გუნდს მოუგეს კიდეც.
ჯაბა ლიპარტია | მანჩესტერ იუნაიტედი 1:0 ზარია (ევროპა ლიგის ჯგუფური ეტაპი, 2016/17)
უკანასკნელი ქართველი ფეხბურთელი, რომელმაც მანჩესტერის წინააღმდეგ ითამაშა. ევროპა ლიგის 2016/2017 წლების სეზონის ჯგუფური ეტაპი - იუნაიტედმა უკრაინულ ზარიას ორივე შეხვედრა მოუგო (2:0, 1:0). ლიპარტიამ ორივე მატჩში ჯამში 32 წუთი გაატარა. მის გუნდს ორი ბურთი შეუგდო ზლატან იბრაჰიმოვიჩმა, ერთი კი ჰენრიხ მხითარიანმა.
