ევროპის 21-წლამდელთა ჩემპიონატის დაწყებასთან ერთად, გავიხსენოთ ფეხბურთელები, რომლებიც სხვადასხვა დროს აღნიშნული ტურნირის საუკეთესო გოლეადორები გახდნენ. საინტერესოა, ერთ-ერთ გათამაშებაში ყველაზე მეტი ბურთი ქართველმა მოთამაშემ გაიტანა.
ალბერტო ჯილარდინო | 4 გოლი, ევრო 2004
მსოფლიო ჩემპიონატისა და ჩემპიონთა ლიგის ტიტულებამდე, ახალგაზრდა ჯილარდინომ 2004 წელს ჯერ 21-წლამდელების ევროპის ჩემპიონატი მოიგო. ტურნირის საუკეთესო მოთამაშე და გოლეადორი, რომელმაც ეს ჯილდო იოჰან ელმანდერთან ერთად გაიყო. ევრო 2004-ის ჩემპიონი გახდა იტალიის ეროვნული გუნდი, ცხადია, ალბერტოს უდიდესი დამსახურებით.
კლას-იან ჰუნტელაარი | 4 გოლი, ევრო 2006
ჩემპიონატი, რომელიც ჰუნტელაარის ბენეფისად იქცა. ახალგაზრდა თავდამსხმელი გახდა 21-წლამდელთა ევროპულ ტურნირზე ერთპიროვნული საუკეთესო გოლეადორი, ასევე გათამაშების საუკეთესო ფეხბურთელიც. ნიდერლანდების ეროვნული გუნდის ჩემპიონობა კლასის გარეშე უბრალოდ ვერ შედგებოდა.
პიერ ლიტბარსკი | 6 გოლი, ევრო 1982
ლიტბარსკის შთამბეჭდავი თამაშის მიუხედავად, გერმანიის ნაკრებმა ჩემპიონის ტიტულის მოპოვება ვერ მოახერხა. ორრაუნდიან ფინალურ დუელში "ბუნდესნაკრებმა" ინგლისის ეროვნულ გუნდთან წააგო. ეს ფაქტი სულაც არ აკნინებს პიერის მიღწევას, რომელმაც ტურნირზე 6 ბურთი შეაგდო.
ალვარო მორატა | 4 გოლი, ევრო 2013
ესპანური ფეხბურთის დომინირების პერიოდი. მსოფლიო ჩემპიონობა, ზედიზედ ორჯერ ევროპის ჩემპიონობა და იგივენაირი შედეგი 21-წლამდელებშიც. "ფურია როხა" იყო შეუჩერებელი, მისი მთავარი მეგოლე კი იყო მორატა, რომელმაც 2013 წელს ჩატარებულ ტურნირზე 4 ბურთი შეაგდო.
ანდრეა პირლო | 3 გოლი, ევრო 2000
დრო, როდესაც პირლო ჯერ კიდევ თავდამსხმელად თამაშობდა. თუ მილანის ინტერს მისი ფორვარდობა ვერ გამოადგა, იტალიის 21-წლამდელთა ეროვნულმა გუნდმა ანდრეას შემტევი პოტენციალი სრულფასოვნად გამოიყენა. ახალგაზრდა წინახაზელი გახდა ტურნირის საუკეთესო გოლეადორი და ცნობისთვის, "სკუადრა აძურას" შემტევმა ფინალში ჩეხეთთან დუბლი გაიფორმა.
რაულ გონსალესი | 3 გოლი, ევრო 1996
ტურნირი, რომელიც რაულისთვის არის ერთდროულად ტრიუმფალური და სამწუხარო. სამი გატანილი გოლით ის გახდა საუკეთესო ბომბარდირი, მაგრამ ფინალში, 11-მეტრიანების სერიაში გონსალესმა ესპანეთის მხრიდან გადამწყვეტი პენალტი ვერ გამოიყენა. მისმა ეროვნულმა გუნდმა გადამწყვეტ ბრძოლაში იტალიასთან წააგო.
საულ ნიგესი | 5 გოლი, ევრო 2017
მართალია, ესპანეთი არ გამხდარა იმ ჩემპიონატის გამარჯვებული, თუმცა საულმა თავისი პერფომანსით მთელი საფეხბურთო სამყარო აალაპარაკა. გამოსარჩევია 1/2 ფინალური დაპირისპირება იტალიასთან, რომელშიც ნიგესმა მეტოქეს 3 ბურთი შეუგდო. რაც შეეხება ფინალს, "ფურია როხას" გერმანიამ აჯობა.
რამაზ შენგელია | 3 გოლი, ევრო 1980
ერთადერთი შემთხვევა, როდესაც 21-წლამდელთა ევროპის ჩემპიონატის საუკეთესო ბომბარდირი ქართველი ფეხბურთელი გახდა. შენგელიამ იმ ტურნირზე აიღო უძლიერესი იტალიის კარი, ასევე 2 შეხვედრაში 2 ბურთი მან იუგოსლავიას შეუგდო. ცნობისთვის, ევრო 1980-ზე 1 ბურთი ვიტალი დარასელიამაც გაიტანა.
დავორ შუკერი | 3 გოლი, ევრო 1990
დრო, როდესაც ჯერ კიდევ არ არსებობდა ხორვატიის ნაკრები და ამ ქვეყნის წარმომადგენლებს იუგოსლავიაში თამაში უწევდათ. 1990 წლის ტურნირზე გაიბრწყინა შუკერმა, რომელიც გახდა ევროს საუკეთესო მოთამაშე და თანაბომბარდირი, ანდრეი სიდელნიკოვთან ერთად. 8 წლის შემდეგ, დავორი უკვე მუნდიალის გოლეადორი გახდება.
ჯანლუკა ვიალი | 4 გოლი, ევრო 1986
1990-იანების იტალიური ფეხბურთის ერთ-ერთი მთავარი სიმბოლო, რომელმაც თავდაპირველად 1986 წლის ახალგაზრდულ ევროპის ჩემპიონატზე გაიბრწყინა. ევრო 1986-ის ტრიუმფატორი გახდა "სკუადრა აძურა", მისი საუკეთესო მოთამაშე და გოლეადორი კი სწორედ ვიალი იყო.
სხვა ბომბარდირები: ადრიან ლოპესი, მარკუს ბერგი, რენატო ბუსო, იოჰან ელმანდერი, სერხიო გომესი, ვაჰიდ ჰალილჰოჯიჩი, მარკ ჰეიტლი, სტეფენ ივერსენი, არის კარასავიდისი, იან კლიმენტი, ნიკოს ლიბეროპულოსი, მასიმო მაკარონე, ლუკას ნმეჩა, ჟოაო პინტო, მასეო რიგტერსი, აბელ რუისი, ანდრეი სიდელნიკოვი, გეორგი სუდაკოვი, ლუკა ვალდშმიტი.
