განვლილი ზაფხულის 10 ყველაზე გამორჩეული ტრანსფერი

ფეხბურთელი, რომელმაც ახალგაზრდულ ასაკშივე მოიგო ყველაფერი, თუმცა სიტიში ერლინგ ჰოლანდის ჩრდილიდან გამოსვლა მან ვერ მოახერხა. სრულფასოვნად და თავის გემოზე სათამაშოდ ალვარესს მოუწია მანჩესტერული კლუბის დატოვება და ატლეტიკოში გადასვლა. მისი ტრანსფერი 75 მილიონი დაჯდა.

2021 წლის ევროპის ჩემპიონატის ერთ-ერთი მთავარი გმირი, რომელიც იუვენტუსის გეგმებიდან ამოვარდა. კიეზა მთავარი გუნდიდანაც კი მოკვეთეს და ის მთელი ზაფხულის მანძილზე ახალი კლუბის ძიებაში იყო. ფედეს სახელს უკავშირებდნენ ბარსელონას, ინტერსა და ბეშიქთაშსაც კი, მაგრამ ყველაფერი საბოლოოდ დასრულდა ლივერპულში ტრანსფერით, თან ძალიან იაფად.

დე ლიხტმა სულ რაღაც რამდენიმე წელიწადში გამოიარა აიაქსი, იუვენტუსი, ბაიერნი და ახლა უკვე მანჩესტერი. ინგლისურ გრანდში მოხდა მისი და ერიკ ტენ ჰაგის თანამშრომლობის აღდგენა, ამსტერდამში ერთად მუშაობის შემდეგ. მატისის გარდა, მიუნხენიდან იუნაიტედში ასევე გადავიდა ნუსაირ მაზრაუი, ნიდერლანდელი თავკაცისთვის კიდევ ერთი ნაცნობი მოთამაშე.

ლუკაკუს იტალიური თავგადასავალი გრძელდება, ამჯერად ნაპოლიში. შეგახსენებთ, რომ მისი უკანასკნელი გაჩერება იყო რომა, რომელშიც ის განათხოვრებით თამაშობდა. საბოლოოდ ყველაფერი დასრულდა იმით, რომ "ჯალოროსიმ" რომელუ არ გამოისყიდა, გადამრჩენელად კი მას მოევლინა ანტონიო კონტე, რომლის ხელმძღვანელობით ის ინტერში ბრწყინავდა.

განვლილ ევროპის ჩემპიონატზე გაბრწყინების შემდეგ, ნათელი იყო, რომ მამარდაშვილს ვალენსიაში დიდხანს აღარავინ გააჩერებდა. ახალგაზრდა მეკარის გაფორმება შეძლო ლივერპულმა, მაგრამ თავის ახალ კლუბს გიორგი შემდეგ ზაფხულს შეუერთდება. ის ელოდება ალისონ ბეკერის წასვლას, იქამდე კი ქართველი კარის დარაჯი ვალენსიაში იჯარით დარჩება.

ტრანსფერი, რომელსაც საფეხბურთო სამყარო წლების განმავლობაში ელოდებოდა. მოსახდენი მოხდა - მბაპე რეალს ოფიციალურად შეუერთდა. გრანდიოზული პრეზენტაცია, მადრიდული კლუბის ლეგენდარული 9-ნომრიანი მაისური და უდიდესი მოლოდინი - ყველაფერი ეს სწორედ კილიანის ახალი ფურცლის ნაწილია.

ფეხბურთელი, რომელმაც განვლილი ევროპის ჩემპიონატი კაპიტნის რანგში მოიგო. მილანს კონტინენტის პირველობის ერთ-ერთი მთავარი გმირი სულ რაღაც 13 მილიონი დაუჯდა. იუვეს შემდეგ, "როსონერი" მორატას კარიერაში რიგით მე-2 იტალიური კლუბი იქნება. ვნახოთ, როგორი გამოვა მისი დაბრუნება კალჩოში.

ოლმო დაბრუნდა მშობლიურ გუნდში, რომელიც 10 წლის წინ დატოვა. ბარსელონადან წასვლის შემდეგ, მის კარიერაში იყო ზაგრების დინამო, ლაიფციგი და ესპანეთის ეროვნულ გუნდში გაბრწყინება. საბოლოოდ ყველაფერი დასრულდა იმით, რომ კატალონიელებისთვის დანი ერთ-ერთ მთავარ სამიზნედ იქცა. აქვე დავამატებთ, ესპანელ გამთამაშებლამდე, "ბლაუგრანას" ნიკო უილიამსის ტრანსფერი ჩაეშალა.

ნათელი იყო, რომ სანამ მანჩესტერში მუშაობს ტენ ჰაგი, სანჩოს ამ გუნდში მომავალი არ ექნებოდა. ის გასულ სეზონში განათხოვრების წესით დააბრუნეს ჯერ დორტმუნდის ბორუსიაში, შემდეგ კი ტრანსფერზეც დააყენეს. ჯეიდონის სახელს მთელი ზაფხულის მანძილზე უკავშირებდნენ იუვეს, მაგრამ ფანჯრის დახურვამდე ბოლო საათებში ის ჩელსიში აღმოჩნდა.

ლივერპული, სიტი, ჩელსი და ახლა უკვე არსენალიც - ასეთია სტერლინგის თავგადასავალი. ენცო მარესცამ ნათლად აუხსნა გარემარბს, რომ მის გუნდში მას მომავალი არ ჰქონდა. "არისტოკრატებიდან" წასვლამდე, რაჰიმს მისი 7-ნომრიანი მაისურიც კი წაართვეს. ყველაფერი მიდიოდა საუდის არაბეთში წასვლისკენ, მაგრამ ბევრისთვის მოულოდნელად, ის ქალაქ ლონდონს არ გაცდენია.

ასევე გამოსარჩევია: რიკარდო კალაფიორი (ბოლონიადან - არსენალში), ენდრიკ დე სოუზა (პლამეირასიდან - რეალში), კონორ გალაგერი (ჩელსიდან - ატლეტიკოში), ილქაი გიუნდოგანი (ბარსელონადან - სიტიში), ტეუნ კუპმაინერსი (ატალანტადან - იუვენტუსში), დუგლას ლუისი (ასტონ ვილადან - იუვენტუსში), მიკელ მერინო (სოსიედადიდან - არსენალში), მაიკლ ოლისე (კრისტალ პალასიდან - ბაიერნში), სტრაჰინია პავლოვიჩი (ზალცბურგიდან - ბაიერნიდან), პიოტრ ჟელინსკი (ნაპოლიდან - ინტერში), ჯოშუა ზირკზე (ბოლონიადან - მანჩესტერ იუნაიტედში).

გამორჩეული ქართული ტრანსფერები: ზურიკო დავითაშვილი (ბორდოდან - სენტ-ეტიენში), გიორგი გოჩოლეიშვილი (შახტარიდან - კოპენჰაგენში), გიორგი მიქაუტაძე (მეციდან - ლიონში), საბა საზონოვი (ტორინოდან - ემპოლიში), გიორგი წიტაიშვილი (დინამო კიევიდან - გრანადაში)