კანადის რბოლა, 2007: ჰემილტონის ისტორია ფორმულა 1-ში 2007 წელს, მაკლარენში დაიწყო. დებიუტიდან მე-6 რბოლაში, ახალგაზრდა ბრიტანელმა მრბოლელმა საოცარი რბოლა ჩაატარა და პირველი გრან პრი მოიგო. ლუისმა შაბათს კვალიფიკაციაზე პირველი ადგილი დაიკავა და კვირასაც არავის დაუთმო პირველობა. კანადის გრან პრიზე ჰემილტონი გამოცდილი პილოტივით გაუმკლავდა 3 უსაფრთხოების მანქანას და კარიერაში პირველი გამარჯვება მოიპოვა.
აშშ-ს რბოლა, 2007: ჰემილტონი ალონსოს წინააღმდეგ - ორი ტალანტის დაპირისპირებამ ინდიანაპოლისის ტრასაზე პიკს მიაღწია. კანადის მსგავსად, ლუისმა აშშ-შიც პოულ პოზიცია მოიპოვა, ხოლო მეორე ადგილზე მისი თანაგუნდელი, ფერნანდო ალონსო გავიდა. რბოლის დროს ესპანელმა პილოტმა არაერთხელ სცადა ბრიტანელის გადასწრება, თუმცა, 22 წლის მრბოლელი უშეცდომოდ იცავდა თავს. ინდიანაპოლისში გამარჯვებით, ლუისმა ფსიქოლოგიური უპირატესობა მოიპოვა თანაგუნდელზე.
მონაკოს რბოლა, 2008: გახეთქილი საბურავი წვიმიან ამინდში საკმარისია იმისთვის, რომ პილოტს რბოლა გაუფუჭდეს, თუმცა - არა ჰემილტონისთვის. ბრიტანელი მრბოლელი მესამე ადგილზე იმყოფებოდა, როდესაც მე-6 წრეზე საბურავი დაუზიანდა. მან მეთოდურად მოახერხა პოზიციების კვლავ მოგება და საბოლოოდ, გრან პრის გამარჯვებულიც გახდა. წლის ბოლოს კი პირველი მსოფლიო ჩემპიონის ტიტული მოიგო.
უნგრეთის რბოლა, 2013: ლუის ჰემილტონმა მაკლარენი 2013 წელს დატოვა და მერსედესში გადავიდა, სადაც პირველ სეზონში დიდ წარმატებებს ვერ მიაღწია. ლუისმა ამ წელს მხოლოდ ერთი გრან პრი მოიგო უნგრეთში, სადაც პოულიდან დაიწყო და მთელი რბოლა გაუძლო წნეხს რედ ბულის პილოტებისგან - მარკ ვებერისა და სებასტიან ფეტელისგან. უნგრეთში ბრიტანელ მრბოლელს საოცარი სარბოლო ტემპი ჰქონდა.
იაპონიის რბოლა, 2014: გადასწრება შეიძლება იყოს მნიშვნელოვანი როგორც სარბოლო, ასევე ფსიქოლოგიური კუთხითაც - სწორედ ასე მოხდა იაპონიაში, როდესაც ლუისმა თანაგუნდელი ნიკო როსბერგი დაამარცხა. წვიმიან რბოლაში ჰემილტონმა, რომელმაც წინა დღეს პოულ პოზიცია მოიპოვა, საოცარი ტრაექტორიით გადაუსწრო როსბერგს და გრან პრის გამარჯვებული გახდა. ეს გახდა სეზონის გარდამტეხი მომენტი, რომლის შედეგად ბრიტანელმა მსოფლიო ჩემპიონის ტიტული მეორედ მოიპოვა.
გერმანიის რბოლა, 2018: არა უბრალოდ გამარჯვება, არამედ სეზონის უმნიშვნელოვანესი მომენტი - ასე შეგვიძლია შევაფასოთ 2018 წლის გერმანიის გრან პრი. ტექნიკური პრობლემების გამო, ლუისმა რბოლა მე-14 პოზიციიდან დაიწყო, ხოლო კვალიფიკაცია ფერარის პილოტმა, სებასტიან ფეტელმა მოიგო - ეს იყო იდეალური სცენარი იტალიური გუნდისთვის. წვიმიან ტრასაზე ფეტელმა საჭე ვერ დაიმორჩილა და მე-16 წრეზე რბოლას გამოეთიშა. ჰემილტონმა კი წინ ყველას გადაასწრო და გრან პრის გამარჯვებული გახდა, ხოლო სეზონის ბოლოს მე-5 ტიტულიც მოიგო.
უნგრეთის რბოლა, 2019: 18 წამიანი ჩამორჩენის გაბათილება 22 წრეში წარმოუდგენელია? - არა თუ ლუის ჰემილტონზე ვსაუბრობთ. ბრიტანელმა პილოტმა რბოლა მე-3 პოზიციიდან დაიწყო და ლიდერის, მაქს ვერსტაპენის გადასწრება რამდენჯერმე სცადა, თუმცა - უშედეგოდ. მერსედესმა სარისკო გადაწყვეტილება მიიღო - ჰემილტონი ბოქსებში შეიყვანეს და ბოლიდზე ახალი საბურავები დაუყენეს. რისკმა გაამართლა, ლუისმა მაქსს გადაასწრო და რბოლა მოიგო. სეზონის ბოლოს კი მეექვსედ გახდა მსოფლიო ჩემპიონი.
დიდი ბრიტანეთის რბოლა, 2020: ლუის ჰემილტონმა 2020 წლის სეზონში დიდი ბრიტანეთის გრან პრიზე მე-7, ყველაზე დასამახსოვრებელი, გამარჯვება მოიპოვა. რბოლაზე ლუისი დამაჯერებლად ლიდერობდა, ხოლო მეორე ადგილზე მისი თანაგუნდელი ვალტერი ბოტასი იყო. ფინიშამდე 3 წრით ადრე, ბოტასს საბურავი გაუსკდა და მეორე ადგილზე ვერსტაპენი გადავიდა. ბოლო წრეზე კი ლუისსაც თანაგუნდელის მსგავსი პრობლემა შეექმნა, თუმცა, მაქსთან 33 წამიანი სხვაობა საკმარისი აღმოჩნდა და რბოლის გამარჯვებული სამი საბურავით გახდა.
თურქეთის რბოლა, 2020: ლუის ჰემილტონმა კარიერაში მე-7, და ჯერჯერობით ბოლო, მსოფლიო ჩემპიონის ტიტული თურქეთში მოიპოვა. აღნიშნულ გრან პრიზე წვიმის გამო არაერთმა პილოტმა დაუშვა შეცდომა, ლიდერიც რამდენჯერმე შეიცვალა და საბოლოოდ, რბოლა ბრიტანელი პილოტის გამარჯვებით დასრულდა. 2020 წლის თურქეთის გრან პრიზე ჰემილტონმა კიდევ ერთხელ გამოავლინა მაღალი სარბოლო ინტელექტი და უნარები.
რუსეთის რბოლა, 2021: ჰემილტონი ფორმულა 1-ის ისტორიაში პირველი პილოტია, რომელმაც 100 რბოლის მოგება მოახერხა. სარეკორდო ნიშნულს ბრიტანელმა 2021 წლის რუსეთის გრან პრიზე მიაღწია. რთული სტარტის მიუხედავად, ბრიტანელმა ეტაპობრივად მოახერხა პოზიციების მოპოვება და კარიერაში მე-100 გრან პრის გამარჯვებული გახდა.
Federico Mariani © RCS MEDIAGROUP
